گرلز ہائی اسکول بلوچی گوٹھ بیلہ نا خوانندہ و خوانفوک آک اسکول ماڑی نا بدحالی نا سوب آن کوٹی تیان پیشن 40 سینٹی گریڈباسُنی و ترند دے آ خوانفنگ آ بیوس ءُ۔
پنچ سال مُست زمین جمب ئٹ اسکول نا ماڑی نزور مسس ہراڑا تمنگ نا خلیس ارے، و داسکان ماڑی نا جوڑ کننگ آ کاریم مننگ اف۔
معصوم آ خوانندہ آک باسُن آ دے آ خوار ءُ و خوانفوک آ ہم ہڑاند آتون مون تننگ ءُ۔
شابیتی حوال تا رد ئٹ میونسپل کمیٹی بیلہ ٹی ساڑی گورنمنٹ گرلز ہائی سکول نا ماڑی بدحالی نا گواچی ءِ ہرا نا سوب آن 360 خوانندہ و 18 زالبول خوانفوک آک خاخر شلوک دے آ خواننگ و خوانفنگ برجاء تخنگ آ بیوس ءُ۔ اسکول ءِ ہائی نا درجہ تننگانے ولے ماڑیتننگتنے۔
چار شمبے نا دے السی پریس کلب بیلہ نا حوالکار آتا دورہ نا وخت آ اسکول نا زالبول خوانفوک آک و خوانندہ آک تینتو مروکا بےدادی وذمہ وار ادارہ آتا بےحسی و خن تری آ ہیت کریسہ پاریر کہ ننے اَرا ڈوہ ئنا سزا تننگ مننگ ئٹی ءِ۔
اوفتا پاننگ ئس کہ ننا اسکول نا ماڑی 5 سال آن بدحالی نا گواچی ءِ واکدار و محکمہ تعلیم نا کوالخواک اسہ وڑ خن تے تر کرینو۔ اسہکنڈ آن تعلیم ءِ مونی دننگ نا بڑز و بانگ حکومتی دعوی آک مننگ ءُ و ایلو کنڈ آن معصوم آ خوانندہ آک و خوانفوک آک باسُنی و دے آتعلیمی بست و بند ءِ برجاء تخنگ آ بیوس ءُ۔
اوفتا ودیک پاننگ ئس کہ ننا ویل و فریشانی تا نئے محکمہ نا افسر آتے مارشت ارے و نئے کہ گچین مروک السی نمائندہ آک ننے بننگ ناخواری کشیرہ، ننا حال ءِ سوج کروکو کس اف، غٹ فوٹو سیشن اسکان تفوک ءُ۔ تعلیم نا گچینی کن کس عملی وڑ ئٹ مخلص اف۔
اوفتا پاننگ ئس کہ پر و ہار آن ننا اسکول ءِ پین زیات نسخان مسنے، بست و بند ایلو محکمہ تعلیم نا ذمہ وار آک داسکان ننے ٹینٹ ہمتتنو۔
او پاریر کہ حکمران و محکمہ تعلیم نا افسر آک خن تے ملیر و ننا حالت آ رحم کنیر و ننا اسکول نا بدحال ماڑی ءِ جوڑ کننگ کندمدستی گام ارفر و آرٹیکل 25 اے (A\25) آ عمل کریسہ چُنا تے جوان تعلیم نا حق ایتر۔