سفر زند و شاعری
نوشت: نزار قبانی | مَٹ: عتیق آسکوہ بلوچ
پنچمیکو بشخ
کنا خاہوت و چُنکی
چار مار و اسہ مسڑ ئسے آ تالان خاہوتی لڑ ئٹ کنا نمبر ارٹمیکو ئس۔ ایلوفک المعتز، رشید، صباح و ہیفا ئسر۔ ننا اُرا دمشق نا نیامئی حالیت اُراتیان اسٹ اس ئس۔ کنا باوہ مالدار اس اَلو انتیکہ او دلوت مُچ کتوسس۔ حلوائی نا کاریم آن انت کھٹیا اس مسکہ او اوفتے ننا خوراک و پُچ و فرانسیسی تا برخلاف اُلسی مزاحمت نا تحریک نا مالی کمک ئٹ خڑچ کریکہ۔
اگہ کنا ارادہ تینا باوہ ءِ اسہ کُڑدہ اسیٹی حساب کننگ نا مسکہ گڑا بیدس ہڑس اودے خواری کش کڑدہ ئٹ حساب کریٹہ انتیکہ او تینا زند ئنا پنجا سال سنگی کولا نا کش آتے سینہ ٹی دڑفسہ، شکر نا باچکا و پاٹ نا صندوخ جوڑ کننگ اٹ گدریفیسس۔ او ہر بیگہ تون کوچہ معاویہ ئٹ ٹہیفوک تینا کارخانہ آن ننا رہی آ واپس بسکہ۔ سیڷ ئنا نالہ تا شیف آن ٹہیفوک دا کارخانہ اندن اس دنکہ ٹُنگ ٹُنگ آ جہاز مرے۔
ہراتم وختس ای ہمو بندغ آتا نوشت آتے خوانیوہ ہرافک کنے آ بورژوا، سیر تپہ و خرّن دتر والا زنک تون تعلقداری نا دوبہ ءِ خلیرہ گڑا کنے تینا باوہ نا کولا نا موڷ آن اسٹ دروشم و اونا پُچ آتیا جاغہ جاغہ لگوک لپ و ہُشنگ نا نشانک استا بریرہ۔ او ہرا تپہ ءِ؟ ہرا خرّن آ دتر ءِ ہرانا دا بندغ آک ہیت ءِ کیرہ؟ کنا دتر نہ شاہی ءِ و نہ شاہانہ، بلکن او ہمو ہزار آ پاکیزہ دمشقی اُراتا مخلوق نا ڈول ءِ ہرافک شرف و برجائی سگ و خدا نا خُلیس تون تینا اِرغ ءِ کھٹیرہ۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