بارکھان تدینی ٹی محمد مری نا 17 سالہ مسڑ، 19 سالہ و 13 سالہ مار تیتون زیادتی نا پک کننگانے، اندن زیمی مروک بندغ آک پولیس کارندہ آتون تینا بیان ءِ ریکارڈ کریر ۔
پولیس سرجن ڈاکٹر عائشہ نا ردئٹ خان محمد مری نا ہفتدہ سالہ مسڑ، نوزدہ سالہ مار و سینزدہ سالہ مار ءِ جنسی زیادتی نا گواچی کننگا ۔
ڈاکٹر عائشہ فیض نا پاننگ ءِ کہ خان محمد مری نا زائیفہ ، مسڑ و اِرا مار نا ڈی این اے ٹیسٹ کننگ کن نمونہ دننگا ہراتے لاہور آ رادہ کننگو ۔
ڈاکٹر عائشہ نا پاننگ ءِ کہ پنجا سالہ گراناز تون اوار زیادتی کننگتنے اودا بیرہ جسمانی بے دادی کننگانے ، نیاڑی نا مار تا ردئٹ بے دادی نا گواچی کننگا ولے کمکی معائنہ نا نیام ئٹ شاہدی رسینگتو ۔
ڈاکٹر عائشہ فیض نا ردئٹ خان محمد مری نا مسڑ نا چپیکو نَت آ سگریٹ ئٹ ہُشنگ نا نشان ہم ارے ۔
خان محمد مری نا زائیفہ گراناز ویڈیو کلہو ئٹ پارے کہ پولیس ننے دکی آن آجو کرے، 8 سال آن عبدالرحمن کھیتران نا نجی جیل ٹی قیز ئسون، قیز کننگ نا نیام ئٹ ننا زی آ بے دادی کریر و گیڈ ئٹ بند کننگا ۔
گراناز نا پاننگ ءِ کہ کنا 6 مار ءِ کنے آن مُر کریر اندن مارتے تنیا قیذ ٹی بند کننگا ۔
داکان بیدس خان محمد مری نا مار نا پاننگ ئس کہ کنے صوبائی وزیر سردار عبدالرحمن کھیتران کوئٹہ نا اُرا ٹی بند کریسس ، ارا و مسہ دے مالو ننے دکی ٹی اسہ بندغ ئسے نا حوالہ کننگا ، ہراتم او بندغ ءِ خبر تما کہ پولیس ننے پٹنگ ءِ گڑا او ننے الاسس ہناسس ہراڑان گُڈ پولیس ننے آجو کرے ۔