عورت فاؤنڈیشن تینا سالانہ کچ و حساب ءِ شنگ کرے۔ بلوچستان ئٹ زالبول تیا بےدادی نا تدینی تیٹ 2022 نا سال ئٹ ودکی مسنے،66 زالبول خون کننگانو–
تنظیم نا سروے رپورٹ نا رد ئٹ بلوچستان ئٹ زالبول تیا بےدادی نا تدینی تیٹ پاش ودکی مسنے، 2022 ٹی 66 زالبول خون کننگانو و2021 ٹی خون مروکا تا کچ 57 ئس۔
بے سرکاری تنظیم عورت فاونڈیشن نا کنڈ آن شنگ مروک کچ و حساب نا رد ئٹ 2022 ٹی زالبول تیا بےدادی نا 95 تدینی رپورٹ مسنوو 2021 ٹی زالبول تیا بےدادی نا 78 تدینی مونا بسوسر۔ تدوکا سال جتا تدینی تیٹ 66 زالبول ءِ کسفنگانے۔
تنظیم نا رپورٹ نا رد ئٹ سال 2021 ٹی خون مروکا زالبول تا کچ 57 ئس 2022 ٹی سیاہ کاری نا پنا 19 زالبول ءِ کسفنگا و 2021 ٹیسیاہ کاری نا پنا 28 زالبول کسفنگاسر، 2022 ٹی اُرائی جیڑہ آتیا مُسہ زالبول خودکشی کریسر 2021 ٹی اِرا زالبول اُرائی جیڑہآتیا خودکشی کننگ آ بےوس مسوسر۔
تنظیم نا رپورٹ نا رد ئٹ 2022 ٹی اِرا زالبول برمتہ مسر و 2021 ٹی دا کچ ہشت ئس۔ بندغی حق آتا باسک آک بلوچستان ئٹ ودوکابےدادی نا تدینی تا اسہ بنداوی سوب انصاف نا نہ تننگ ءِ پاریر۔
او پاریر کہ دا وڑ ئنا تدینی تیٹ ہرا بندغ آتا دو مریک اوفتے انصاف نا کٹہرہ ٹی ہتنگ مرے تاکہ دا عمل ءِ ایسر کننگ مرے۔
زالبول تا حق آتیکن کاریم کروکا باسک آک بلوچستان ئٹ زالبول تیا بےدادی کروکا بندغ آتا برخلاف قانود آ سختی ئٹ عمل کننگ ناخواست کریر۔