اسلام آباد ئٹ بنجائی وزیر قانود و انصاف سینیٹر اعظم نذیر تارڑ نا کماشی ٹی زوراکی نا بیگواہی و بیگواہ آ بندغ آتا بابت ئٹ اڈتروک کابینہ نا شیفکو کمیٹی نا اولیکو مجلس اڈ تننگا ہرا ٹی بنجائی وزیر داخلہ رانا ثناء اللہ، بنجائی وزیر سائنس و ٹیکنالوجی آغاحسن بلوچ، بنجائی وزیر تخفیف غربت شازیہ مری، بنجائی وزیر بحری امور فیصل سبزواری و سینیٹر کامران مرتضیٰ اوار ئسر۔
کمیٹی نا مجلس ئٹی زوراکی نا بیگواہی تا بابت ئٹ آئی جی اسلام آباد پولیس، ڈی آئی جی بلوچستان، ڈی آئی جی سندھ ءِ ہمخواہفنگ مس۔ بنجائی وزیر آتا کمیٹی بیگواہ آ بندغ آتا بابت ئٹ گامگیجی مجلس اڈ ایتو۔
کمیٹی تدوکا دے تیٹ کوئٹہ ٹی بیگواہ آ بندغ آتا خاہوت آتون اوڑدئی کریسہ ہیت و تران آن گڈ اینو اوفتے مجلس ئٹ خواہفے ہراڑےبیگواہ آ بندغ آتا کنڈ آن پروفیسر منظور بلوچ، و بیگواہ ڈاکٹر دین محمد نا مسڑ و وائس فار بلوچ مسنگ پرسنز نا سروک سمی دینبلوچ مجلس ئٹ اوار مسر۔
یاتی مرے کہ درزن آتا کچ بلوچ بیگواہ تا خاہوت آک کوئٹہ ٹی گونر ہاؤس نا مون آ تولوک برانز کننگ ئسر ہراڑے 50 دے ئی تولوک برانزآن گڈ تدوکا تو ئٹی بنجائی وزیر آتا اسہ کمیٹی اس خاہوت آتون ہیت و تران کریسہ تولوک برانز ءِ ایسر کرے۔
خاہوت آتا رد ئٹ بنجائی وزیر آتا کمیٹی اوفتا خواست آتیا گامگیج نا قول کرینے ہراڑان گڈ خاہوت آک اوفتیا باور کریسہ تینا مرغن آتولوک برانز ءِ ایسر کریر۔
مجلس نا میزبان وزیر قانود پارے کہ بیگواہ آ بندغ آتا خاہوت آتے خاص دعوت تننگا تاکہ سما تمے کہ کیس آتا نوعیت انت ءِ۔ اسلام آبادآن بیگواہ صحافی مدثر محمود نارو نا لمّہ ہم تینا مار ئنا بیگواہی نا بابت ئٹ مجلس ئٹی اوار مس۔
مجلس آن گڈ بنجائی وزیر قانود و انصاف سینیٹر اعظم نذیر تارڑ نا پاننگ ئس کہ ننا کوشست مرو کہ پین وختی زوراکی نا بیگواہی تاکیس آتیٹ کمبوتی برے و دا ناسور آن خلاصی رسینگے و ہرا بندغ آک بیگواہ مسنو اوفتے آجو کننگ مرے یا پاش کننگ مریر۔
ایلو نیمہ غان کوئٹہ ٹی وائس فار بلوچ مسنگ پرسنز نا بین برانزی کیمپ اینو 4761 می دے ہم برجاء ئس ہراڑے اواری نا درشانی کننگکن بروک آتون ماما قدیر بلوچ تران کریسہ پارے کہ پاکستان آ باور کننگ نا جاگہ غا اقوام متحدہ تینا مشن ءِ بلوچستان آ رادہ کے تاکہاوفتے تینٹ راستکی نا سما تمے۔
وائس فار بلوچ مسنگ پرسنز نا کمک کماش ماما قدیر بلوچ پارے کہ اقوام متحدہ ٹی زوراکی نا بیگواہی تا بر خلاف کیہی قرارداد آکپاس مسنو ہرافتا رد ئٹ زوراکی نا بیگواہی تا کاروائیک بندغی حق و قانود نا برخلاف اسہ بھلو ڈوہ ئسے۔
ماما قدیر بلوچ نا رد ئٹ 2001 آن ہلیس دا وخت اسکان ہزار آ بلوچ فرزند آتے پاکستانی ادارہ آک بازار، اُرا، مسافری اُلاخ و خواننگجاہ تیان ارفیسہ بیگواہ کرینو، ہرافتیٹ زالبول، چُنا و کماش ہم اوار ءُ۔
ماما قدیر بلوچ نا پاننگ ئس کہ اقوام متحدہ نا بندغی حق آتا ادارہ نا کمیشن پاکستان نا برخلاف ہچو عملی گام ارفتنے و بیرہافسوزی کننگ اسکان سلوک ءِ۔
اونا ودیک پاننگ ئس کہ اگہ داسا ہم اقوام متحدہ خن تے تر کریسہ پاکستان نا کنڈ آن تروکا دروغ آ معلومداری تیا باور کریسہپاکستان نا برخلاف عملی گام ارفتو تو داڑان پاکستان نا حوصلہ آک بڑز مرور و بلوچستان ئٹ بندغی حق آتا لتاڑ ئٹی ترندی ہتو ہراڑاناسہ بھلو بندغی نیستی اس ودی مننگ نا خلیس ارے و دا بندغی نیستی نا ذمہ وار اقوام متحدہ و بندغی حق آتا جہانی ادارہ آکمرور۔