مسخت نا گڑتی
اولیکو بشخ
نوشت: نوید احمد
دی بلوچستان پوسٹ
وخت اٹ ساعت ئنا بندی ءِ اونا زات ئنا درک لگسہ ئس کہ خنک تا ملنگار بڑزا ہریک چت اٹ لگوک پنکہ نا کرار اٹ سُرنگ، دیوال آ لگوکگھڑی نا ٹِک ٹِک ءِ بنسہ پارے “دا کُل ءِ خَنیوہ، بنیوہ، گڑا ذندہ اٹ۔ ولے امو زمان اٹ ساعت نا بندی !! انت ئس اس تُغ ئس اس۔۔۔ دیچاتا!” داسہ خنک تا پنکہ نا کرار کرار سرینگ ءِ ہریرہ و خفتیٹی گھڑی نا ٹِک ٹِک۔۔۔ ولے مِلی تا داسکاں امو ساعت نا بندی ءِ۔۔۔ پائک “کنامَننگ، یا مفرنگ آن دا تباہ حال آ کوٹی ءِ فرق تو تمپرو ولے دا کوٹی ءِ دیر چائک، دیر خنانے تا! دا ای اٹ خننگ اٹ تا چاوہ تا پِن تسونٹتا“۔۔۔ انداڑتو پیشانی اے تینا مُوشکسہ کاٹم ئٹ ارا چپانٹ خلسہ پارے “یار نے قرار انتئے اف نی انتئے دن بے قرار اس۔۔۔۔ ہمو گڑاتومغز انتے خلیسہ کہ ہرافتیان فائدہ اِچ مفک۔۔۔ یار ئسے اُس ” ہنداڑ تو موبائل نا گھنٹی لگا یونیورسٹی آ اننگ نا وخت خڑک ءِ، تینابسترہ ءِ اندا گڑتی تون الا بش مس نِیم گڈلو و مون دُو ئسے آن پد نِیم پیالہ ئس سلیمانی چاہ ئنا بستہ کتاب آتون بڈ دانش گاہ نا نیمہغا گام خلسہ ءِ جہان ءِ بھاز بے غم خَنک و سوج کیک “دافتے آ اِچ فریشانی ئس اف ہڑدے نا کار کتار و زلت نا باخو دا شار نا مشغلہجوڑ مسنے داسہ دافتے باخو کٹنگ آن بیدس پین فریشانی اف۔ باخو کِن تینا زات، آنا و خیال آتے تیوئی آ روپئ نا گواچی کیرہ! انتمسنے دا شار ءِ انت لاتمائی ئسے ٹی ءِ شار مُچا؟ داتے آ خدا نا عذاب ئسے یا پین طاغت ئس ارے ہرا زند آتے تینا وڑ اٹ ترتیب ایتک۔باتی تے دا گڑا نا اندازا ہم مفک! ولے ای ہم تو اندن اٹ، اندافتے آن اٹ ، دافتے آن جتا افٹ۔ ہردے یونیورسٹی آ اننگ بَننگ افسر ئسمننگ نا مسخت کنے زندہ تِخانے۔۔۔ کن تون دا چُنکا خیال آتا جہان متوکہ تو خودکشی جائز ئس کنے آ۔۔! کنا دماغ جون آن جتا ءِ کنےمَنپک اندن لگک پین کس نا ملی کنا خفتا نیام اٹی تخنگانے دا خیال آک کنا افس ۔۔۔ کنے تینے زات آ قابو اف۔۔۔ نک کنا یونیورسٹی آ گامکرسہ ملی ٹی کنا عجب ءُ خیال و تینتو تینٹ اٹ ءَ مٹ ہیت کروٹ۔۔۔ اٹ ءَ مٹ تینے ملامت کرسہ کروٹ دا ملی کنا آف!! مروئی ہم اف تا“
دانش گاہ ٹی گام تِخنگ تو ندارہ غاک بدل مریرہ داڑے جتاو خلقت ئسے۔ چُپی اٹ غٹ سیل کریسہ کلاس روم ءِ سر مس “اینو لیکچراخلاقیات آٹے کہ صحیح و غلط انت ئسے؟ تینتو سرگوشی کریسہ پائے، مُسہ گھنٹہ نا لیکچر آن پد ہم صحیح غلط نا فیصلہ مننگ کتو. اندن زند تیر مریسہ ءِ زمانہ ءِ ہننگ سوج کننگ اٹ! لیکچر آن ملی ٹی اِچ ئس بتو ٹیچر سما اف ہراکہ لگاکہ دڑاکہ ولے سوال راستی نائس۔”
دیگر کرے کوٹی ءِ تینا سر، ہمو بسترہ ءِ خنتا مونا پنکہ گھڑی نا ٹِک ٹِک۔ خاچنگ آن خوف بریک کہ امو تُغ پدا بف۔۔۔ اندا گڑتی ٹی تُغاٹ انا۔
