ارا سال مالو بے وارث پِن کریسہ کڈ کروک جوْن نا چاہنداری زوراکی ئٹ بیگواہ بلوچ ورنا نا پن آن مسونے، خاہوت جون نا چاہنداری ءِ کرے اندن گڈی ہند باوہ پیرئی ئٹ علاقہ ٹی مرو ۔
جون نا چاہنداری جنوری 2021 ٹی خضدار نا علاقہ زہری آن زوراکی ئٹ بیگواہ ناصر جان قمبرانی نا پن آن مسونے۔
ذرائع تا ردئٹ پن کروک ورنا ءِ اسہ دروغ نا مونتس اسیٹی کسفنگاسس اوکان گڈ اونا جوْن ءِ کوئٹہ ٹی اسپتال آ دننگاسس۔
جون نا وے چاہنداری نا سوب آن اودے بے وارث پن کننگ آن گڈ کوئٹہ کیب ئٹ مستونگ نا علاقہ دَشت تیرہ میل قبرستان ٹی کڈ کننگا۔
ذرائع تا ردئٹ ورنا نا خاہوت ءِ حوال رسینگنگ آ قبر ءِ پٹیسہ جوْن ءِ جند ئنا تا علاقہ زہری دننگا ہراڑے اینو اودے کڈ کریسہ نماز جنازہ ءِ خواننگو۔
کاؤنٹر ٹیررازم ڈیپارٹمنٹ 30 اگست 2021 آ ڈی سی خضدار و ڈی سی آواران ءِ اسہ خط اس گداراسس ہراٹی پاننگاسس کہ ناصر فاروق ولد غلام فاروق ہند صادق آباد زہری خلنگانے۔ سی ٹی ڈی تینا خط ئٹ پن کروک ورنا ءِ دہشت گرد پن کرینے۔
اندن اندا خط ئٹ پین مسہ بندغ غلام جان ولد باران ہند بائی پاس کوئٹہ، عبدالقیوم ولد زہری خان ہند زہری خضدار ، کمال خان ولد باہوٹ ہند چکی آواران نا خلنگ نا نوشت کرینو۔
اندا خط ئٹ نوشت کننگا کہ پن کروک بندغ آتے بے وارث پِن کریسہ ایدھی نا ذریعت ئٹ کڈ کننگانے۔ واہم پن کروک خلنگوک آ تدینی تا حوالہ آن گیشتر شابیت حوال رسینگتنے۔