بلوچ سیاست نا سد سالہ پند
نوشت : کمبر بلوچ
دی بلوچستان پوسٹ
بیستمیکو کرن نا ارٹمیکو دہائی ٹی ہرا وخت میر عبدالعزیز کرد بلوچ سیاست نا بناء ءِ کرے تو ہمو وخت آ انگریز آتا برخلاف مری کیھتران نا جنگ ایسر مسوسس۔
بلوچ قوم ہر دور ئٹی پیشن نا کوزہ گیر و جلہو کروکا تون مزاہمت ءِ وخت نا المی ءُ گُرج ئس سرپند مریسہ مزاہمت نا بیرک ءِ بڑزا کرینے۔ مہرگڑھ آن الیس فرنگی اسکان و انگریز آن الیس اینو اسکان بلوچ قوم تینا مزاہمت ءِ برجاء تخانے۔ اینو ہم دشمن تون سینہ تریسہ تینا ڈغار نا حق ءِ ادا کننگ ءُ۔
بیستمیکو کرن نا اولیکو دہائی ٹی سیاسی شعور نا کمبوتی و مزاہمت نا وے مننگ نا سوب آن پیشن نا کوزہ گیری زیات وخت برجاء سلیس۔ دن ہم مننگ کیک کہ ننا پیرہ غاتا اندا کڑد ئنا سوب آن بلوچستان اینو ہم کوزہ گیر آتا پلویڑ ئٹی ءِ۔
بیستمیکو کرن نا ارٹمیکو دہائی نا اولی سال اٹ (1920) عبدالعزیز کرد تینا خوانندہ سنگت آتون اوار ”ینگ بلوچ“ نا پن اٹ خوانندہ گَل اس جوڑ کرے۔ اندا گَل بلوچ سیاسی دیہاڑ (تاریخ) نا ردوم نا بنداؤ نا سوب جوڑ مس۔ نُو سال نا ڈکنگ آن گُڈ 1920 ئٹی میر یوسف عزیز مگسی نا کماشی ٹی ”انجمن اتحاد بلوچاں“ نا دروشم اٹ اسہ سرجم ءُ پارٹی اس جوڑ کننگ ئٹی سرسہب مسر۔
انجمن اتحاد بلوچاں نا پارہ غان اولیکو وار آل انڈیا بلوچ کانفرنس اس ہڈ ہلک، ہرانا کماشی ءِ خیرپور نا میر علی نواز خان تالپور کرے۔ دا بھلا کانفرنس 27 دسمبر آن الیس تے 29 دسمبر 1932 اسکان برجاء سلیس۔ انجمن نا مسخت بلوچ قوم اٹ سیوتی ودی کننگ و سیالی نا روتہ غاتے زندہ تخنگ کن گڑاس خواست مونا ہتنگ ئس۔
1۔ ایف سی آر نا ایسری
2۔ بلوچستان اٹ اسہ عبوری او راہبندی حکومت ئسے نا جوڑشت
3۔ بلوچستان اٹ کارخانہ غاتا بنداؤ تخنگ
4۔ بلوچستان اٹ اعلٰی تعلیم دوئی کننگ کن ادارہ جوڑ کننگ
5۔ بلوچ آتے سیوت کن ایلو علاقہ غاتے اوار کننگ۔
ارٹمیکو آل انڈیا بلوچ کانفرنس دسمبر 1933 اٹ ہڈ ہلک۔ اندا کانفرنس اٹ تدیکو کانفرنس نا مطالبہ غاتتون امنائی کریسہ اندا پاننگا کہ بلوچستان اٹ قانودی و راہبندی بنیات آ اسہ دمدستی ءُ حکومت اس جوڑ کننگ ءِ۔
جنوری 1934 اٹ انجمن اتحاد بلوچاں نا جنرل سیکریٹری عبدالعزیز کرد ءِ دزگیر کننگا۔ حالیت آتا سخت مننگ نا سوب آن میر یوسف عزیز مگسی سال اس برطانیہ ٹی پردیس نا زند گدریفے۔
تینا وطن آ واپس بننگ آن گُڈ آجوئی کن سلاء بند جہد نا امنائی ءِ کرسہ جہد برجاء تخا۔
