بلوچستان نا مُسہ ضلع لسبیلہ، کیچ و گوادر آن ڈینگی نا پین 62 کیس رپورٹ مسونو و دافتا پک کننگ آن گڈ ڈینگی نا کیس تا کچ 3 ہزار 841 مسونے۔
بلوچستان نا محمکہ جانجوڑی نا کنڈ آن شینک کروک کچ نا رد ئٹ تدوکا دے لسبیلہ آن ڈینگی نا 48، کیچ آن 2 و گوادر آن 12 کیس رپورٹ مسونو۔ دا وخت اسکان رپورٹ مروک آ کیس تا کچ 3 ہزار 841 مسونے۔
محکمہ جانجوڑی نا رد ئٹ ڈینگی آن زیمی مروک ناجوڑ آتا کل آن بھلا کچ ضلع کیچ آن 2 ہزار 966 کیس رپورٹ مسنے اندن گوادر ئٹ 430 و لسبیلہ ٹی 409 کیس رپورٹ مسنو۔
بلوچستان ئٹ ترند آ پر، سیلاب و مُد نا بدل مننگ آن گڈ جانجوڑی نا حالیت آک ترندی الکنو۔ پر تیان ودی مروک جتاء وڑ نا ناجوڑیک بلوچستان ءِ پلویڑ کرینو۔
پر و سیلاب آتیان بلوچستان نا غٹ 35 ضلع زیمی مسنو۔ پر و سیلاب آتیان سئے سد آن زیات بندغ آک بیران مسنو اندن او زیمی مروک علاقہ تیٹ ناجوڑیک دین ئنا دروشم ءِ الیسہ اسہ ہفتہ ٹی ڈینگی، است و پڈ، ملیریا، خنتا و سِل نا انفیکشن، دم ئنا ناجوڑی تون اوار کہی ناجوڑی تا کیس آک رپورٹ مسنو۔
حوال تا رد ئٹ محکمہ جانجوڑی نا پامداری تفننگ نا سوب آن ڈینگی نا ہڷ ترندی ئٹ تالان مسنے، محکمہ جانجوڑی دا ناجوڑی تے توننگ کن گام ارفتنے۔
بلوچستان ئٹ برجاء قدرتی آفت آتیان جانجوڑی نا مرکز آک بھس کاری نا گواچی ءُ ہرانا سوب آن وخت آ دارو درمان نا رسینگ ہم ڈکھیا مسنے۔
بلوچستان ئٹ پر و سیلاب آک تدوکا اسہ تُو نا وخت ئٹ 700 آن زیات جانجوڑی نا بنجاہ تے و رورل ہیلتھ سینٹر تے نسخان رسیفینو۔
محکمہ جانجوڑی نا تدوکا رپورٹ نا رد ئٹ سیلاب بلوچستان نا جتاء ضلع تیٹ بنیاتی جانجوڑی نا کہی ماڑی تے نسخان رسیفینے منہ ماڑی کاریم ئٹ ہتنگ نا لائخ افس ہرانا سوب آن بلوچستان نا سیلاب آن زیمی مروک 26 ضلع ٹی جانجوڑی نا خذمت آک ہم زیمی مسنو۔