بلوچستان نا دریابی شار گوادر ٹی مُسہ دے مالو پکنک نا وخت آ مَش آن مِش ڈھرنگ نا سوب آن کڈ مروک ورنا ءِ داسکان کشنگ کتوس۔
شابیتی حوال تا ردئٹ گوادر ٹی مسہ دے مالو پنچ ورنا پکنک کِن گوادر نا دریابی شار ٹی سمندر با رہا مروک خاص پکنک پوائنٹ دران ہِنار۔ ہراڑے ورنا سمندر آن مچھی نا شکار کننگ ئس کہ ناگمان آ اوڑا مَش آن مِش تما و چار ورنا کڈ مسُر۔
علاقائی حوال تا ردئٹ مُسہ دے گدرینگ آن گُڈ ہم او مشینری گِڑا رسینگتوس ہرا دا مِش تا شیف آن چار ورنا نا جون تے کشیر۔
حوال تروکا تا پاننگ ئس کہ اسہ پرائیویٹ کمپنی سے نا مشینری تینا وَس نا کچ کاریم کننگ ءُ ولے سرکار تون دا بلّا ضلع ٹی چار ورنا تا جون تے کشنگ کِن مشینری اف۔
یاتی مرے کہ یک شمبے نا نن جیونی نا دریابی علاقہ ٹی پکنک کننگ و مچھی نا شکار کننگ نا وخت مَش آب مِش ڈھرنگ آن اسہ چُنا تون اوار شش بندغ کڈ مسوسر، شکست آن گُڈ اسہ چُنا نا جون ءِ مِش تیان کشاسُر۔