پسنی ٹی جمعہ نا نن اسہ اسکول ئسے خاخر تننگا۔
شابیتی حوال تا رد ئٹ نادرست بندغ آک بلوچستان نا علاقہ پسنی ٹی ریک پشت وڈسر نا چنا تا اسکول ءِ خاخر تریسہ بھس کریر۔
تدینی نا سوب آک داسکان سماء تمتنو واہم ہندی بندغ آک ضلعی بست و بند آن تدینی نا نوٹس ہلنگ و چناتا اسکول ءِ زوت بحال کننگ نا خواست کرینو۔
پسنی ریک پشت نا ہندی تا پاننگ ئس کہ دا اولی وار اف کہ اسکول تے ٹک کریسہ ہشنگانے، دا لڑ بلوچستان ئٹ سال آتیان برجا ءِ۔
یاتی مرے منہ دے نادرست بندغ آک بلوچستان نا ضلع کیچ نا تحصیل بلیدہ الندور ئٹ ٹہیفوک اسٹ آ پرائیوٹ اسکول کلکشان ءِ ہشاسر برجاء سال بلوچستان ئٹ اسکول تے ہشوک آ کہی تدینیک مونا بسنو۔
اندا سال الندور ئٹ سرکاری اسکول نا منہ کمرہ ءِ خاخر تننگا و گلی بلیدہ ٹی اسہ اسکول ساچ ءِ ہم خاخر تننگاسس اندن ہنوک آ وخت ئٹ ضلع پنجگور و کیچ ئٹی پرائیوٹ اسکول آتیا جلہو و خاخر تروک آ تدینیک مونا بسنو۔
ہنوک آ وخت ئٹ پنجگور ٹی پرائیوٹ اسکول تے اسہ تنظیم ‘الفرقان اسلامی’ نا پن ئٹ تڑی تننگاسس کہ لُمہ باوہ غاک تینا چنا تے سرکاری اسکول ئٹ خوانفر۔
علاقہ نا بندغ آک تدینی آ ردعمل تریسہ پاریسر کہ بست و بند نا بےسہبی نا سوب آن سلاء بند ٹولیک سوگو مننگ ءُ و ایف سی داڑے ڈوہدار بندغ تے کاریم ئٹ ہتنگ ءِ تاکن خُلیس نا ماحول ئس جوڑ مرے۔
اوفک ضلعی بست و بند آن تدینی ٹی اوار انگا ڈوہدار تے دزگیر کننگ نا خواست ہم کرینو۔