بلوچستان نا ضلع خضدار نا علاقہ زہری ءِ پاکستانی لشکر گھیرہ ٹی ہلیسہ شش بندغ ءِ زوراکی ئٹ بیگواہ کرے، علاقہ ئٹ احوالکاری نظام بند کننگا۔
اینو سہب سہار تون زہری نا جتاء علاقہ نورگامہ، بلبل، چشمہ، تراسانی، مشک و ایب کیب ءِ پاکستانی لشکر گھیرہ کرینے۔
احوالکار آک ٹی بی پی ءِ پاریر کہ فورسز آک جتاء اُرا تیا چھاپہ خلنگ ءُ، دا وخت ئٹ پاکستانی لشکر شش بندغ ءِ دزگیر کریسہ نادرست جاگہ غا درینے ہرافتیان اسٹ نا چاہنداری گل محمد نا مار یاسر ہند بلبل نا پن آن مسونے۔
احوالکار آک پاریر کہ علاقہ ئٹ انٹرنیٹ تون اوار موبائل نیٹورک آتے بند کننگانے اندن دا بابت ضلعی کوالخواہ تا ہیت دائسکان مونا بتنے۔