ذاکر مجید: شعور نا بندی
ٹی بی پی سرگپ
پاکستان نا ریاستی ادارہ غاک گمانی وڑ ئٹ بلوچستان ئٹ ہزار آ سیاسی باسک آتے زوراکی ئٹ بیگواہ کرینو، ہرافتیٹ کیہیک اِرا دہائی آن زوراکی ئٹ بیگواہ ءُ۔ بلوچ اسٹوڈنٹس آرگنائزیشن نا کمک کماش ذاکر مجید خوانندہ سیاست تون تفوک ئس، اودے اِرا ہزار شش ئٹ پولیس سیاسی کاریم تا سوب دزگیر کرے و او کیہی تُوہ تے اسکان خضدار جیل ئٹ مس۔ ذاکر مجید ءِ ہشت جون اِرا ہزار نو ئٹ مستونگ پٹنگ آباد آن زوراکی ئٹ بیگواہ کننگا۔ ذاکر مجید نا سیاسی سنگت زاہد بلوچ ءِ ہم بیگواہ کننگا و اونا سنگت شفیع بلوچ، کمبر چاکر و سنگت ثناء زوراکی ئٹ بیگواہی آن گڈ کسفنگار۔
“ذاکر ہرادے ای ودی کریٹ، او بھلن مس و تینا راج ئنا پُلوک حق آتا شعور ءِ تینے آنبار انگا خوانندہ تیٹ تالان کرے، اودے پاکستان نا ڈھکوک ادارہ غاک زوراکی ئٹ بیگواہ کریر و ننے آن زر ہم خواہتور۔ زندہ ضمیر بندغی و نما شعور نمے بیوس کرو کہ نم کنا مدان آ توار تون اوار مبو تانکہ نما لہجہ چاہنداری مریسہ بندغی ضمیر ءِ مرگ ئنا خمب آن رکھ ءِ ہتے۔” ذاکر مجید نا لُمہ نا دا لوز آک ہمو بلوچ لُمہ تا ترجمانی کیرہ، ہرا اِرا دہائی آن تینا چنا تا رکھوک یلہ مننگ کن کننگ ءُ۔
ذاکر مجید نا یلہ مننگ کن اونا خاہوت و سیاسی ادارہ غاک سوگوْ سیاسی مہم کریر، ذاکر مجید نا ہیڑ فرزانہ مجید، ماما قدیر تون اوار بلوچستان ئٹ زوراکی ئٹ بیگواہ سیاسی باسک آتا یلہ مننگ کن کوئٹہ آن کراچی و کراچی آن اسلام آباد اسکان لانگ مارچ نا بشخ ئس۔ ذاکر مجید نا ہیڑ فرزانہ اونا یلہ مننگ کن پنچ سال اسکان پریس کلب و برانز آتا سروکی ءِ کریسہ کرے، و ذاکر مجید نا لُمہ چانڑدہ سال آن کوئٹہ، کراچی و اسلام آباد ئٹ برانز کرینے ولے چانڑدہ سال آن گڈ ہم او یلہ متو۔
بلوچستان ئٹ بلوچ انسرجنسی نا ترندی تون اوار بلوچ سیاسی باسک آتا زوراکی نا بیگواہی تیٹ ودکی مس و بلوچ آجوئی نا جہد ئتون تفوک ادارہ تا راہشون و باسک آتے زوراکی ئٹ بیگواہ کننگا۔ بلوچستان ئٹ اِرا دہائی آن گڈ ہم زوراکی نا بیگواہی تا چرجوئی برجاء ءِ و پاکستان نا ریاستی ادارہ غاک تکرہ کہ بلوچ سیاسی باسک آتا زوراکی ئٹ بیگواہی تیان اوفک بلوچ راجی جنز ءِ ایسر کننگ کیرہ ہرا اوفتا بلوچ راجی جہد نا دیہاڑ آن بے سمائی سرپد مننگک۔
بلوچ راجی آجوئی نا جہد اِرا دہائی آن برجاء ءِ و وخت ئتون اوار انسرجنسی نا ترندی ٹی ودکی مننگ ءِ۔ پاکستان سیاسی باسک آتا زوراکی نا بیگواہی تیٹ راجی جنز ءِ ایسر کننگ کپک۔
پاکستان بلوچ راجی ویل ءِ ایسر کننگ کن زوراکی ئٹ بیگواہ بندغ تے یلہ کریسہ بلوچ راجی جنز ئتون تفوک ادارہ تون بامسخت ہیت و تران ئسے نا بناء ءِ کے گڑا ہموتم دا ویل ئنا ایمنی ئٹ ایسری پیش تمنگ کیک۔