پنی آ براہوئی مٹ کار و نوشتکار خواجہ گل بنگلزئی کذیت کرینے۔
براہوئی بولی نا اولیکو ناول نگار و مٹ کار گل بنگلزئی دا کوڑی ءِ یلہ کریسہ رخصت مس اندن اونا گڈیکو نماز سبزل روڈ کوئٹہ ٹی مرو۔
گل بنگلزئی 20 اگست 1936 ٹی کوئٹہ شار آن خڑک خلق نوحصار ئٹ محمد سلیمان بنگلزئی نا اُرا ٹی ودی مسوسس۔ او بنائیخواننگ ءِ تینا خلق آن دوئی کرے مُستی خواننگ کن پنجاب آ ہنا ہراڑے او تینا میٹرک ءِ اسپیشل ہائی اسکول لاہور آن پوروْ کرے اندن اوبی اے و ایم اے نا امتحان تیٹ پنجاب یونیورسٹی آن سرسہبی دوئی کرے، داکان بیدس او جتاء جامعہ بلوچستان یونیورسٹی وبلوچستان یونیورسٹی اینڈ انجینئرنگ ٹیکنالوجی خضدار ئٹ امتحان تیٹ کنٹرولر نا وڑ کاریم ہم کرینے۔
گل بنگلزئی براہوئی ادب نا پڑ آ گام تخیسہ تینا اولی ناول “دریہوْ” ءِ نوشتہ کرے ہرادے براہوئی بولی ٹی اولی تخلیقی ناول نا پِن دوئی ءِاندن او براہوئی ترجمہ نا بنا ءِ آزات جمالدینی نا ماہتاک “بلوچی” آن کریسس۔
خواجہ گل بنگلزئی نا مٹ و نوشتہ کروک کم و ود بیست و شش کتاب ءُ ہرافتیان پنچ اونا جند نا نوشتہ ءُ ہرافتیٹ اِرا ناول (دریہوْ، روشپیش)، اسہ آزمانک (دڑد آتا گواچی) و اسہ زند نوشت ئس (پد ئنا ارمان) اوار ءِ۔ داکان بیدس او کہی کتاب تے براہوئی ٹی مٹ ہم کرینےہرافتیٹ خلیل جبران نا ناول “پوشکن آ پن آک“، پاؤلو کوئلو نا ناول “الکیمسٹ“، میکسم گورکی نا ناول “لُمہ” اوار ءُ۔ اندن او کارلمارکس نا زائیفہ نا چٹھی تے ہم براہوئی ٹی مٹ کرینے۔