بلوچستان نا ضلع خضدار آن پاکستانی لشکر اِرا بندغ ءِ دزگیر کننگ آن گڈ نادرست جاگہ آ سر کرینے۔
حوال تا رد ئٹ پاکستانی لشکر اِرا ورنا عبدالمنان ولد محمد موسٰی و سرفراز ولد نیاز ہند نوغے خضدار ءِ زوراکی ئٹ بیگواہ کرینے۔
ورنا تا زوراکی ئٹ بیگواہی تا تدینی تدوکا تُوہ 30 اکتوبر آ فٹبال میچ آن بننگ وخت آ خضدار فیروز آباد ئٹ مونا بسنے، ہڑتوم آ ورناک میڈیکل اسٹور آ کاریم کریرہ۔
بلوچستان آن زوراکی نا بیگواہی تا لڑ چرجوئی ئٹ برجاء ءِ، برجاء ہفتہ ٹی پاکستانی لشکر نا دو آن قلات، پنجگور، بولان تون اوار جتاء علاقہ تیان زوراکی نا بیگواہی تا 9 کیس رپورٹ مسنو۔
تدوکا دے تیٹ قلات خزینئی نا علاقہ ٹی پاکستانی لشکر آپریشن نا بناء کرے و ہندی بندغ تے بے دادی نا گواچی کریسہ اِرا بندغ خالق داد و عبدالحکیم ءِ دزگیر کریسہ نادرست جاگہ آ سر کریسس، اندن قلات شیخ حاجی آن کلیم اللہ ولد علی گل مینگل ءِ ہم دزگیر کننگ آن گڈ بیگواہ کریسس۔
اندا وڑ اِرا دے مالو پنجگور گچک نا علاقہ لوہڑی ٹی پاکستانی لشکر اُرا تیا چھاپہ نا وخت زالبول و چنا تے بے دادی نا گواچی کننگ آن گڈ ایاز ولد مبارک بلوچ پنی ءُ ورنا ئسے بیگواہ کریسس۔
برجاء ہفتہ زوراکی نا بیگواہی تا اسہ پین تدینی اسیٹ اِرا اُلاخ ئٹ سوار سلاء بند بندغ آک توفک نا زور آ مُسہ بندغ مغل ولد محمد ہند شہرک، امید ولد چار شمبے، رستم ولد نظر ہند بالگتر ءِ برمتہ کریسہ تینتون اوار دریسر ہرا داسکان پاش کننگتنو۔
بلوچ نیشنل موومنٹ نا رپورٹ نا رد ئٹ تدوکا تُوہ اکتوبر ٹی پاکستانی لشکر نا دو آن 38 بندغ زوراکی ئٹ بیگواہ کننگانو اندن پولیس زوراکی ئٹ بیگواہ مروک 14 بندغ ءِ دروغ نا مونتس ئٹ خون کرینے۔
ایلو پارہ غا بلوچستان ئٹ زوراکی نا بیگواہی تا بر خلاف برانز تا لڑ تدوکا کہی سال تیان برجاء ءِ بلوچستان نا سیاسی تنظیم آک زوراکی نا بیگواہی تا لڑ ءِ توننگ و بیگواہ بندغ تے مونا ہتنگ نا خواست کننگ ءُ۔