اکتوبر نا بناء مننگ نا مطلب دادے کہ تیوہ غا جہان ئٹ اہم تکوک آ نوبیل داد آتا دیک بسنو۔ برجاء شش دے نا وخت ئٹ شش نوبیل دادتننگور، ہراڑے جہان سائنس دان، نوشتکار، معیشت دان و بندغی حق آتا راہشون تا پوسکنا دروشم تے خنو۔
برجاء سال نا نوبیل داد آک دو شمبے نا دے دارو درمان نا داد آن بناء مرور، ہراڑان گڈ ہڑدے دا داد آک تننگور۔ سئے شمبے آ فزکس، چارشمبے نا دے کیمسٹری و پنچ شمبے نا دے ادب نا نوبیل داد تننگو۔
برجاء سال امن نا نوبیل داد نا پڑو جمعہ آ کننگ مرو اندن معیشت نا پڑ آ گچین کاریم کروک آتے 10 اکتوبر آ داد تننگو۔
دا داد آتا باروٹ پنچ گواچن پوہ مبو:
نوبیل داد آتا بنماس ءِ دیر تخا؟
دارو درمان، فزکس، کیمسٹری، ادب و امن نا نوبیل داد آتے الفریڈ نوبیل نا پارت ئٹ بناء کننگا۔
الفریڈ نوبیل سوئیڈن نا شاری ئس اس او اسہ رئیس صنعت کار سے آن بیدس ڈائنامائٹ نا موجد ئس ہم مسنے۔
الفریڈ نوبیل نا کذیت نا پنچ سال آن گڈ اولی وار 1901 ئٹ دا داد آتے تننگ نا بناء مس۔
ہر داد اسہ کروڑ سوئیڈش کرونے یعنی کم و ود نو لکھ امریکی ڈالر نا برابر مریک۔
دا داد آک الفریڈ نوبیل نا برسی نا دے یعنی 10 دسمبر آ داد نا زر و اسہ گولڈ میڈل سیتون اوار کٹوک آتے تننگرہ۔
کٹوک آتا پِن و کٹنگ نا سوب آک دیر ءِ خبر مریرہ ؟
نوبیل داد نا راہبند آتا رد ئٹ داد نا فیصلہ ءِ کروک آ جج آک پنجاہ سال اسکان دا باروٹ کس تون ہیت کننگ کپسہ۔
داد نا پڑو آن مالو جج آک کٹوک آتا پِن تا ذکر ءِ کس تون کننگ کپسہ۔
اومیت وار آتا گچین کاری ءِ دیر کیک ؟
تیوہ غا جہان آن ہزار آ بندغ آک نوبیل داد کن اومیت وار تے گچین کننگ کیرہ۔
اوفتیٹ جامعہ تا پروفیسر، قانود ساز، مسکوہی نوبیل داد الوک آ بندغ آک و کمیٹی نا باسک آک ہم اوار ءُ۔
نوبیل راہبند نا رد ئٹ دا گچین کاری تے ہم پنجاہ سال اسکان ڈکوئی تمک۔
بھاز وار منہ بندغ اسہ اومیت وار سے گچین کننگ آن گڈ اونا پڑو ءِ ہم کیرہ۔
دا داد آتون ناروے نا انت تعلقداری ارے؟
امن نا نوبیل داد ناروے نا نیمہ غان تننگک اندن ایلو داد آک سوئیڈن نا نیمہ غان تننگرہ۔ دُن الفریڈ نوبیل نا است خواہی نا رد ئٹکننگک۔
داڑان بیدس دا سما اف کہ الفریڈ نوبیل انتئے دُن خواہسونے ولے اونا زند ئٹ سوئیڈن و ناروے اسہ یونین ئٹ اوار مسنو، ہرا 1905 ئٹایسر کننگاسس۔
نوبیل داد ءِ کٹنگ کن انت کروئی تمک ؟
حوال شینک کروک ادارہ (ایسوسی ایٹڈ پریس) نا رد ئٹ نوبیل داد ءِ کٹنگ کن کل آن اہم انگا گڑا صبر کننگ ءِ۔
اے پی نا رد ئٹ بھاز وخت سائنس دان تے نوبیل داد نا جج آتا کنڈ آن تینا کاریم تے پک کرفنگ ئٹ کہی سالک لگرہ۔
نوبیل داد نا جج آک دا گڑا نا خیال ءِ تخیرہ کہ ہر سائنسی کاریم وخت نا آزموندہ تیان گدرینگہ۔
الفریڈ نوبیل نا پارت ئس کہ دا داد آتے اندن انگا بندغ تے تننگ مرے ہرافتا کاریم تیان بندغی نا خذمت مسنے۔
بیرہ امن نا نوبیل داد ہمو بندغ تے رسینگک ہرا تدوکا سال عظیم ءُ کاریم ایسری تسنو۔