ایلو دے بسترہ غا گدرینگا، پہلی آخر کرینے، شام ئنا ہشت و نیم بجہ ءِ۔ سلیم نا جیب اٹ اچ اف ملی تا داسکاں امو قید آن پیش تمتنے،اسہ نیمہ آ آزات ءِ ایلو نیمہ غا قید ئسے ٹی، اسہ نیمہ غا مسئلہ اف تا ایلو نیمہ جہان مُچا مسئلہ ئس لگیک تا۔ سلیم نا سن بیرہبیست و چار سال ءِ پُژہ غاک تا بھلن و خفتے آ تموک، خنتا شیف مون رنگ و خنتا تہہ ئنا پُوشکنی ٹی ساندہ دِیری آ خنک ، اندن لگیکسلیم نا خنک کسکنو اونا چنکا بَامُس آن شیف ہلکا ءُ بروت و خشک انگا جوڑک تا پارہ سلیم گڑتی ئسے نا گواچی ءِ دے و نن داد تُغ اف۔کمرہ ٹی تینا تموک خالی آ جیب و بھلا سوال آتون پہلی نا آخر ءِ۔ بے قراری زیات مریسہ ءِ ہر پہلی نا آخر اٹ داد اندا مسئلہ مریکولے او داڑان فریشانی نا گواچی مفک، سلیم ادب، فلسفہ، نفسیات ءِ خوانک و چائنگ نا شوق تِخک۔ ولے دا جیب ئنا خالی مننگ اوداحساس تِسونے کہ شار باخو کن تینا انا ءِ امر کسفک۔ عمل اٹ گڑاک بدل مریسہ کیرہ خیال آتا آزات ءُ جہان ئسے۔۔۔ اندا خیال آتیٹیگُم ئس کہ درگہ غا تہ ٹَک ٹَک ئس مس ۔۔۔ سلیم سوج کننگ پہلی نا آخر ءِ ایہن تو کنے آ کس بفک اینو ہراکان وام الوٹ یا خدا مہمانئس مف۔۔۔ سست گام خلیسہ درگہ ءِ ملا تو ہمسایہ سنگت تا بِسکوٹ ئس و ارا کوپ چاہ ایسونے۔ سلیم ءِ پائے
“تُولن اوار کچاری کین۔“
سلیم نمن تو کننگ کتو سنگت کوٹی ٹی بس بِسکوٹ ءِ ملیسہ ماندہ باشی ان پد سلیم ءِ ہرّفک، “یار داخس تنیائی ءِ امر برداشت کیسہ؟“
سلیم بھلو دم ئس الک پارے “ای تنیائی ءِ برداشت کپرہ بلکن تنیائی کنے برداشت کیک ای وڑ وڑ اٹ تینتو ہیت کیوہ۔ کنا جہان بھاز جتاءِ خالی و جیب ئسے، داڑان بیدس ملی ٹی بھاز کبین ءُ سوج تِخیوہ وخت وخت کنے لگک دا خفتا نیام اٹ تخوکا ملی کنا اف، ای گڑتیٹی تمیوہ زمانہ کنے وڑپک، دا شاری آ زند بھاز ترندی ئٹ اننگ ءِ بیرہ کنا دا تباہ انگا کوٹی اسہ ساعت ئسے نا قیدی ءِ۔“
زرس چپی آن پد سلیم پائک
“یار معیب ای بھاز ہیت کیوہ خیر نی بنف امرس زند نا امر ءِ۔” معیب سلیم نا کہوک انگا خنتیٹی گُم ئس۔ مدان مدان ءُ توار اسیٹ پارے
“سلیم کنے الے نی دا پار نے اٹ وخت نا ءِ کَس بِنتنے ؟ پیشتم دا چُنکا جہان آن تینا ورنائی ءِ چاشنی کر عشق کر عاشقی ئس کر جاگہئس است ءِ باہ ایت۔“
سلیم گُلم ئس چاہ ئنا کنیسہ مدان مدان و توار اسیٹ ہیت ئنا بناء ءِ کرے
“معیب کسہ دُن اف کہ اُست ءِ بائفتَنٹ، دُن ہم اف کہ کنا جہان چُنک ءِ، دُن ہم اف کنے کَس بِمپک۔ ای تو تینا جہان ٹی ہزار خیال گڑیوہ،ہزار ہیت کیوہ تینتو کنا خفک کنے بِنیرہ، است تینتون لگپک پین کس تو امر است خلیو مگہ دا اندن چّنکو ہیت ءُ۔“
معیب نا حیرانی زیات مس۔ آسڑدہ ئس کشا !
