یک شمبے نا دے، بیگہ غا ایجوکیٹری لینگویج سینٹر قمبرانی روڈ شال ئٹ شون ادبی دیوان نا اسہ ادبی ءُ مجلس اس پروفیسر ڈاکٹر منظور بلوچ نا کماشی ٹی اڈ تننگا ہرانا مہمان خاص براہوئی زبان نا گچینا شاعر اقبال ناظر ئس۔
دا مجلس نا ٹِک آتیٹ شون ادبی دیوان نا مسکوئی کابینہ نا ایسری و پوسکنا گچین کاری کننگ اوار ئسر۔ مجلس اٹ براہوئی زبان و ادب نا آخوبت و شونداری نا باروئٹ ہیت و گپ مس۔
داکان بیدس پوسکنا ورنا تے کتاب خوانگ و کتاب تون سنگتی و زبان و ادب نا زی آ سرجمی ئٹ ہیت گپ کننگا۔
براہوئی زبان و ادب نا علمی ملاسی تے آ جوان وڑٹ بحث و تران مس۔ و مُستی ہیل کننگ و سرپند مننگ نا کوشست ءِ برجا تخنگ، داکان بیدس خواری اٹ سرسہبی دوئی کننگ نا لمئی دوی تون شونق تخوکا ورنا تیان براہوئی زبان و ادب کن اُمیت ئسے نا اِڑکا نا خواست ءِ کریسہ گپ و تران مس۔
شون ادبی دیوان نا بیست سالہ کارکردگی ءِ مونا تخیسہ دانا باروئٹ پروفیسر ڈاکٹر منظور بلوچ تینا خیال آتے درشان کریسہ اینو نا عملی کاریم تا گرج ءِ تالان کریسہ جوان وڑئٹ ہیت گپ کرے۔
داکان بیدس تدوکا کابینہ ءِ ایسر کننگ ءُ پوسکنا کابینہ نا گچین کاریک مسُر۔ شون ادبی دیوان نا پوسکنا کابینہ گچین کننگا ئنا ردِئٹ تنظیم نا سروک (چیئرمین) براہوئی زبان نا شاعر حامد گل ءِ گچین کننگا، وائس چئیرمین نظام نزیری، جنرل سیکرٹری، اسحاق ناز، جوائنٹ سیکرٹری مجید ارمانی، میڈیا سیکرٹری احمد نعیم، فنانس سیکرٹری حسن سحر، آفس سیکرٹری حافظ شبیر احمد سمالانی، میوزک ڈائریکٹر شاہ سمال بلوچ گچین کننگار۔
داکان بیدس شون ادبی دیوان نا ایگزیکٹو کمیٹی نا پڑو ءِ شون ادبی دیوان نا چیئرمین کرو ءِ۔
گڈ سر اٹی مجلس اٹ ساڑی بندغ آک شون ادبی دیوان نا چئیرمین و اونا سنگت (عہدار) آتے اُست ئنا حُب اٹ مبارک بادی تسُر و اوفتا ذمہ واری تیتون اوار دا ادبی تنظیم نا کار کرڈ ءِ زبان و ادب نا سرسہبی کن بھلو امیت اس تخیسہ ادبی نشست نا مجلس ءِ ایسر کریر۔
