بلوچستان نا ضلع قلات، تربت و بولان ئٹ مُسہ تراک مسنے ہرافتیٹ پاکستانی لشکر و ایلوفتے ٹک کننگانے۔
حوال تا رد ئٹ استو قلات نا تحصیل منگچر ٹی نادرست بندغ آک ایف سی کیمپ نا چوکی آ چغلی بمب ئٹ جلہو کریر و پیشتمنگ ئٹسرسہب مسر۔
لیویز ذرائع تا رد ئٹ یک شمبے نا نن کم و ود 7:45 نا وخت منگچر ایف سی کیمپ نا خڑک آ نادرست بندغ آک چغلی بمب خسیسہ نرار،چغلی بمب کیمپ نا بنجائی در آ تمیسہ ترخا۔
حوال رسینگ آ اسسٹنٹ کمشنر منگچر محمد حنیف نورزئی و ایس ایچ او لیویز تھانہ علی اصغر نیچاری لیویز فورس جاگہ آ سرمریسہ تدینی نا جاچ ءِ ہلکر اندن گیشتر پٹ و پول ہندی بست و بند کننگ ءِ۔
اندا وخت ئٹ ضلع کیچ نا بنجائی شار تربت ئٹ غلام نبی پمپ ناکہ آ نادرست بندغ آک چغلی بمب ئٹ جلہو کریر۔ پولیس تدینی نا پککرے واہم اوفک نسخان تا بابت ہچ پاتوس۔
ایلو پارہ غا ضلع بولان نا علاقہ بھاگ شار ئنا خلق غریب آباد ئٹ ٹھیکیدار کریم بخش پیوڑ نا اُرا غا چغلی بمب ئٹ جلہو مسنے۔
بولان پولیس نا رد ئٹ چغلی بمب تراک نا سوب آن اُرا ءِ دیخہ نسخان رسینگانے واہم ہچو جانی نسخان ئس متنے، اُراٹی ساڑی بندغ آکرکھوک ءُ۔
بولان پولیس نا دا ہم پاننگ ءِ کہ تدینی آن گڈ پولیس و قانود ٹہیفوک ادارہ غاک کارروائی ءِ بناء کرینو۔