بلوچستان نا دریابی شار گوادر ئٹ برجاء حق دو تحریک نا برانز آ نن نیمہ غا پولیس ارش کرے و حق دو تحریک نا سروک حسین واڈیلہتون اوار کیہی بندغ آتے دزگیر کرے۔
سروک آتا دزگیری آن پد دریابی شار گوادر، پسنی و اورماڑہ ٹی حالیت خراب مس و موبائل انٹرنیٹ و موبائل نیٹورک ہم بند کننگا۔
حوال تا رد ئٹ پولیس آنسو گیس نا شیلنگ نن درست برجاء تخا و مچی ہلوک آک تولوک برانز ءِ داسکان برجاء تخانو، ہرا نا مخ تفی ءِکریسہ نن نیمہ غا زالبول آک ہم بریسہ برانز ئٹ اوار مسر۔
حوال تروکا تا پاننگ ءِ کہ اینو مچی ہلوکا شکار کن سمندر آ ہنتور و برانز ئٹ اوار مننگ نا پڑو کرینو۔ مکران آن سیاسی باسک و محنتکش الس برانز کروکا تتون اواری نا درشانی کن رادہ مسنو۔ کیہی ہند آتیا حالیت خراب مننگ نا حوال رسینگانے۔
ایلو کنڈ آن حق دو تحریک اورماڑہ نا باسک آک پارٹی نا سروک آتا دزگیری نا برخلاف اورماڑہ زیروپوائنٹ و سربندن کراس ءِ برانزکریسہ لس ہن و بر کن بند کرینو۔
پنجگور ئٹ حق دو تحریک نا کنڈ آن گوادر ئٹ حق دو تحریک نا برجاء تولوک برانز نا برخلاف کریک ڈاؤن و سروک و باسک آتا دزگیری وبےدادی نا برخلاف ریلی و برانز کریر و حکومت ءِ سروک آتا آجوئی کن بیست و چار گھنٹہ نا وخت تسر۔
بسم اللہ چوک آ برانز تون ہیت کریسہ اوار مروکاک پاریر کہ سروک و باسک آتے 24 گھنٹہ ٹی یلہ کننگ مرے۔ اوفتا پاننگ ئس کہ اسہپرامن برانز ئسے آ حکومت نا کنڈ آن کریک ڈاؤن ظلم ئنا انتہا ءِ۔ حکومت حق دو تحریک نا جائز خواست آتے پورو کننگ نا جاگہ غابےدادی نا کسر ءِ ارفیسہ الس ئنا جائز توار و برانز ءِ توننگ ءِ۔
او پاریر کہ ننا تحریک پرامن ءِ و اگہ ننا باسک و سروک واجہ حسین واڈیلا، محمد یعقوب و ایلوفتے یلہ کننگ متو تو نن سی پیک ءِ بےپک مروک وخت اسکان بند کرون۔
خیال مرے کہ بلوچستان نا دریابی شار گوادر ئٹ حق دوتحریک نا تینا خواست آتا حق ئٹی اِرا تو آن برانز برجاء ءِ۔ تدوکا دے تیٹبلوچستان نا وزیر داخلہ ضیا لانگو، وزیر پبلک ہیلتھ لالہ رشید بلوچ تران کننگ کن گوادر آ بسوسر ولے ہیت و تران بیدس بھرم آن ایسرمس۔