1935 نا شال نا زمی جم اٹ میر یوسف عزیز مگسی کزیت کرے۔ کزیت آن مُست انجمن ءِ انقلابی پِڑ آ شون تننگ اٹ اختہ ئس۔
یوسف عزیز مگسی نا زمی جم اٹ کزیت و عبدالعزیز کرد نا جیل اٹ قیذ و بند نا سوب آن انجمن نزور مرسہ ونڈ مننگ نا گواچی مس۔ عبدالعزیز کرد نا جیل آن آجو مننگ آن گُڈ دوارہ انجمن ءِ شون تننگ کن کوشست برجاء کرے۔ 5 فروری 1937 اٹ تنظیم نا بنجائی دیوان ءِ ہد تس۔ اندا دیوان اٹ انجمن اتحاد بلوچاں ءِ ایسر کریسہ قلات اسٹیٹ نیشنل پارٹی نا بنداؤ ءِ تخا۔
قلات اسٹیٹ نیشنل پارٹی بلوچستان اٹ برطانیہ راج ئنا کوزہ گیری، سرداری نظام نا برخلاف جہد ءِ برجاء کرے۔ اصلاحات آتیکن عملی ءُ کاریم کرے۔ پارٹی ءِ سوگو کننگ و پارٹی نا کلہو ءِ مچا بلوچستان اٹ تالان کننگ کن جہد برجاء کرے۔ بلوچ قوم نظریہ ءِ شون تننگ نا سوب آن پارٹی بلوچ الس اٹ تالان مس۔
سردار و خان قلات برطانیہ نا کمک ءِ دوئی کننگ و تینا قبائلی دروشم ءِ زندہ تخنگ کن سیوت اٹ قلات اسٹیٹ نیشنل پارٹی نا بَد اٹ مسور۔ 6 جولائی 1939 اٹ مستونگ اٹ پارٹی نا سالانہ دیوان آ جلہو کرسہ دیوان ءِ تتربتر کریر۔ خان آف قلات میر احمد یار خان برطانیہ و سردار آتا کمک ءِ دوئی کننگ کن 20 جولائی 1939 آ قلات اسٹیٹ نیشنل پارٹی آ رکھ خلک۔ پارٹی نا کماش ملک عبدالرحیم خواجہ خیل، غوث بخش بزنجو، گل خان نصیر، عبدالکریم شورش و ایلو باسک آتے علاقہ غان کشنگا۔ پارٹی نا کاریم تے بند کرفے۔ اندا سوب آن پارٹی نا ہیڈ کوارٹر ءِ شال اٹ ٹہفیر و اندا کان پارٹی نا کاریم تے برجاء کریر۔
ارٹمیکو جنگ عظیم (1945-1939) نا وخت آ انڈین ڈیفینس ایکٹ نا وسیلہ اٹ سیاسی کڑد آتیا رکھ خلکسُر۔ اندا وخت آ قلات اسٹیٹ نیشنل پارٹی تینا کاریم تے ڈکھوئی اٹ برجاء تخا۔ پارٹی نا باسک آک جواہر لال نہرو آن خواست کریر کہ قلات حکومت نا پارٹی آ خَلوکا رکھ نا برخلاف ہیت کر۔ نہرو دا شڑط آ ہیت کننگ کن امنا مس کہ پارٹی ءِ کانگریس تون اوار کننگ ءِ۔ 1944 نا گڈیکو وخت اٹ پارٹی ءِ ”آل انڈیا اسٹیٹ پیپل کانگریس“ ٹی اوار کریر۔ ولے الس نا بَد دننگ آن گُڈ ولدا پارٹی نا مُست نا دروشم ءِ جوڑ کریر ہراکہ بلوچستان نا آجوئی اسکان مدام سلیس۔
