چین ئنا سرکاری میڈیا 22 جون پنچ شمبے نا دے حوال تس کہ چین ئنا شار این چوان نا اسہ ریستوران ئسے ٹی مروک تراک ئٹی کمآن کم 31 بندغ کسکنو۔
چینی خبر تروک ادارہ ژنہوا نا ردئٹ دا تدینی ٹی پین ہفت بندغ شیشہ آتا پِننگ، اُشنگ و تَڑنگ آن ٹپی مسنو، ہرافتا اسپتال ئٹ علاجمننگ ءِ۔
حوال تا رد ئٹ تراک چار شمبے نا نن ہندی وخت ئنا ردئٹ تقریباً ہشت بجہ و 40 منٹ آ مسنے۔ ننگ شیا ہوئی صوبہ ہراڑے گیشترمسلمانک رہینگرہ روایتی وڑ آ خود مختار علاقہ سے و اونا بنجائی شار این چوان ءِ، ہرا نا اسہ کوچہ سیٹی دا تدینی اسہ بار بی کیوریستوران ئسے ٹی مسنے۔
خبر تروک ایجنسی ژنہوا علاقئی کمیونسٹ پارٹی نا کمیٹی نا باروئٹ حوال تسنے کہ تراک”لیکویفائیڈ پیٹرولیم گیس (ایل پی جی)” ہِننگنا سوب آن مسنے۔
چین ئنا سرکاری حوال تروک ادارہ سی سی ٹی وی تراک نا ہند آ اسہ درزن آن زیات خاخر کسفوکو گاڑی کاریم ئٹ اختہ شان تس، واندا وخت آ ریستوران نا ایلو کنڈ آن اسہ بھلو کونڈ ئسے آن موڷ ئنا جھمر بش مننگ ئس۔
دا فوٹیج ئٹ کوچہ آتیٹ تموک شیشہ نا ٹُکر ہم تموک شان تننگا۔