بلوچستان ئٹ غیرت نا پِن آ خوْن نا ویل
ٹی بی پی تیدری
زارین بلوچ
بلوچستان ٹی غیرت نا پنا خون ئنا ویل تدوکا کیہی دہائی آن ساڑی ءِ۔ دا ویل دود ربیدئی بنداو آتیا دود ہلکنے، ہرا نا ماس علاقہ ناکڑمب انگا دود ربیدہ و مذہبی عقیدہ ٹی خننگک۔ دا اسہ اندنو بےدادی نا عمل ئسے، ہرا ٹی بے شرعی جنسی تعلقداری نا دوبہ آ بندغءِ مرگ ئنا سزا تننگک۔ ہر سال، کیہی زالبول و نرینہ آتے دا وحشیانہ ڈوہداری تا گواچی کننگک، ہرافتیٹ زالبول تا کچ پاش وڑ ئٹ زیاتءِ۔
غیرت نا پنا کسفنگ ءِ وخت وخت “کارو کاری” پاننگک، ہرا خاص وڑ ئٹ بلوچستان نا نصیرآباد و جعفرآباد ضلع آتیٹ لس ءِ، ہرانگان نامخلوق سندھ ئنا ہندی سکان آتون دود ربیدئی و جغرافیائی تعلقداری تخرہ۔
بلوچستان ٹی لس وڑ ئٹ، دا عمل ءِ ‘سیاہ کاری‘ پاننگک، ہرا حرفی وڑ آ ‘سیاہ کاریم ‘ تا معنی تخک۔
غیرت نا پنا خون ئنا چیڑ ہلوک دود باز ڈکھیائی و بے منطقی ءِ : اگہ کس ئس برام آن مُست یا برام آن پد کس تون بے شرعی تعلقداریتخا تو لس سوچ دادے کہ او خاؤت و چاگڑد نا شرف ءِ لتاڑانے۔ دا خیال ہم جاگہی مسنے کہ شرف ئنا بحالی بیرہ ہمو بندغ نا کسفنگئٹ منکن مننگ کیک ہرا کہ داڑان چپ ہنانے۔
بلوچستان پوسٹ دا سال ئنا بنداوی تُو آن ہلیس داسکان بلوچستان ٹی غیرت نا پنا خون ئنا نوہ تدینی رپورٹ کرینے، ولے چاہندار آتاپاننگ ءِ
کہ اصل کچ داکان باز زیات مننگ کیک۔ عورت فاؤنڈیشن، ہرا زالبول تا حق ئنا رکھ و دیمروی کن کاریم کیک، تینا 2021 ئنا سالانہرپورٹ ئٹی بلوچستان ٹی غیرت نا پنا 49 خون ئنا پارینے، ہرافتیان 27 بیرہ نصیرآباد ضلع ٹی مسنو۔
پاکستان نا بندغی حق آتا کمیشن نا 2022 نا سالانہ رپورٹ نا رد ئٹ، بلوچستان ٹی غیرت نا پنا کم و ود 35 خون مسنو، ہرافتیٹزالبول تا کچ زیات اس۔ داڑے پاننگ المی ءِ کہ زیات اندا گمان کننگک کہ اصل کچ ئنا اندازہ کننگ کبین ءِ انتئے کہ باز آ تدینیک رپورٹمفسہ۔
ہیومن رائٹس واچ نا رپورٹ نا رد ئٹ، غیرت نا پنا خون نا گواچی گیشتر ہمو بندغ آک مریرہ ہرا چاگڑدی بند آن پیشتمنگ آن کوشستکیرہ۔ زالبول تیکن تینا پُچ، تعلیم، یا پیشہ نا گچین کننگ، ٹہفوک برام تا برخلافی کننگ، خاؤت نا رزا آن بیدس برام کننگ، طلاق ناخواست کننگ، یا برام آن مُست یا پد جنسی تعلقداری تخنگ۔ دا غٹ غیرت نا پنا کسفنگ نا سوب مننگ کیرہ۔
