Men in the sun
نوشتکار: غسان کنفانی
براہوئی چشمانک: رابعہ بلوچ
غسان کنفانی 1936 ئٹ فلسطین ئٹ ودی مس۔ او اسہ نوشتکار و Liberation of Palestine نا باسک اس ئس۔ غسان کنفانی نا نوشتہ کننگ نا مسخت تینا راج ءِ سیاسی شعور تننگ، تینا حق آتے پوہ مننگ و تینا حق آتیکن سوج کننگ ہیل تروئی ئس۔ غسان کنفانی 1972 ئٹ لبنان ٹی کسفنگا۔
غسان کنفانی اندا سوب آن دا کتاب ءِ نوشتہ کرے تانکہ جہان ءِ تینا راج نا بزگی آن پامدار کیو و تینا راج ئٹ سوج کننگ و تینا حق آتے دوئی کننگ کن شعور ودی کیو۔ غسان کنفانی مسہ فلسطینی باہوٹی (ہرا تینا چنا و ہرا والا تیکن بیوس ابو قیص، تینا لمہ و ہیڑ و ایلم تا خواست آتے پورو کننگ کن مروان و اسد ہرادے کہ اونا الہ تینا سالم کننگ خوائسکہ و اودے لگاکہ کہ اسد اونا کمک آن بیدس کویت آ اننگ کن پیسہ برابر کننگ کتوکہ، تینا بیوسی و خواست آتیکن تینا ڈیہہ ءِ النگ نا و کویت آ پوریا کن اننگ نا فیصلہ ءِ کریر) تا بارو ئٹ نوشتہ کیک۔
کویت آ اننگ کن اوفتے گریزر ئسے نا بکار ئس۔ و اوفتے کویت آ گریزی کننگ نا ذمہ واری ابو الخیزران ارفے۔ ابو الخیزران کویت نا پنی ءُ سوداگر حاج ردا نا ٹانچی سے نا ڈرائیور ئس۔ حاج ردا نا سوب آن ابو الخیزران ءِ سیم آن ایپار مننگ ئٹ ہچ وڑ ئنا ویل الو۔ ابو الخیزران بھاز پیسہ کٹنگ خوائسکہ ہندا سوب آن او بندغ آتے کویت آ گریزی کننگ نا فیصلہ ءِ کرے۔ ابو الخیزران، ابو قیص، اسد و مروان ہر مسٹ ءِ اندا فیصلہ غا امنا کرے کہ کسر ئٹ ارا چیک پوسٹ بریرہ و ہر چیک پوسٹ آن مست ابو قیص، مروان و اسد ءِ ٹانچی نا تہٹی انوئی ئس و چیک پوسٹ آن مچے مر اوفتے پدا ٹانچی آن پیشن بروئی ئس۔ ولے اگست نا توہ ئس و ٹانچی نا تہٹی اگست نا سخت انگا باسنی ءِ سگنگ چنکو ہیت اس الو۔ تینا لاچاری و بیوسی تا سوب آن ہر مسٹ تا اننگ کن بیدار مسر۔ پگہ کن سہب ئنا وخت آ ابو الخیزران نا ٹانچی ٹی تینا سفر ءِ بناء کریر۔ دے ئنا پدینی و اگست نا باسنی سگ آن پیشن ئس۔ منہ گھنٹہ سفر کننگ آن پد صفوان نا چیک پوسٹ خڑک بس۔ ابو الخیزران اوفتے ٹانچی نا تہٹی اننگ کن پارے۔ ہر مسٹ ٹانچی نا تہٹی انار۔ ٹانچی نا تہٹی باسنی خاخر نا باسنی آن کم الو۔
ابو الخیزران ءِ صفوان نا چیک پوسٹ آن فارغ مننگ ئٹ شش منٹ لگا او پدا ذووئ ٹی سفر ءِ بناء کرے۔ چنکو مش ئسے آن ایپار صفوان نا چیک پوسٹ ڈکھنگا۔ ابو الخیزران ٹانچی نا با ءِ ملا، مروان، اسد و ابو قیص پیشن بسر۔ اوفتا مونک باسنی آن خیسن مسوسر، اوفتا پچ آک خید آتیان چڑاسر، اوفک پاریر کہ دا ہمو دوزخ ءِ ہرا نا بارو ئٹ کہ نن بنگسن۔ منہ گھنٹہ غان گڈ اوفک متلا نا چیک پوسٹ آن خڑک مسوسر۔ ابو قیص، مروان و اسد بیوسی آن ٹانچی نا تہٹی انار۔ ابو الخیزران اوفتے دلاسہ تس کہ داسا وخت یانزدہ نیم مننگ ءِ و ای ہفت منٹ ئٹ ہڑسینگوہ۔ ہندا ہیت ئتون ابو الخیزران ٹانچی نا با ءِ تفے و اسہ منٹ و نیم ئٹ ٹانچی ءِ متلا نا چیک پوسٹ آ سر کرے۔
ابو الخیزران کاغذ آتے ارفے و کوٹی سے ٹی پترینگا۔ آفیسر آک ابو چاقو تون اوار ابو الخیزران ءِ ہیت آتیٹی جل کریر۔ ابو باقر، ابو الخیزران نا منت آتیان گڈ کاغذ آتے دستخط کرے و ابو الخیزران کاغذ آتے اشتاف ئٹ ارفے و ٹانچی نا پارہ غا رمب کرے۔ متلا نا چیک پوسٹ کہ ڈکھنگا ابو الخیزران ٹانچی ءِ سلیفے و تینا گھڑی ءِ ہرا۔ گھڑی وخت ءِ دوانزدہ بجہ و نو منٹ پاننگ ئس۔ ابو الخیزران ٹانچی نا با ءِ ملا۔ اونا حالیت بھاز انگا خلیس و پشیمانی آن بے وڑ ئس۔ خید ئنا پڑی اس اونا پیشانی آن ٹانچی نا چت آ تما اسہ وار ئتون بارس۔ ابو الخیزران توار اس خلک “اسد”۔ ولے ٹانچی نا تہہ آن ہچ وڑو ورندی اس بتو۔
ہندن کہ تیار نا ابو الخیزران ٹانچی ءِ مش تیا درے و ہر مسٹ آ جون تے مش تیا خسا، اوفتا جیب آتیان پیسہ تے ارفے و پدا اننگ نا فیصلہ ءِ کرے واپسی نا کسر ئٹ ابو الخیزران نا ملی ٹی بھاز آ خیال آک بسر۔ اودے ابوقیص، مروان و اسد نا نا سرپدی و جان بڈی آ خار بننگ ئس۔ اونا ملی ٹی وار وار آ ہندا خیال بریسہ ئس کہ اوفک انتئے تینا زند ءِ رکھنگ کہ ہچ جہد کتور؟ اوفک انتئے ہچ ہیت کتور؟ انتئے؟ انتئے؟
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