فزکس 2022 نا نوبیل داد ءِ مُسہ سائنس دان ءِ تننگ نا پڑو کننگا۔
کمیٹی دا وار امریکہ، فرانس و آسٹریا نا چاہندار تے داد ءِ تننگ نا پڑو کرینے۔ اندن تدوکا سال ہم طبیعیات نا داد مُسہ چاہندار ءِ تننگاسس۔
فزکس نوبیل داد امریکہ نا جان کلوزر، فرانس نا ایلئن اسپیکٹ و آسٹریا نا اینتون زلنگر ءِ اوفتا “کوانٹم ٹیکنالوجی و انفارمیشن” آ پٹ و پول کننگ نا سوب آن رسینگا۔
کمیٹی نا رد ئٹ ہر مُسہ چاہندار تا کنڈ آن “کوانٹم انفارمیشن ٹیکنالوجی” آ کروک پٹ و پول آن ٹیلی کمیونی کیشن، انٹرنیٹ و انفارمیشن ٹیکنالوجی نا دیمروئی ٹی کمک رسینگا۔
پن کروک چاہندار تا پٹ و پول تیان دا ہیت نا سماء تماسس کہ ذرہ غاک اگہ اسٹ ایلو آن یکہ مریر داڑان بیدس او اسٹ ایلو تون تفوک مریرہ و اوفتا نیام ئٹ حوالکاری تخنگ ہم مریک۔
اندافتا پٹ و پول تا سوب آن کمپیوٹر، موبائل و ٹیکنالوجی اوزار و سسٹم تیٹ پوسکنی و جوانی بس۔
نوبیل کمیٹی ہر مُسہ چاہندار تا خذمت آتے منیسہ اوفتے داد ہم تس۔