ایمنسٹی انٹرنیشنل نا رد ئٹ “غیرت نا پنا گیشتر زالبول و مسنک کسفنگرہ۔“۔ ولے دا ہم گواچنی سے کہ نرینہ آک ہم دا ویل ئنا گواچیمریرہ۔
بلوچ چاگڑد تینا محافظانہ نقطہ نظر کن پنی ءِ، ہراڑے پاننگک کہ “عزت مرے پن مرے تےمف” حکمرانی کیک۔ بلوچ آک تینا دود و رسم آتاتقریباً جذباتی جوش تون قدر کیرہ، و زور آوَری ئٹ تینا دود ربیدہ و دیہاڑ ءِ پیشن نا دخل نا برخلاف رکھیرہ۔ و اوفتا مذہبی دود اتونسوگوی ئٹ تفوک مننگ علاقہ ٹی غیرت نا پنا ودوکا کوش ئنا سوب مریک۔
2008 ئنا اسہ تدینی ئس غیرت نا پنا کسفنگ و اوڑتون تفوک ذہنیت نا شاہدی ءِ۔ 2008 ئٹی بلوچستان نا ضلع جعفرآباد ٹی عُمرانیقبیلہ نا بندغ آک غیرت نا پنا پنچ زالبول ءِ بےدادی ئٹ کسفیر۔ ہرا وخت دا تدینی پاکستانی سینیٹ ٹی ہنا، تو اسرار اللہ زہری، ہرا کہاسہ وزیر ئس و مسکوہی وزیر اعلیٰ ثنا اللہ زہری نا ایلم ءِ، دا خون آتا دفاع ءِ کرے و دادے “ننا کیہئ سال تا دود” پارے و دا نا مخ تفیءِ کننگ نا ہم قول کرے۔
بلوچستان نا منَہ خاص علاقہ، اندن کہ نصیرآباد، جعفرآباد و سندھ ئنا سیمی علاقہ آتیٹ، ہونر کِلنگ نا اسہ بیم تروک سوب ئس زالبولتا میراتی حق ئنا کُننگ ءِ۔ دا باز اوسوزناک ءِ کہ باز آ خاؤت آتا نرینہ آک زالبول تے اوفتا جائز حق آن پد بٹرہ۔ دا نرینہ آتا گیشتر طریقہکار اندا مریک کہ او زالبول تیا دروغ ءُ دوبہ خلیر، تاکہ او زمین و ایلو میراتی مڈی تیا کوزہ کننگ کیر۔ دا نا بھرم ٹی دننگا دوبہ آک ہونرکِلنگ نا سوب جوڑ مریرہ ہرا دا زالبول تا زند ءِ پھلیرہ۔
قبائلی سردار یا ‘تمندار‘ و سیدز ، ہرا کہ کمیونٹی نا روحانی موہبر مریرہ، دافتا تینا جند ئنا مسخت آک مریرہ۔ زالبول تا حق آتا باسکحمیدہ نور بلوچستان پوسٹ تون تران کرِیسہ پارے کہ، “او ہامدیکا ہونر کِلنگ نا اہمیت ءِ ودفرہ و دا نا کنڈ آ پام ایترہ، انتئے کہ داڑاناوفتے زیمی مروک خاؤت آتا نیام ئٹ صلح کننگ نا ذریعت ئٹ بھلو کچ اسیٹ مالی سواد ارفنگ نا سہولت دو بریک ۔” او پارے کہ ” داسڑدار و سید آک مصالحت نا پیسہ آتا بھلو بشخ اس دوئی مریرہ، و تینا اختیار آتے علاقہ ٹی سوگو کیرہ۔ بیرہ اندا آخہ بلکہ او زیمیمروکا زالبول تے تینا وس ئٹ تخنگ کن باز وخت اوفتا زرا آن بیدس جنسی عمل آ ہم اوفتے بیوس کیرہ۔ زالبولک دا ویل ئنا بوجھ ءِ ارفرہ،تینا تیوہ غا زند ءِ اوسوزناک حالیت ئٹ گدریفرہ۔