برطانیوی راج نا کوزہ نا ایسری آن گڈ بلوچستان جہان نا نشخ ٹی اسہ آجو ءُ ڈیہہ ئسے نا حیثیت اٹ پاش مس۔ اِرا راہبندی اسمبلی جوڑ کننگا، اسہ ایوان بالا، ایلو ایوان زیریں۔ بلوچستان اٹ ایوان زیریں کن گچین کاریک مسور ہراڑے قلات اسٹیٹ نیشنل پارٹی 52 آن 39 سیٹ کٹا۔ اندا سوب آن غوث بخش بزنجو ایوان نا کماش جوڑ مس۔ دا آجوئی زیات وخت اسکان برجا سلتو۔
مارچ 1948 آ پاکستان زوراکی اٹ بلوچستان آ کوزہ کرے۔
آغا عبدالکریم نا کماشی ٹی قلات اسٹیٹ نیشنل پارٹی نا سیکریٹری ملک سعید دہوار، کمیونسٹ پارٹی سندھ بلوچستان نا سیکریٹری قادر بخش نظامانی، بلوچ لیگ نا سیکرٹری محمد حسین عنقا و ایلو سنگت آک پاکستان نا برخلاف اولیکو گوریلا جنگ ائِ بناء کننگ کن اوغانستان آ ہنار۔ اوغانستان، سویت یونین و بلوچ قبائل آتا پارہ غان کمک مفننگ نا سوب آن بلوچ راہشون آک جنگ ءِ مُستی برجاء تخنگ کتوس۔ قول و قسم کریسہ اوغانستان آن ولدا بسُور۔
آغا عبدالکریم و اونا سنگت آتیتو مروکا قول ءِ پِرغسہ قلات نا خڑکا اوفتے دُزگیر کننگا۔ کیہی سال اوفتے زندان تیٹی بند کننگا۔ آجو مننگ آن گڈ 14 جولائی1955 ٹی آغا عبدالکریم، غوث بخش بزنجو، محمد حسین عنقا، قادر بخش نظامانی ءُ قلات اسٹیٹ نیشنل پارٹی نا سنگتاک ”استمان گَل“ نا پِن اٹ اسہ سیاسی پارٹی ئسے نا بنداؤ ءِ تخار۔ آغا عبدالکریم کماش و محمد حسین عنقا سیکریٹری جنرل جوڑ مسُر۔ پارٹی ون یونٹ نا برخلاف و متحدہ خودمختار بلوچستان نا خواست ءِ کریر۔
استمان گل کوزہ آن گُڈ اولیکو سیاسی تاغت اس جوڑ مس۔ بلوچ قوم ٹی سیاسی و راجی شعور تالان کننگ کن جہد ءِ برجاء تخار۔
2 دسمبر 1956 ٹی استمان گل پاکستان نیشنل پارٹی ٹی اوار مس۔ ہراٹی جی ایم سید نا سندھ متحدہ محاذ، حیدر بخش جتوئی نا سندھ ہاری کمیٹی، خان عبدالغفار خان نا خدائی خذمتگار تحریک و عبدالصمد خان اچکزئی نا ور ور پشتون اوار مسُر۔ 1957 ٹی قطبی (داسان نا بنگلہ دیش) آن مولانا باشانی نا عوامی لیگ نا ساڑی مننگ آن پاکستان نیشنل پارٹی نا پن ءِ بدل کریسہ نیشنل عوامی پارٹی تخنگا۔
نیشنل عوامی پارٹی پاکستان ئٹی اقلیتی قوم آتا حق آتیکن اواری اٹ جہد کننگ و ون یونٹ نا ایسری کن ترندی اٹ جہد کننگ بناء کرے۔ قوم آتا حق آتے دوئی کننگ کن اسہ ترند ءُ توار اس جوڑ مس۔
شست نا دہائی ٹی بلوچ خوانندہ غاک بلوچ وانندہ گَل نا بنیات ءِ تخار ہرا کہ بلوچ سیاست ءِ اسہ پُوسکن ءُ کسر اس نشان تریسہ بلوچ راج اٹ قومی سیاست نا سُوبر ءُ کڑد اس جوڑ مس و ہرا وخت بلوچ سیاست اٹ بنائی جہد نا کڑد ءِ دوئی کرے۔