“سلیم داسہ نی ورنا مریسہ اس، ولے کنا ایلمی آ مشورہ نے دادے کہ تینتو انصاف کر پیشتم دا کوٹی آن، امو لیکچر آن پد نییونیورسٹی ٹی خَنگتنُس ہفتہ آن زیات ءِ انداڑے بند کرینس تینے پدا پاسہ کہ جہان تیز ءِ۔ کنا کوٹی ساعت ئسے ٹی پاسنگانے۔دُن ہراڑےمریک یار ارف بِسکوٹ ئس کُن“
سلیم نا دُو بسکوٹ ءِ سر متویسس کہ ہیت ءِ بناء کرے۔
“معیب نی پار زند اے انت ئس مسخت اتیک، یقینن مسڑ ئسے نا عشق تو تیوئی آ زند ئنا مسخت افک، مَننگ ہم کپک، اُست پُر مریک، نیتانکہ تینا جند ءِ درست کتنُس تینتو انصاف امر کروس! مگہ دن مریک کہ خاخر ئس لگے ہِچ ئس ہُشنگپ ؟ مفک!!! اسل دن مفک۔ تینےچائنگ، تینتون انصاف کننگ تینے ریفنگ بھاز جتاو گڑا ءُ“
چاہ آن گُلم ئس الک تخاتے ۔ داسہ معیب سوج کینگے۔
“گڑا تینے چائنگ کن تنیائی لازم ءِ ؟“
” او المی ءِ ؟“سلیم پارے۔
“نی داخہ در تنیائی ان پد درست کریس کہ نی دیر اُس؟” معیب پدا سلیم آن سوج کرے۔
سلیم پائک “داخس درست کرینٹ کہ کنا خفتا نیام آ ملی کنا اف، دا جون کنا ءِ ولے دادے حکم تِروکا ملی پین کس ئس نا۔ داخس چاوہشار غُٹا مفاد آتیٹی غرق ءِ ای و نی ہم اندا شار ئنا بشخ اُن، داخس چاوہ خواست چنکو گڑاسے مسخت بھلن ء بھاز، داخس چاوہ کہکنا مننگ اٹ سماج نا اخس کڑدار ءِ معیب جان داخس چائنگ بھاز اف مگہ!!! “
معیب بیزاری اٹ پائے “
نی تینا عمر آن بھلا سوال آتو پاسِینگانُس اللہ خیر کے، خیر ہنداخس پاوہ کنا وس آن تیر اس۔ انت کہ است نا خوائک کر، ولے خیال ءِتینا تِخ ای اناٹ وسلام“
” سلامت مریس معیب“
سلیم بشخندہ ئسے تو رخصت کرے تہ۔کوٹی نا درگہ ءِ تفنگتو تینتو تینٹ پائک،
“خالی آ جیب آن زیات خالی آ دماغ خطرناک مریک!”
چاہ تے آن گُلم ئس الک, کتاب ئس ملا خوانیسہ خوانیسہ تُنگان انا
برجاء ءِ