زوراکی نا بیگواہی تا بر خلاف اینو وڈھ ئٹ بیگواہ بندغ تا خاہوت آتا کنڈ آن اسہ برانز ئس اڈ تننگا ہرا ٹی خوانندہ تیان بیدس سیاسی و چاگڑدی راہشون و جتا تپہ نا بندغ آک اوار مسر۔
برانز ئٹ ساڑی بندغ آک دو تیٹ پلے کارڈ ارفیسر و بیگواہ بندغ تا یلہ مننگ کن نعرہ خلکر۔
برانز نا کال ضلع خضدار نا تحصیل وڈھ آن پاکستانی لشکر نا دو آن زوراکی ئٹ بیگواہ مروک محمد انور مینگل، محمد عالم لہڑی و عبدالحق نا خاہوت آتا کنڈ آن تننگاسس اندن دا وخت خضدار آ بیگواہ ثاقب زہری نا لُمہ و بیگواہ آصف و رشید نا ہیڑ تون اوار ایلو بیگواہ بندغ تا خاہوت آک ہم اوار مسر۔
برانزیک وڈھ انٹر کالج آن پریس کلب اسکان دپدرشانی کریسہ تینا برانز ءِ ریکارڈ کرفیر۔
دا وخت آ تران کریسہ برانزی تا پاننگ ئس کہ بلوچستان نا ڈیہہ آن زوراکی نا بیگواہی تا ہرا لڑ ءِ خضدار نا ضلع داڑان ساندہ زیمی مسنے، ہڑدے ننا بندغ تے جتا علاقہ تیان بیگواہ کننگک اندن دا وخت ئٹ ہم وڈھ نا ایب کیب آن کہی بندغ آک بیگواہ کننگانو و داڑان مُست درزن آ بندغ آک مالو آن بیگواہ ءُ۔
برانز ئٹ اوار وڈھ نا ہندی بیگواہ محمد عالم لہڑی نا خاہوت پارے کہ محمد عالم لہڑی ءِ اوتھل زیروپوائنٹ آن 7 دسمبر 2012 آ اسہ مزدا ٹرک ئسے آن دڑفیسہ بیگواہ کننگا، محمد عالم لہڑی نا سنگت پارے کہ بیگواہ کروک آک اسہ سرف اُلاخ اسیٹ بسوسر و سرکاری پُچ بینوک اسر۔
اوفک پاریر کہ محمد عالم لہڑی نا یلہ مفننگ نا سوب اُرا نا غٹ بندغ آک نفسیاتی ناجوڑ مسنو اندن پن کروک بندغ نا ہیڑ و لُمہ تون اوار خاہوت نا مُسہ بندغ کراچی نا اسہ اسپتال اسیٹ دارو درمان نا حالیت ئٹی ءُ۔ بیگواہ محمد عالم نا باوہ نا پاننگ ءِ کہ دئے سال نا بھلا وخت گدرینگ آن گڈ ہم تینا مڷ ئنا حالیت آن بے سما در در نا دڑد آتے سگنگ آ بیوس اُٹ۔
برانز ئٹ نوشکی آن چار سال مالو زوراکی ئٹ بیگواہی نا گواچی آصف و رشید نا ہیڑ سائرہ ہم اوار ئس ہرا برانز نا سروکی ءِ کرے۔
سائرہ بلوچ برانزی تون ہیت کریسہ پارے کہ نن ہر ہمو جاگہ آ ہنیسہ تینا دوستخواہ تا یلہ مننگ کن برانز کینہ ہراکان اسہ اومیت ئس مرے ولے اینو اسکان ننے ہچو گام ئس نظر بتنے اندن ننا بیگواہ بندغ تے یلہ کننگ نا جاگہ آ گیشتر بندغ تے بیگواہ کننگک۔
برانزیک اختیاردار و بندغی حق آتا باسک آتیان بلوچستان ئٹ زوراکی نا بیگواہی تے توننگ و بیگواہ بندغ تا یلہ کننگ نا خواست کریر۔
برانزی تا ودیک پاننگ ئس کہ داڑان مالو بیگواہ بندغ تا خاہوت آک کوئٹہ ریڈ زون نا مونا پنجاہ دے اسکان تینا دوستخواہ تا یلہ مننگ کن پر امن تولوک برانز کرین، نن تینا تولوک برانز ءِ حکومتی بنجائی کمیٹی نا باوری کننگ آ ایسر کرین کہ ننا بندغ تے یلہ کننگو، اینو دا گپ و تران ءِ اسہ تُو ئسے آن زیات وخت مسنے ولے داسکان ننے ننا بندغ تا باروٹ ہچو خیر ءُ حوال ئس رسینگتنے۔