بلوچستان ٹی زوراکی ئٹ بیگواہی تا لڑ برجاء ءِ۔ اسہ ہفتہ نا نیام ئٹ ہفت ورنا زوراکی ئٹ بیگواہ کننگار۔ پوسکنا حوال آتا ردئٹ بلوچستان نا ضلع خضدار آن مُسہ ورنا بیگواہ کننگانو ۔
ٹی بی پی ءِ رسینگوک حوال تا ردئٹ خضدار سول کالونی آن اِرا دے مالو پاکستانی فورسز کارندہ آک مُسہ ورنا عاصم مجید، سکندر و آصف ءِ زوراکی ئٹ بیگواہ کریر ۔
پِن کروک ورناک خضدار نا علاقہ اسد آباد نا رہینگوک ءُ اندن شاپنگ سینٹر آ کاریم کروک روزگار تون تفوک ءُ۔
زوراکی ئٹ بیگواہی آن گُڈ دائسکان اوفتا بابت اسہ وڑ ئنا حوال ہ رسینگتنے۔ دا رِدئٹ ضلعی کوالخواہ تا ہیت ہم مونا بتنے ۔
یاتی مرے کہ بلوچستان ٹی اسہ ہفتہ نا نیام ئٹ زوراکی ئٹ بیگواہی تا ہفت تدینی رپورٹ مسُنو داکان مالو کوئٹہ آن چار خوانندہ ءِ پاکستانی فورسز کارندہ آک بیگواہ کریسُر ہرانا پَک اونا خاہوت کریسس ۔
اوکان گُڈ پِن کروک ورنا تا خاہوت کوالخواہ نا پارہ آن ایف آئی آر نوشتہ نہ کننگ نا ہم شکایت کننگاسس ۔
کوئٹہ آن بیگواہ کروک ورناتیٹ مُسٹ آجو کننگار ولے اسہ خوانندہ وحید سخی سکنہ آبسر ، تربت دائسکان بیگواہ ءِ ۔ ذرائع تا ردئٹ وحید سخی میٹرک نا خوانندہ ئسے و تیاری نا رِدئٹ کوئٹہ ٹی ئس کہ اودے بیگواہ کننگا ۔