گلزار امام نا دزگیری: بلوچ راجی تحریک آ زیمک
ٹی بی پی سرگپ
پاکستانی لشکر نا شعبہ تعلقات عامہ (آئی ایس پی آر) نا رد ئٹ سکیورٹی فورسز آتا ڈھکوک حوال تا رِدئٹ آپریشن اسیٹ ہائی ویلیوٹارگٹ گلزار امام پِن کروک شمبے ءِ دزگیر کننگانے، گلزار امام آجوئی دوست سلہہ بند تنظیم بلوچ نیشنلسٹ آرمی نا سروک و سپریمکماندار ءِ۔ پاکستانی لشکر گلزار امام نا دزگیری ءِ بھلو سرسہبی ئسے نا وڑ ئٹ مونا ہتنگ ءِ، اندن اونا تنظیم (بلوچ نیشنلسٹ آرمی) نادعویٰ ءِ کہ گلزار امام اسہ سال ئسے آن پاکستانی لشکر نا دزگیر ئٹی ئس و اودے 3 مئی 2022 ئٹ ترکی آن دزگیر کننگاسس۔
بلوچ نیشنلسٹ آرمی تینا بیان تیٹ دا درشانی کننگ ءِ کہ ریاست پاکستان گلزار امام ءِ بے دادی نا گواچی کریسہ بلوچ راجی تحریک نابرخلاف کاریم ئٹ ہتنگ نا کوشست کرو و تحریک نا برخلاف پروپیگنڈہ بناء کرو۔ پاکستان گلزار امام نا دزگیری ءِ بلوچ تحریک کن بھلودک اس پاننگ ءِ و جاچ ہلوک آک ہم اِرا دہائی ٹی اولیکو وار ہائی پروفائل گوریلا کماندار ئسے نا دزگیری ءِ پاکستان نا سرسہبیگوندیسہ پاننگ ءُ کہ دانا منفی زیمک بلوچ آجوئی نا جہد آ تمور۔
پاکستان نا ہرا دفاعی جاچ ہلوک آک گلزار امام نا دزگیری ءِ بلوچ راجی تحریک نا نزور مننگ تون گنڈیرہ، او بلوچ راجی تحریک ناتاریخی چرجوئی ءِ خن تیان چپ کریسہ انفرادی تدینی تے ہلیسہ تحریک نا نزوری و ایسری نا پیشن گوئی کننگ ءُ۔ دا پیشن گوئیکپوسکنو افس بلکن بیست و یکمیکو کرن ئٹ بلوچ تحریک نا زندہ مننگ آن گڈ ہر وخت مننگ ءُ، جنرل پرویز مشرف پاریسس کہ بیرہ مُسہسردار ءُ و منہ فراری کیمپ ءُ ہرافتے زو ایسر کننگو ولے اِرا دہائی آن گڈ ہم بلوچ راجی تحریک تینا چرجوئی ءِ برجاء تخانے۔
پیپلز پارٹی نا دور حکمرانی ٹی پاکستان نا وزیر داخلہ رحمان ملک و مسلم لیگ نا دور حکومت ئٹ چوہدری نثار و پاکستانی لشکر ناجنرل آک ہم وخت وخت بلوچ راجی تحریک ءِ طاغت نا کمک ئٹ لتاڑنگ نا ہیت ءِ کریسہ کرینو ولے بلوچ راجی تحریک ءِ ایسر کننگ ئٹبےسہب مسونو و برجاء سال تیٹ بلوچ تحریک تون تفوک سلہہ بند تنظیم آک پاکستان ئٹ چائنا نا مفاد آتے سیدھا ٹک کننگ ءُ ہراتحریک نا سوگوْ مننگ نا چیدہ سرپد مننگک۔
دا ہیت آن نمن کننگ مفک کہ گلزار امام نا دزگیری آن بلوچ تحریک آ منفی زیمک تمور ولے دا پاننگ وخت آن مالو ءِ کہ اونا دزگیری آنبلوچ تحریک نزور مرو انتئے کہ نواب اکبر خان بگٹی، بالاچ خان مری، چیئرمین غلام محمد و اسلم بلوچ نا خون ءِ کننگ آن گڈ ریاستیادارہ غاک و منہ دانشور بلوچ تحریک نا ایسر مننگ نا پیشن گوئی کریسر ولے اینو ہم بلوچ راجی آجوئی نا تحریک سوگوْ دروشم ئٹبرجاء ءِ۔
بلوچ راجی تحریک نا اگہ خوڑتی ئٹ جاچ ءِ ہلین گڑا ننے سما تمو کہ بلوچ تحریک ادارہ جاتی بنداو آ سوگو ءِ و ہراتم اسکان بلوچ ویلایسر متنے، بلوچ تحریک برجاء مرو و اوڑا راہشون تا دزگیری یا خون تا زیمک الم تمور ولے تحریک نا چرجوئی برجاء مرو۔