خواست آتا مننگ کن بلوچستان فزیوتھراپی ایسوسی ایشن نا 150 دے اسکان علامتی بین ہڑتال و اوکان گڈ داسا ایسری ساہ اسکان بین ہڑتال نا پڑو کریے۔
بلوچستان فزیوتھراپی ایسوسی ایشن تینا شینک کروکا بیان ٹی پارے کہ تدوکا پنج تو ئنا سے تینا پنج جائز و آئینی خواست آتا حق اکن کوئٹہ پریس کلب نا مونا علامتی بین ہڑتال کیمپ خلیسہ تسوسن ولے حکومت بلوچستان و چیف ایگزیکٹیو بلوچستان نا بے پامی و بے زمہ وارانہ رویہ ءِ ئسے وڑ تخانے لس مخلوق نا ویل آتے گٹو کریسہ ہر وخت ئنا وڑ تینا جند ئنا استخوئی و مفاد آتے پامداری تننگ خیلس نا ہیت ئسے۔
او پاریر کہ وزیراعلیٰ بلوچستان تون مذاکرات مس ہرا ٹی ننا تیوہ آ خواست آتے جائز پاریسہ منار و نوٹیفکیشن شینک کننگ نا وعدہ کریر ولے حکومت بلوچستان ننا ویل آتے ایسر کننگ نا جاگہ آ تینا طاغت نا زور آ ننے آ لٹ و کٹ، کیرینگ تننگ و بےسہب دفعات خلیسہ 10 دے اسکان ننے جیل ٹی تخار۔
بیان ٹی پاننگا کہ چیف ایگزیکٹو بلوچستان عبدالقدوس بزنجو تون مذاکرات ءِ اینو 25 دے گدرینگانے ولے ننا نوٹیفکیشن ءِ شینگ کتنو،حکومت نا دا بے پامی رویہ ءِ اریسہ نن تیان ایسری ساہ اسکان بین ہڑتال آ تولینگ نا پڑو کرینون ولے بھاز است اسونی ئٹ پاروئی تمیک کہ ننا مسہ سنگت بیست و چار گھنٹہ اسکا سہب شام ترند آ پر و یخ ئٹی بینگون تولوک ء۔
ولے حکومت نا پارہ غان ہچ ء پامداری نا گام خننگ افن نن حکومت بلوچستان و وزیراعلیٰ بلوچستان آن زورٹ خواست کینا کہ زوت آن زوت ننا جائز خواست آتے منیر اللہ کپ کہ ننا سنگت آتے گڑاس مرے اونا ذمہ وار حکومت بلوچستان و وزیراعلیٰ بلوچستان مرور۔