اسہ ہسپانوی ایتھلیٹ اس بیدس بندغی حوالکاری آن اسہ غار اسیٹ 500 دے گدریفنگ آن گڈ زندہ پیش تمانے۔ گمان کننگک کہ دااسہ جہانی ریکارڈ اس مننگ کیک۔
ہراتم بیٹریز فلامینی غرناطہ نا غار ئٹ پیہا اوتم روس یوکرین آ جلہو کتوسس و جہان ءِ او وخت کرونا پلویڑ کریسس۔ داڑے دا پاریسہکان کہ دا اسہ آزموندہ اس ئس ہرانا سائنسدانک بھاز خیالداری ءِ کریر۔
50 سالی فلامینی 48 سال ئنا سن ئٹ غار ئٹی پیہاسس۔ او تینا وخت ءِ 70 میٹر (230 فٹ) کڑمب غار ئٹ ورزش، عکس کشی و ٹوپموغنگ ئٹ گدریفے۔ اونا کمکار ٹولی نا رد ئٹ او 60 کتاب خوانانے و 1000 لیٹر دیر کنگونے۔
او غار آن پیش مننگ آن گڈ پارے کہ ای دائسکان 21 نومبر 2021 نا تاریخ ئٹ اڑینگانٹ۔ کنے جہان نا بابت ہچ سما اف۔
اونا خیالداری ءِ نفسیات نا چاہندار، محقق، سپیلیوجسٹ (غار تیا پٹ و پول کروک اسہ ٹولی اس) آک کریسر ولے ہچو چاہندار اساوڑتون حال احوال کتوسس۔
ہسپانوی ٹی وی ای اسٹیشن آ فوٹیج ئٹ اودے بشخندہ کریسہ غار آن پیش تمنگ و تینا ٹولی ءِ بھاکر کننگ آ خننگانے۔ منہ ساہت آن گڈاو تینا آزموندہ ءِ ‘گچین‘ و بے مٹ پن کرینے۔
ہراتم رپورٹر آک اوڑا گیشتر حوال تننگ کن زور شاغار گڑا او پارے کہ ای یک و نیم سال چھپ مسونٹ، تینے آن بیدس کس ئتون ہیتکتنوٹ۔ ای تینا سار ءِ گوہانٹ اندا سوب کنے کمک تننگک۔ اگہ نم کنے غسل کننگ نا موکل ایترے تو ای منہ ساہت آن گڈ نمتون اوڑدہیکروٹ، ای یک و نیم سال آن دیر ءِ دو خلتنوٹ۔
پدان او صحافی تے پارے کہ اسہ اندنو ساہت اس بس ہراتم ای دے تے حساب کننگ ءِ بس کریٹ۔ ای سوچاٹ کہ غار ئٹ 170-160 دےآن رہینگوہ۔ او تینا مون ہیت کننگ نا بابت ہم بیان کریسہ پارے کہ ہراتم نی چھپ مریسہ تو مِلی پین وڑ ءُ خیال جوڑ کیک۔
چاہندار آک اونا تنیائی ٹی گدروک وخت ءِ کاریم ئٹ ہتیسہ چاگڑدی تنیائی و مخلوق نا وخت ئنا بابت بھاز عارضی بے کسری نا زیم تیاپٹ و پول کننگ ءُ۔
فلامینی نا کمکار ٹولی نا پاننگ ءِ کہ او غار ئٹ مرغنو وخت اس گدرینگ نا جہانی ریکارڈ ءِ پرغانے، ولے گنیز ورلڈ ریکارڈ دا ہیت ءِ پککتنے کہ آیا غار ئٹ رضاکارانہ وخت گدریفنگ نا اسہ ریکارڈ اس ساڑی ءِ۔
گنیز ورلڈ ریکارڈ چلی و بولیویا نا ڈغار نا تہٹی گٹ ہمو 33 کانڑ مزورکار تے بھلو وخت ئسے اسکان زندہ مننگ نا داد تسونے ہرافک2010 ئٹ چلی ٹی مس و خیسن نا کانڑ تا تمنگ آن گڈ 69 دے 688 میٹر ڈغار نا تہٹی گدریفیسر۔