شست نا دہائی ٹی بلوچ راہشونک پاکستان نا پارلیمنٹ نا باسک جوڑ مسرُ۔ مکران آن باقی بلوچ، قلات آن عطاء اللہ مینگل ءُ شال آن نواب خیر بخش مری بلوچ نا حق ءِ دوئی کننگ نا جہد ءِ برجاء کریر۔ نیب ون یونٹ نا برخلاف و قومی حق آتے دوئی کننگ کن جہد برجاء تخار ہرا کہ ون یونٹ نا ایسری نا سوب جوڑ مس۔ بلوچستان ءِ صوبہ نا درجہ ملا۔
بلوچ راہشون تیٹی نواب خیر بخش مری، عطاء اللہ مینگل و غوث بخش بزنجو نیب نا بیرک نا کیرغ آن تینا جہد ءِ برجا تخار۔ نیب بلوچستان نا تنیا غا قوم پرست پارٹی جوڑ مس۔ 1972 ٹی صوبہ ٹی اولیکو وار قومپرست حکومت جوڑ کننگ اٹ سرسہب مس۔ نواب خیر بخش مری پارٹی نا صوبائی صدر نا حیثیت اٹ تینا زمہ واری تے پورو کرے۔ عطاء اللہ مینگل صوبائی وزیر اعلی و غوث بخش بزنجو گورنر بلوچستان جوڑ مسر۔ نیب ئنا دا حکومت نوہ تو برجاء سلنگ آن گڈ بھٹو 1973 ٹی نیب نا حکومت ءِ ایسر کرے و نیب نا راہشون آتے زندان تیٹی بند کرے۔
1973 ٹی نیب نا راہشون تا دزگیری آن گُڈ بلوچ مزاہمت میر ہزار خان بجارانی نا کماشی ٹی برجاء مس ہراٹی فورتھ انٹرنیشنل آن لندن گروپ، سندھ آن میر علی احمد تالپر نا فرزند میر محمد علی تالپر و بی ایس او نا باسک آک ساڑی مسر۔ دا جنگ 1978 اسکان برجاء سلیس۔ سخت انگا حالیت آتا سوب آن ہزار آتا کچ اٹ بلوچ قوم اوغانستان اٹ جاگہی مسر۔
جولائی1977 ٹی جنرل ضیا الحق حکومت آ کوزہ کرے و نیب نا راہشون تیتون اوار کُل بلوچ اسیر آتے زندان تیان آجو کرے۔
نیب نا راہشون آتا زندان تیان آجو مننگ آن گڈ سردار عطاء اللہ مینگل و نواب خیر بخش مری پارلیمانی سیاست آن مُر مریسہ پیشن ملک آ ہنار۔ ہمیکان بلوچستان نا آجوئی کن تینا سیاسی جہد ءِ بناء کریر۔ غوث بخش بزنجو پاکستانی فیڈریشن اٹ اوار مریسہ حق آتے دوئی کننگ کن جہد ءِ برجاء تخا۔
1980 نا بناء ٹی غوث بخش بزنجو پاکستان نیشنل پارٹی نا بنداؤ ءِ تخا۔ تحریک استقلال تون اوار مریسہ صوبائی خودمختیاری کن جنرل ضیاالحق ءِ اسہ یاداشت اس تس ولے جنرل ضیاالحق نا سیاسی کاریم تیا رکھ نا سوب آن پاکستان نیشنل پارٹی شش تُو آن زیات تینا جہد ءِ برجاء تخنگ کتو۔
1981 ٹی سردار عطاء اللہ مینگل لندن ٹی ورلڈ بلوچ آرگنائزیشن نا بنداؤ تخا۔ ہرانا مسخت بلوچ ڈائسپورا ءِ اوار کریسہ سیوتی اٹ بلوچ ثقافت ءِ تالان کننگ کن جہد کے۔ بلوچ راہشون اسہ آجو ءُ عظیم آ بلوچستان کن جہد برجاء کرے۔ لندن آن اسہ اخبار اس شنگ کننگ ءِ بناء کرے ہراڑان آجوئی نا توار ءِ بُڑزا کرے۔
