بلوچ وومن فورم نا کنڈ آن ”مسن تا جہانی دے” نا رد ئٹ کوئٹہ پریس کلب ٹی دیوان اس اڈ تننگا۔
دیوان نا مہمان خاص نورین لہڑی، صابرہ اسلام، رخسانہ بلوچ، بی این پی نا راہشون شمائلہ اسمائیل، ہارڈ بلوچستان آن زیا بلوچ، بانک مہلب نصیر، بساک نا سی سی باسک ڈاکٹر سمعیہ بلوچ، وی بی ایم پی نا نصراللہ و ایڈووکیٹ حسن مینگل زالبول تا جتاء ویل آتا باروٹ تینا خیال آتا درشانی کریر۔
بلوچ وومن فورم نا آرگنائزر زین گل بلوچ پارے کہ زالبول آک چاگڑد نا نیمہ بشخ ئٹ اوار ءُ ولے اوفتا ذہنی لائخیک مُتکن آ دود آتا و مذہبی انتہا پسندی نا گواچی مننگ ءُ۔
او بلوچستان نا سیاست نا ذکر ءِ کریسہ پارے کہ وخت نا گرج دادے کہ بلوچ راج تینا سیاست ءِ ذاتی مفاد آن کشیسہ راجی دیمروئی کن سیاست کے۔ شخصیت پرستی نا سیاست آن پیشتمسہ سیاست ءِ راجی بابت ئٹ سوگو و میرٹ آ ہتنگ نا گرج ءِ تاکن لیڈرشپ حقدار تے رسینگہ۔
دیوان ئٹ خواننگ نا اہمیت آ چناک ٹیبلو شان تسر و امبر بلوچ نا موٹیویشنل انٹرویو ہم نشان تننگا ہرا دشت بلنگور آن تعلقداری تخک۔
مہلب نصیر نا ویڈیو کلہو ہم مونا ہتنگا ہراٹی او بلوچ مسن تا ویل آتا باروٹ ہیت کریسہ پارے کہ لُمہ باوہ غاک تینا چنا تے بِنر تاکن او خودکشی نا پارہ غا ہننگ کپس۔ او مسنتے پامدار کریسہ پارے کہ اوفتے خوش مروئی ءِ انتئے کہ اوفتے کن اسہ زیبدار ءُ دے ئس گچین کننگانے۔
دیوان ئٹ زیا بلوچ چائلڈ پروٹیکشن نا باروٹ پارے کہ ننا چناک بیگواہ بندغ تا کیمپ آتیٹ تولوک ءُ اوفتا بروک آ وخت ءِ نن امر ہرینہ۔ او پارے کہ بد بختی آن چائلڈ میرج آ داسکان ہچو قانود سازی ئس متنے۔
صابرہ اسلام پارے کہ بلوچ چاگڑد ئٹ اسُل ہراسمنٹ نا خیال متنے داڑے مابت نا کسہ غاک اریر ولے دا وڑ ظلم، بے دادی و زیاتی بلوچ چاگڑد ئٹ اسُل متنے۔ داسا خوانوک جاگہ و دفتر آتیٹ ہراسمنٹ نا تدینی تے کارپٹ نا کیرغ آن ڈھکینگک۔ او پارے کہ گام گام آ ننا چنا تے خُلیفوک آ تدینیک مونا بننگ ءُ۔
بلوچ اسٹوڈنٹس ایکشن کمیٹی نا سی سی باسک ڈاکٹر سمعیہ پارے کہ بلوچستان ئٹ Retained placenta نا سوب آن زالبول آک مرگ نا گواچی مننگ ءُ بیست و یکمی سدی ٹی ننا زالبول آک چنکو دارو درمان ئسے آن نیست ءُ ہرا بیرہ پنچ منٹ نا انجیکشن ئسے آن ایسر مریک۔ او ودیک پارے کہ چاغی راسکوہ خاران دا علاقہ تیٹ 1998 ئٹ نیو کلیئر آزموندہ آن گڈ الٹرا وایلیٹ ریڈی ایشنز نا سوب آن نہ بیرہ زالبول بلکن نرینہ آک ہم کینسر و وے دارو درمان آ ناجوڑی تا گواچی ءُ۔
رخسانہ بلوچ پارے کہ زالبول آک داسکان انفرادی وڑ ئٹ تینا پجار ءِ جوڑ کننگ ئٹ سرسہب متنو۔ او تینا ایلم باوہ یا قبیلہ نا پن ئٹ تینا سفت ءِ کرفرہ۔ زالبول ءِ ٹک خلوئی تمو کہ اگہ اودے بلوچ چاگڑد نا دیمروئی ٹی کڑد ایسری تروئی ءِ گڑا اودے تینا جند تون اوار تینا فیلڈ ئٹ ہم تینکن ہند جوڑ کروئی تمو۔
نصراللہ بلوچ تران کریسہ پارے کہ بلوچستان نا کہی خاہوت آتا سروک آک زوراکی ئٹ بیگواہ کننگانو ہرا نا سوب آن بلوچ مسنک خواننگ نا حق آن مُر ءُ۔
دیوان ئٹ ایڈووکیٹ حسن مینگل ہم تینا خیال تا درشانی کریسہ زالبول تا جہد ءِ سفت کرے۔
بی این پی نا راہشون شمائلہ اسمائیل تینا خیال تا درشانی کریسہ پارے کہ پارلیمنٹ ئٹ زالبول تا کچ بھاز کم ءِ قانود سازی ٹی ہم زالبول تا ہچو کڑد ئس اف۔ او پارے کہ زالبول تا کوٹہ ودفنگ مرے و برابری کن قانود سازی نا گرج ءِ۔
پروگرام نا مہمان خاص بانک نورین لہڑی پارے کہ ننے گمان مریک کہ خواننگ و ایلو شعبہ تیٹ دیمروئی مننگ ءِ ولے گواچن داڑان چپ ءِ، کوئٹہ بلوچستان نا بنجائی شار ءِ ولے داڑے ہم خواننگ و جانجوڑی نا ویل آک اریر۔
او پارے کہ ننا تعلیمی نظام پولیٹیسائز مسنے، جہان ئٹ کل آن کم خوانوک آ کچ بلوچستان ئٹ مسنتا خواننگ ءِ۔ پاکستان نا آئین نا آرٹیکل 25 اے ئٹ شش سال آن ہژدہ سالی چنا نا خواننگ نا ذمہ واری ریاست آٹے ولے بد بختی آن او تینا ذمہ واری ءِ پورو کپک۔