- سندھ نا بنجائی شار کراچی ٹی قانود ٹہیفوک ادارہ غاک دعوی کرینو کہ کراچی نا علاقہ سرجن فیض محمد خان روڈ آن خڑک کورنگی ٹریفک لائسنس برانچ مہران ٹاؤن ئٹ کارروائی کریسہ سندھی راج دوست سلاء بند تنظیم سندھو دیش ریوولوشنری آرمی نا باسک ئسے دزگیر کننگانے۔
کاؤنٹر ٹیررازم ڈیپارٹمنٹ ئنا بیان نا رد ئٹ سی ٹی ڈی کارروائی نا وخت کالعدم تنظیم ایس آر اے نا اہم باسک رستم علی شیر ولد محمد عثمان ءِ سلاء تون اوار دزگیر کننگا۔
سی ٹی ڈی ترجمان نا رد ئٹ سر و سوج نا وخت دوبہ دار منا کہ اونا تعلقداری کالعدم تنظیم ایس آر اے آن ءِ تنظیم نا سروک ذوالفقار خاصخیلی ءِ ہرا جرمنی ٹی ءِ دوبہ دار تنظیم نا ماسٹر مائنڈ ءِ و ذوالفقار خاصخیلی تون سگنل ایپ و ٹیلی گرام نا کمک ئٹ حال حوال کریسہ ٹارگٹ نا کاریم ہلیسہ کریکہ۔
سی ٹی ڈی نا انچارج ایس ایس پی مظہر مشوانی پارے کہ دزگیر دوبہ دار تنظیم نا ایلو سنگت آتے مالی کمک، سلاء، تراکی مواد و آسراتی رسیفک، دوبہ دار نا بر خلاف کراچی و سندھ نا تہٹی درزن آ خونک و ریلوے ٹریک تراک آتا آیف آئی آر درج ءِ۔
کاؤنٹر ٹیررازم ڈیپارٹمنٹ دعویٰ کرینے کہ دزگیر دوبہ دار آن پسٹل 30 تون اوار 5 راؤنڈ خنیسہ کیس درج کننگانے دوبہ دار آن گیشتر سر و سوج برجاء ءِ ہراڑان ودیک کاریم تا مننگ نا گمان ارے۔