2023 کن تیوہ جہان ئٹ کُل آن تاغت تخوکا پاسپورٹ آتا اِرا جتا ءُ لسٹ شنگ کننگانو و ہڑتوما تیٹ پاکستان کُل آن اخیر ئٹی ءِ۔
آرٹن کیپیٹل نا کنڈ آن شنگ مروک جہان نا کُل آن تاغت تخوکا پاسپورٹ آتا لسٹ ئٹی متحدہ عرب امارات (یو اے ای) نا پن ہم ارے۔
اندن ہینلے اینڈ پارٹنرز نا 2023 نا لسٹ ئٹ جاپانی پاسپورٹ ءِ کُل آن تاغت تخوکا پاسپورٹ پاننگانے۔
آرٹن کیپیٹل نا لسٹ ئنا رد ئٹ یو اے ای نا پاسپورٹ تخوکا شاریک بیدس ویزا آن 181 ڈیہہ ئنا سفر کننگ کیرہ۔
یو اے ای آن پد سوئٹزرلینڈ، جنوبی کوریا، جرمنی، سوئیڈن، فن لینڈ، لکسمبرگ، اسپین، فرانس، اٹلی، نیدرلینڈز و آسٹریا اوڑدئی وڑ آارٹمیکو نمبر آ بریرہ و دا ڈیہہ تا شاری تے 174 ڈیہہ آ ہننگ کن ویزا بکار اف۔
ڈنمارک، بیلجیئم، پرتگال، ناروے، پولینڈ، آئرلینڈ، برطانیہ، امریکا و نیوزی لینڈ نا پاسپورٹ آتا بشخ ئٹ مسٹمیکو نمبر بس، ہرافتا شاریک173 ڈیہہ ئٹ بیدس ویزا آن سفر کننگ کیرہ۔
ارٹمیکو کنڈ آن ہینلے انڈیکس نا رد ئٹ جاپانی پاسپورٹ تخوکا شاریک بیدس ویزا آن 193 ڈیہہ ئنا سفر کننگ کیرہ۔
جاپان آن پد سنگاپور و جاندمی کوریا نا پاسپورٹ آک ارٹمیکو نمبر آ بریرہ ہرافتا شاریک 192 ڈیہہ ئٹ بیدس ویزا آن ہننگ کیرہ۔جرمنی و اسپین نا پاسپورٹ آک 190 ڈیہہ آ ویزا فری ئٹ مسٹمیکو نمبر آ بسر۔
کُل آن نزور آ پارسپورٹ آتا لسٹ ئٹی پاکستان چارمیکو نمبر آ بروکا ڈیہہ ءِ۔آرٹن کیپیٹل نا لسٹ ئٹ پاکستانی پاسپورٹ یمن و صومالیہتون اوار 92 می نمبر آ بس۔ اوڑان شیف عراق (93)، شام (94) و اوغانستان (95) ءُ۔
آرٹن کیپیٹل نا لسٹ ئٹ پاکستان نا بشخ ئٹ 106 می نمبر بس ہراڑان شیف شام، عراق و اوغانستان ءُ۔