نور پارے کہ سڑدار برجاء پٹ و پول اٹ مریرہ کہ اسہ مقدمہ ئسے آن اوفک مالی سواد ارفنگ کیر۔ او خدو مروک اسہ تدینی ئسے ناحوال ءِ تس کہ ہراٹی اسہ ورنا نرینہ و اسہ پیر ءُ زالبول ئسے آ سیاہ کاری نا دوبہ خلنگاسس۔ ہندی سڑدار دا مقدمہ ءِ “غیرت” نا ویلجوڑ کرے و خواست کرے کہ دوبہ دار یا گڑاس زر ایتے یا مرک اکن تیار مرے۔ “او پیر انگا زالبول شار ئٹ پیری کریسہ مخلوق ءِ داپاریسہ کرے: ‘دا مار کنا نواسہ تا ہم سن ئسے! ای اوڑتون دنو گڑاس امر کننگ کیوہ؟‘ اُلسی بے باوری سڑدار ءِ بے وس کرے و او تینافیصلہ ءِ واپس ہلک۔“
نصیر آباد و جعفر آباد نا علاقہ غاک خاص وڑئٹ سندھ آن خڑک مننگ نا سوب آن غیرت نا پن آ خوْن تیان زیات زہمی ءُ، و داڑے دنو لسکوش مننگ ءِ۔ لیویز، ہرا بلوچستان نا زیات علاقہ غاتیٹ بست و بندی واک تخک، قبائلی بندغ آتا تاثیر اٹ بریک۔ دا افسوز نا حالیت ئسےکہ دا علاقہ غاتیٹ مقدمہ بھاز کم نوشت مریرہ، بلکن زیات وخت اوفتے عدالت اسکان سر کننگ مفک۔ عورت فاونڈیشن نا رپورٹ نا ردئٹ،غیرت نا پن آ خوْن نا ردئٹ بلوچستان ہائی کورٹ ئٹ 2004 آن گڈ ہچو مقدمہ اس ہتنگتنے، ہرا یخیناً گوڑیفوک ہیت ئسے۔
غیرت نا پن آ خوْن نا الّمی ساڑی مننگ نا اسہ بشخ اس، پٹ و پول ئٹ کمبوتی نا سوب ئٹ ودی مسونے، “حمیدہ نور پارے۔ “بھاز وار،پولیس و لیویز بیرہ غیرت نا پن آ خوْن ءِ الّمی سرپد مریرہ و اوفک ہمو بندغ آتا برخلاف قانودی کاروائی کننگ ئٹ بے سُہب مریرہ ہرافکذمہ وار ءُ، پین دا کہ، او زنا نا دوبہ ئٹ پٹ و پول ئٹ بھیم نا درشانی کیرہ و خلیس بش کروک گواچن دادے کہ، اوفک رکھ خواہوک زہمیتے سڑدار یا سید آتا دوٹی ایترہ۔ دوارہ دا زہم تخوک بندغ آک مظلوم آتا خوْن ئنا پرمان ایترہ یا اوفتیان زَر دوئی کیرہ۔ جُوان پٹ و پولو ورندی ہلنگ نا کمبوتی غیر نا پن آ خوْن نا حالیت ءِ برجاء تخانے و ڈوہدار تے سزا آن رکھنگ نا موْکل ایتک۔“
پاکستان ئٹ غیرت نا پِن آ کسفنگ ءِ بے قانودی کننگ نا کوشست آتا دیہاڑ ساڑی ءِ۔ دا کوشست آتا اولیکو لڑ کم و وَد اِرا دہ یک مالو،2004 ئٹ بناء مس ہراتم بنجائی اسلمبی غیرت نا پِن آ خوْن نا برخلاف قانود نا امنائی تس ہرا غیرت نا پِن آ خوْن نا ڈوہدار تے سزاتننگ نا بناء کرے، ولے، دا قانود ئٹ اسہ بھلو ہورکی اس خننگا ہرا سیال آتے اسلامی قانود تس ہرانا کمک ئٹ تینا خڑک ڈوہدار تا مختفی نا حق تس۔ دا کمبوتی نا رِدئٹ، زہمی بندغ نا وارث خوْنی ءِ بشخنگ کیک، ہرانا سوب ڈوہدار ءِ ہچو سزا اس مفک۔ دا خاص وڑئٹفریشان کروک ءِ کہ خوْنی لس وڑئٹ تینٹ خاہوت نا بندغ آک مریرہ۔
