تربت و ایب کیب ئٹ ڈینگی ہفت بندغ نا ساہ ءِ ہلک ڈینگی تربت شار و اونا ایب کیب نا علاقہ تیٹ بیم تروک حد اسکان تالان مسنے۔
تدوکا دے اوورسیز کالونی تربت آن تعلقداری تخوک گرلز ہائی اسکول ڈنک نا ہیڈ مسٹریس ڈینگی آن کذیت کریسس و داڑان مالو کوشککلات ئٹ ڈینگی وائرس آن ورنا فٹ بالر کذیت کریسس۔ ہندی بندغ تا رد ئٹ دشت کنچتی ٹی مُسہ چنا بیران مسوسر ہرا ڈینگی وائرس ناگواچی ئسر ڈینگی وائرس آن بھلو کچ اسیٹ ورنا و چناک زیمی مسنو ہرا دارو درمان کن کراچی آ مون کننگ ءُ۔
اندا وڑ تربت نوک باد آن تعلقداری تخوک چنا اس ڈینگی وائرس آن کذیت کرے۔ علاقئی ذرائع تا رد ئٹ تربت ئٹی دارو درمان نا وےآسراتی تا سوب آن چنا ءِ کراچی آ دننگا ولے او جانجوڑ متو۔
ضلع کیچ ئٹ ڈینگی نا سوب آن داسکان 7 بندغ نا کذیت نا حوال آک رسینگانو ہرافتیٹ 4 چنک سن ءُ چنا اوار ءِ واہم حکومت نا کنڈ آنڈینگی وائرس نا برخلاف ہچو گام اس نظر بفک۔
تربت ئٹی ڈینگی کسفوک اسپرے مفننگ نا سوب آن ہندی بندغ آک خُلیس نا گواچی ءُ۔ تربت و اونا ایب کیب نا علاقہ غاک ڈینگی ملیریا وایلو وائرس تیان بھاز زیمی مسنو۔ زیمی مروک آتا کچ ودنگ ءِ ہندی بندغ آتا خواست ءِ کہ صوبائی حکومت و محکمہ جانجوڑیبلوچستان تربت ئٹی ڈینگی نا ایسری کن سوبری نا درشانی کریسہ زوت گام ارفے۔
یاتی مرے کہ صوبائی وزیر جانجوڑی نا تعلقداری تربت آن ءِ ولے داڑان بیدس اسپتال آتیٹ جانجوڑی نا آسراتی تا وے مننگ افسوز ناہیت ئسے۔