نواب خیر بخش مری اِرا سال برطانیہ و فرانس اٹ پردیس نا زند ءِ تدیفنگ آن گڈ اوغانستان اٹ بلوچ فراری تیا بس۔
1987 ٹی شہید فدا بلوچ و اونا سنگت آک بلوچستان نیشنل یوتھ موومنٹ نا بنداؤ ءِ تخار۔ ہرا کہ بناء اٹ پارلیمانی سیاست نا برخلاف ئس۔ ولے 1988 نا گچین کاری تیان گڈ اسہ سیاسی پارٹی اس جوڑ مس ہرا کہ گچین کاری اٹ بشخ الیسہ نواب اکبر خان بگٹی تون اوار بلوچستان نیشنل الائنس جوڑ کریر۔
1988 نا گچین کاری تیٹی غوث بخش بزنجو نا پارٹی پاکستان نیشنل پارٹی کٹیفے۔ بلوچستان نیشنل الائنس نا صوبائی حکومت جوڑ مس۔ نواب اکبر بگٹی صوبہ نا وزیراعلٰی جوڑ مس۔ اِرا سال آن گُڈ پاکستان نا صدر غلام اسحاق خان بنجائی حکومت ءِ پِرغسہ ایسر کرے۔ اندن صوبائی حکومت ہم پِنا۔
1990 ٹی بلوچستان نیشنل موومنٹ اسہ تاغتور ءُ سیاسی پارٹی ئسے نا دروشم اٹ مونا بس۔ ولے زو اِرا بشخ مینگل و حئی اٹ ونڈ مس۔ 1990 ٹی نواب اکبر خان بگٹی جمہوری وطن پارٹی ءِ جوڑ کرے۔ بی این ایم مینگل بلوچستان نیشنل پارٹی ءِ جوڑ کریسہ بلوچستان اٹ تینا سیاسی پِڑ آ جہد ءِ بناء کرے۔ بی این ایم ڈاکٹر حئی نا کماشی اٹ سیاست ءِ برجاء تخا۔
اوغانستان اٹ مجاہدین تا کوزہ آن گُڈ بلوچ قوم نواب خیربخش نا کماشی ٹی 1993 ٹی واپس بلوچستان آ بسُر۔ شال اٹ چلتن نا دامن اٹ نیوکاہان اٹ آباد مسُر۔ نواب خیر بخش مری حق توار سرکل ءِ بنا کرے ہراکہ داسان نا راجی جہد نا بناء ءِ۔
سردار عطاء اللہ مینگل 1996 ٹی تینا جلاوطنی ءِ ایسر کریسہ بلوچستان اٹ واپس پارلیمانی سیاست اٹ بشخ الک۔ 1997 نا گچین کاری تیٹی بی این پی ساڑی مریسہ صوبائی اسمبلی ٹی بھلو کچ ئسے ٹی کٹا۔ جمہوری وطن پارٹی تون سیوتی کریسہ حکومت اس جوڑ کریر۔ بی این پی صوبائی حکومت اٹ بنجائی حکومت نا دوشاغنگ آ گلہ شونی کرے و انداڑے جمہوری وطن پارٹی تون ہم تعلق آک خراب مسُر۔
28 مئی 1998 ٹی بلوچستان اٹ ضلع چاغی نا خلق راسکوہ نا مش اٹ ایٹمی تراک کننگا۔ بلوچ قوم دانا برخلاف سخت برانز کرے۔ دا وخت آ اسٹبلشمنٹ بلوچستان نیشنل پارٹی نا تہٹی جیڑھ ودی کرے ہرانا سوب آن سردار اختر مینگل صوبائی وزیر اعلٰی نا عہدہ غان استعفٰی تس و بلوچستان نیشنل پارٹی مُسہ ونڈ بی این پی مینگل، بی این ڈی پی، بی این پی عوامی ٹی ونڈ مس۔