2016 ئٹ، بنجائی اسمبلی غیرت نا پن آ خوْن نا ایسری نا پارہ غا اسہ اہم ءُ گام اس ارفے ہراتم اوفک ‘اینٹی–ہونر کلنگ‘ قانود ناامنائی تسر۔ دا قانود بڑز پاننگوک کمبوتی ءِ ایسر کننگ نا مسخت ئٹ جوڑ کننگاسس و دا ڈوہدار تیوہ غا زند قید نا پرمان تس،داڑاسکان کہ اگہ زہمی بندغ نا وارث آک خوْن ءِ بشخانو۔ واہم، دا قانود نا مننگ آن گڈ ہم، دنو وخت بس کہ ہراڑے زہمی تے انصافدوئی مننگ کتئو۔
قندیل بلوچ نا ایلم نا کمک ئٹ مروک اونا خوْن نا پنی آ مقدمہ ئٹ، ڈوہدار ایسری یلہ کننگا۔ اونا وکیل دعویٰ کرے کہ دا قانود خوْن آن گڈامنا کننگاسس و اندا سوب دا مقدمہ غا بفک۔ داڑان بیدس، قندیل بلوچ نا لمہ تینا ایلم ءِ بشخا، و جج دا فیصلہ کرے کہ دا غیرت نا پِن آخوْن ئنا تدینی اس اف، ہرا دا مقدمہ غاتا غنجل مننگ ءِ درشان کیک۔
بلوچستان حکومت ہم زالبول تا دیمروی و جنسی برابری نا پارہ غا اسہ گام اس ہمو وخت ارفے ہراتم اوفک 2020 ئٹ زالبول تا دیمروی وجنسی پالیسی بل ءِ امنا کننگا کہ بلوچ زالبول تے سیاست و چاگڑدی معاملہ غاتیت جاغہ تننگ نا ہند رسینگہ۔ ولے، دا الّمی ءِ کہ نن مننکہ بیرہ قانود سازی کڑمبی تیٹ روتہ خلوک چاگڑدی رویہ غاتے ایسر کننگ و جنسی بے دادی تا لڑ ءِ پرغنگ کن گنج اف۔ ویل ئںا سوبدادے کہ بلوچ چاگڑد Male dominated ءِ ہراڑے زالبول تے ایلو درجہ نا شاری تیٹ تخنگانے، ہراٹی اوفتا آزاتی و اوفتا توار ءِپرنچگانے۔ دا بدلی خاہوت و ٹَک آتا تہہ آن، چُنکا پِڑ آن مننگ الّمی ءِ۔
بلوچ چاگڑد ئٹ ‘دود‘ ئنا پن آ برجاء خوْن تا برخلاف جُوان سرپدی و شعور ودی کننگ کن بیرہ قانود سازی نا گامک بس افس، بلکنداڑکن پورو ٹکہ ئی کمک و احوالکاری نا کوشست ہم الّمی ءِ۔ ننے چاگڑد ءِ دا سرپد کننگ نا خواست ءِ کہ دا ویل بیرہ ‘غیرت‘ نا بابت افبلکن دا خوْن ئنا بابت ءِ۔
بیرہ معلومداری زیات کننگ، تعلیم تننگ و ٹَک ئتون احوالکاری نا کمک ئٹ نن امیت کننگ کینہ کہ نن دننگا ربیدگی اصول آتے پرغنگکیوہ ہرا دننگا بے دادی تے تخیرہ۔