بلوچستان نا ضلع کیچ نا تحصیل بلیدہ ٹی ہفتہ نا نن اسہ اسکول ئسے خاخر تننگانے۔
شابیتی حوال تا رد ئٹ نادرست بندغ آک تحصیل بلیدہ نا یونین کونسل الندور ٹی ٹہیفوک اسٹ انگا پرائیوٹ اسکول کلکشان ءِ ہشیسہ بھس کریر۔
علاقہ نا بندغ آک تدینی آ رد عمل تریسہ پاریر کہ بست و بند نا بے سہبی نا سوب آن سلاء بند ٹولیک سوگو مننگ ءُ و داڑے ایف سی ڈوہ کروک بندغ آتے کاریم ئٹ ہتیک تاکن خُلیس نا ماحول برجاء مرے۔
یاتی مرے تدوکا سال الندور ئٹ سرکاری اسکول نا منہ کمرہ ءِ خاخر تننگا و کلی بلیدہ ٹی اسہ اسکول ساچ ءِ ہم خاخر تننگاسس۔
داڑان بیدس ضلع پنجگور و کیچ ئٹ پرائیوٹ اسکول آتیا جلہو و خاخر تروک آ تدینیک مونا بسنو۔
ہنوک آ وخت ئٹ پنجگور ٹی پرائیوٹ اسکول تے بیدس پنی آ تنظیم “الفرقان اسلامی” نا پن ئٹ تڑی تننگاسس کہ لُمہ باوہ غاک تینا چنا تے سرکاری اسکول تیٹ خوانفر۔
تدینی آن گڈ لُمہ باوہ غاک دا خُلیس نا درشانی کرینو کہ ننے تینا چنا تا بروک آ وخت نا گڑتی ءِ۔
اوفک ضلعی بست و بند آن تدینی ٹی اوار مروک ڈوہدار تا دزگیری نا ہم خواست کرینو۔