2002 اٹ بلوچستان نیشنل موومنٹ نا کونسل سیشن اٹ راہشون آتا نظریاتی پَرخ مون آ بس۔ ہراڑے ڈاکٹر حئی و ڈاکٹر مالک گروپ پاکستان فیڈریشن نا تہٹی بلوچ حق آتیکن جہد ءِ برجاء کریر و چیئرمین غلام محمد بلوچ راجی آجوئی کن جہد کننگ نا سوغند ارفے۔ اندا وخت آ بی این ایم نا ڈاکٹر حئی ءُ ڈاکٹر مالک گروپ بی این ڈی پی تون اوار مریسہ نیشنل پارٹی ءِ جوڑ کریر ہرا کہ غوث بخش بزنجو نا سیاسی رَند ءِ الیسہ فیڈریشن اٹ سیاست ءِ برجاء کرے۔
چیئرمین غلام محمد بلوچ آجئی نا سیاست ءِ ترند کننگ کن 29اپریل آن یکم مئی 2003 اٹ شال اٹ پارٹی نا کونسل سیشن ءِ ہڈ تس۔ غلام محمد پارٹی نا کماشی و رحیم ایڈوکیٹ سیکریٹری جنرل جوڑ مسُر۔
کونسل سیشن اٹ پارٹی نا پِن ءِ بدل کریسہ بلوچستان نیشنل موومنٹ آن بلوچ نیشنل موومنٹ تخنگا۔ پارٹی نا اساس بلوچ راجی آجوئی، وے پارلیمانی سیاست و سلاء بند جہد کار آتا مُخ تفی ءِ کننگ جوڑ مس۔
اگست 2006 اٹ بلوچ سیاست نا قدآور برج نواب اکبر خان نا شہادت نا تدینی مس۔ اندا برج نا دڑنگ آن پارلیمانی سیاست آ بھاز اثر تما۔ انداڑان آجوئی نا جہد ترند مس۔ 2008 نا گچین کاری تیان بلوچ پارٹیک بائیکاٹ نا پڑو ءِ کریر۔ بلوچستان اٹ پیپلز پارٹی نا حکومت جوڑ مس۔ پیپلز پارٹی نا بناء حقوق بلوچستان تون اوار سیاسی باسک آتے بے گواہ کننگ بناء مس ہراڑان گُڈ اوفتا ٹپی آ جونک پٹ و پڑ، مش و تلار تیان رسینگ بناء مس۔
اپریل 2009 ٹی بی این ایم نا کماش چیئرمین غلام محمد ءِ اونا سنگت لالا منیر و شیر محمد تون اوار بیگواہ کننگ آن گُڈ اوفتے شہید کننگا۔ بلوچستان اٹ سیاسی راہشون آتے خُون کننگ نا لڑ اس بناء مس ہرا کہ داسکان برجاء ءِ۔ ہزار آ سیاسی راہشون و باسک آتے شہید کننگا ولے بلوچ قوم پرست پارٹیک بلوچ راجی آجوئی جہد آن پَد متوس۔
2013 نا گچین کاری تیان بلوچ الس بھلو کچ اسیٹ بائیکاٹ کریسہ پارلیمانی سیاست ءِ رد کرے و بلوچ آجوئی نا سیاست ءِ ترند کرے۔ ولے بلوچ پارٹی تا تینا جیڑہ غاتا سوب آن دا جہد ءِ بھاز آ محاذ آتیا نسخان تس۔ زوراکی، خلنگ، بٹنگ، ٹپی آ جون آتے خسنگ، ڈیتھ اسکواڈ نا راج و پارلیمانی سیاست اینو ہم برجاء ءِ و آجوئی نا چراغ ہم لگنگ ءِ۔
بلوچ سیاسی جہد سد سال نا مُرغن آ پَند ءِ خلیسہ ایسر کرے و دا پند اینو ہم برجاء ءِ۔ ہرا پَند ءِ عبدالعزیز کرد ینگ بلوچ آن بناء کرے او انجمن اتحاد بلوچاں و قلات اسٹیٹ نیشنل پارٹی دا سفر ءِ سوبر کرے۔ اینو بلوچ ورناک دا جہد نا بیرک ءِ ارفینو۔