بلوچستان نا علاقہ بولان نا مش تا لڑ ئٹی پاکستان نا لشکر نا کنڈ آن بھلو کچ اسیٹ آپریشن برجاء ءِ۔
تدوکا دے بناء مروک آپریشن ئٹی اینو پین ترندی ہتنگانے، جتا ہند آتیا گن شپ ہیلی کاپٹر آک بال کریسہ شیلنگ کننگ ءُ و دا وختا فورسز و سلاء بند بندغ آتا نیام ئٹ جھڑپ آتا ہم حوال رسینگانے، ولے دا بابت ئٹ داسکان پین شابیتی حوال بننگ ءِ۔
فوجی آپریشن بولان نا علاقہ کمان، یخو، اوچ کمان، گمبدی، درگ پیرانی، سارو، بزگر و سبی نا علاقہ سانگان ئٹی برجاء ءِ و ہرنائی نا خڑک ئنا مشی آ لڑ تیٹ ہم فوج مُستی گام خلنگ ءِ۔
حوال تا رد ئٹ اوچ کمان ئٹی ہیلی کاپٹر آک شیلنگ کننگ آ خننگانو و تراک آتا توار ہم بننگ مسنے ہراڑے لس مخلوق ءِ فوج ئنا کنڈ آن ٹک کننگ نا خلیس نا درشانی مننگ ءِ۔
بولان و ایب کیب ئٹ آپریشن اندنو وخت ئسے آ بناء کننگانے ہرا وخت بلوچ لبریشن آرمی تدوکا دے تیٹ دزگیر کروک اِرا پاکستانی سیکیورٹی کارندہ آتے یلہ کننگ نا بدل ئٹی تینا خواست آتیکن 4 نومبر اسکان نا وخت تسنے۔
یاتی مرے کہ 25 ستمبر 2022 نا نن ہرنائی نا علاقہ زردآلو نا ہند آ سلاء بند بندغ آک بنجائی کسر ءِ بند کریسہ اُلاخ آتے پٹاسر و چاہنداری مننگ آن گڈ اِرا بندغ ءِ دزگیر کریسہ تینتو دریسر و سلاء بند بندغ آک کوئلہ دروکو چھار لاری نا ٹائر آتے ہم بھس کریسر۔
پن کروک تدینی آن گڈ پاکستانی لشکر آپریشن بناء کرے ہراڑے آپریشن ئٹ بشخ ہلوک اِرٹ آن اسہ ہیلی کاپٹر ءِ سلاء بند بندغ آک بھس کریر ہرانا سوب آن پاکستانی لشکر نا شش کارندہ مرگ ئنا گواچی مسر۔ ہرا نا ذمہ واری ءِ بی ایل اے ہرفے۔
بلوچ لبریشن آرمی نا ترجمان جیئند بلوچ ولدا اسہ بیان ئسے ٹی سیاسی اسیر آتا یلہ کننگ نا بدل ئٹی اوفتا قیدی تے یلہ کننگ آ امنائی کریسس۔
تدوکا دے تیٹ بی ایل اے نا ترجمان میڈیا آ شنگ کروک اسہ پین بیان ئسے ٹی پاریسس کہ بی ایل اے پاکستانی لشکر ءِ جنگی قیدی تا تبادلہ کن پین اسہ ہفتہ سے نا وخت ایتک، ہراڑان گڈ بی ایل اے نا دزگیری ٹی جنگی قیدی جونیئر کمیشنڈ آفیسر کلیم اللہ و ملٹری انٹلجنس ایجنٹ محمد فیصل ءِ بلوچ قومی عدالت آن رسینگوکا سزا آ عمل کننگو۔
“بلوچ لبریشن آرمی تینا پنچ اکتوبر ۲۰۲۲ نا بیان ئٹ دا ہم پاش پاریسس کہ اگہ پاکستانی لشکر قیدی تے یلہ کننگ کن ہچو جارحیت کاریم ئٹ ہیس، تو بی ایل اے دا حق ءِ محفوظ تخک کہ تینا دفاع ٹی جنگی قیدی تا تبادلہ نا تینا دعوت ءِ پدی ہلے، و قیدی تا سزا آ زوت عمل کہ۔