برجاء سال 26 ستمبر آ سندھ نا بنجائی شار کراچی آن خوانندہ گلشاد بلوچ زوراکی ئٹ بیگواہ کننگاسس۔
کراچی لیاری نا ہندی گلشاد بلوچ ولد دلوش نا خاہوت و زوراکی نا بیگواہی تا بر خلاف کاریم کروک تنظیم وائس فار بلوچ مسنگ پرسنز میڈیا آ اونا زوراکی ئٹ بیگواہی نا باروٹ بیان اسیٹ پاریسس کہ او تینا اسہ سنگت سیتون اوار ملیر آن کراچی آ بننگ ئس ہموتم سی ٹی ڈی زور ئٹ کسر ءِ توریسہ اوفتے ارفے و تینتون اوار درے۔
گلشاد بلوچ نا زوراکی ئٹ بیگواہی نا بر خلاف سوشل میڈیا ایکٹوسٹ آک ہم چاگڑدی حوالکاری ویب سائٹ آ کمپئین کریسہ اونا یلہ مننگ نا خواست کریسر۔
واہم اینو اسہ تُوہ ئسے آن گڈ سی ٹی ڈی اونا دزگیری ءِ سندھ نا شار میر پور خاص آن پاش کریسہ پارینے کہ گلشاد ولد دلوش ہرا نا تعلقداری بی ایل اے آن ءِ اودے کُبین سلاء تون اوار دزگیر کننگانے۔
ایس ایچ او سی ٹی ڈی پارے کہ دوبہ دار نا بر خلاف ایف آئی آر درج کننگانے و اونا اسہ سنگت ئس نرانے۔
او دعوی کرینے کہ دوبہ دار میر پور خاص ئٹ اسہ کارروائی ئسے نا منصوبہ بندی کننگ ئس کہ اودے دزگیر کننگا۔
یاتی مرے بلوچستان ئٹ سی ٹی ڈی نا کاروائی تے راج دوست ٹولیک و بندغی حق آتا تنظیم آک مالو آن شکبر پارہ۔ راج دوست آتا رد ئٹ سی ٹی ڈی ہم پاکستانی ڈھکوک ایجنسی تا وڑ بندغ تا بیدس عدالت دزگیری تون اوار خون تیٹ ہم اوار ءِ۔
سی ٹی ڈی داڑان مالو ہم بلوچستان ئٹ زوراکی ئٹ بیگواہ مروک بندغ تے دروغ نا مونتس ئٹ خون کریسہ بسنے۔ تدوکا دے تیٹ کاؤنٹر ٹیررازم ڈیپارٹمنٹ (سی ٹی ڈی) نا اسہ کاروائی ئس دروغ پاننگانے ہراڑے مالو آن بیگواہ مروک چار بندغ ءِ نوشکی ٹی دروغ نا مونتس ئٹ خون کننگا۔
برجا منہ تُوہ تیٹ سی ٹی ڈی کہی بیگواہ بندغ تے مونا ہیسونے و اوفتا دزگیری ءِ پاش کریسہ اوفتیا دوبہ خلکنے۔