ارٹمیکو مسڑ | سیسیلیا اونگ – سعدیہ بلوچ

ارٹمیکو مسڑ

نوشت: سیسیلیا اونگ
مٹ: سعدیہ بلوچ

پنجامیکو دہائی نا خڑک ئنا ہیت ئسے، لیونگ چن او وخت پنچ سال ناس ئسک۔ اونا اسہ بھلو ایلم اس ئسک ہرانا سن ہشت سال و بھلا ایڑ نا سن شش سال ئسک۔ اندا ترتیب ئٹ، اونا مسٹمیکو نمبر ئس و بھلا لُمہ نا خن ٹی، او بیرہ اسہ ارٹمیکو بے دوست ءُ مسڑ اس ئسک۔

ہمو دے تیٹ، چین نا بھاز آ بھلا لمّہ غاک، نواسہ آتیٹ مسڑ نا جاگہ غا مار تا ودی مننگ ءِ زیات دوست تخارہ۔ و اندا سوب آن، لیونگ چن ءِ خاہوت ئٹ اسہ زیاتی ءُ باریم اس سرپد مسرہ انتئے کہ خاہوت ٹی مالو آن ہم اسہ مسڑ اس اونا بھلا ایڑ نا دروشم ئٹ ساڑی ئس۔  اونا لمہ اوڑتون بے کچ مابت کریکہ ولے اونا بھلا لمہ نا دماخ ئٹ اندا خیال روتہ خلکسس کہ ارا ٹی اسہ پین مسڑ نواسہ نا مننگ فریشانی آن بیدس ہچس الو۔ اندا خاطران، دوست تخنگ و وے دوست تخنگ نا دا غیر منصفانہ جنگ ٹی، او ہر مسہ چنا تیان کل آن زیات بد نیتی انداڑتون کریکہ۔ او ایلو چنا تیکن بھاز شنگر، ٹِکی ٹافی و پوسکن پچ ہلککہ ولے لیونگ چن نا قسمت ئٹ ہمو بسکہ ہرا ایلو چنا تا بچوکاک مسرہ۔ پنچ سال نا چنک سن ٹی، لیونگ چن آ زرس ہم زیم تمیتو۔ ولے اسیکہ اسیکہ او ہبکہ مسکہ کہ بھلا لمہ اونا ایلو ایڑ و ایلم ءِ ساندہ اودان جوان کُننگ و بیننگ کن انتئے ایتک و پدا او تینا لمہ آن اندا بابت سوج کریکہ، ہراتم اونا لمہ ربڑ نا رخت آتا شیرہ ءِ مُچ کننگ آن گُڈ بسکہ۔

اونا لمہ ءِ پاش وڑ ئٹ دا تیوہ حالیت نا معلوم ئس کہ اونا بلغڑ اونا چنکا مسڑ تون راستی بھاز زیات ناروائی کیک و اونا معصومیت نا بھاز فائدہ ءِ ارفک ولے اودے اسہ وار ہم مارشت متو کہ لیونگ چن بھاز زہین ءُ چنا ئسے۔ اندافتون اوار اوار زند برجاء ئس۔ بھلا لمہ نا سوختئی آن بچنگ کن، لیونگ چن سہب تون بش مننگ ءِ دوست تخاکہ و اسیکہ اسیکہ او نن ئنا دو بجہ آ ہم، تانکہ او لمہ تون اوار ربڑ نا ملک آتیا ہننگ کے و اوڑے تینا لُمہ تون ربڑ روتنگ کن کتّار ءِ ارفنگ کن کمک کے۔ لمہ اودے باسن ءُ پچ بیرفیکہ ہراتم او اوڑتون اوار ہناکہ۔ ہراتم ربڑ نا شیرہ مُچ کننگ نا مرحلہ بناء مسکہ، لیونگ چن، شیرہ مُچ کروک آ کتّار ءِ ارفیسہ وخت وخت تینا ہنر مندی ءِ نشان تسکہ و بھاز وار، ایسکان کہ شیرہ مُچ کننگ نا مرحلہ ایسر مسکہ، اونا تیوہ پژہ غاک شیرہ ٹی پھسینگوک مسرہ۔

سہب نا دہ بجہ، او نیرن کننگ کن پدا اراغا بسکہ و اونا لمہ زرس ” دلیہ ” و سور ءُ مچھی ئس نیرن کن جوڑ کریکہ۔ نیرن آن گڈ، اونا لمہ تولیسہ اونا پژہ آتیان شیرہ آتے صاف کریسہ اِرس کریکہ۔ اوکان گڈ، او پدا مُلک آتا پارہ غا شیرہ مُچ کننگ کن ہناکہ و پیالہ آتیٹ مُچ کروک شیرہ آتے بالٹی تیٹ شاغاکہ تانکہ اودے پدا، ربڑ نا گدام ٹی ہترینگے۔ ہراڑے اوار کروک شیرہ آتے تیزاب تون اوار کننگاکہ و اودے جوان ءُ دروشم اسیٹی بدل مننگ کن جتاء سانچہ آتیٹ شاغنگاکہ۔ سانچہ آتیان خاص وخت آن گڈ، دا شیرہ آتے اوار مننگ کن اسہ دباؤ سے آن گدریفنگاکہ۔ اوکان گڈ، ربڑ آتے بارِنگ کن دخانیہ ٹی ٹنگارہ تانکہ اوفتا ڈھیر جوڑ کریسہ بازار ئٹ گدرینگ مرے۔

اسہ سہب ئس، لیونگ چن بھاز ہُرے آ بش مس۔ اونا لمہ مالو کاریم کننگ کن ہناسس و مدان مدان پُڑ پُڑ مننگ ئس۔ او لمہ نا رند ئٹ ہننگ نا سوچا ولے اونا سمجھ ئٹ، اوڑکن ربڑ نا دا شابیت، مُلک آتیٹ تینا لمہ نا کسر ءِ  پٹنگ ارزان و رکھوک عمل اس الو۔ او تینا کسر ءِ  گیرام ہم کننگ کریکہ۔ انداڑکن او فیصلہ کرے کہ او تینا اُرا نا مون آ تولیسہ، لمہ نا پدا بننگ نا ودار ءِ کیک۔ اندا وخت ئٹ، اونا ایڑ و ایلمک بورچی خانہ نا ربڑی کُننگ نا میز آ تولوک ئسر و بھلا لمہ اوفتیکن باسن باسن ” دلیہ ” پلیٹ آتیٹ شاغنگ ئس۔ باسن باسن ” دلیہ ” آتا گند انداخس بینگنی ءِ ودفنگ ئس کہ لیونگ چن نا پڈ بینگنی آن ہسون مس۔ اندا خاطران او ہم، اوفتیان زرس مُر مرغنا میز نا ایسری کنڈ آ ہنا تُوس، اندا امیت تون کہ نوائے بھلا لمہ زرس ” دلیہ ” شاغے۔ واہم دا غٹ ئنا مننگ نا جاگہ غا، گندہ غا بھلا لمہ تینا وے دوستی نا درشانی ءِ بناء کرے و ہرفے کہ او انتس خوائک و او اِرغ کننگ نا میز آ انتئے بسنے۔۔۔۔۔؟ لیونگ چن نزوری و خلیس نا توار ئٹ ورندی ئس:

” است۔۔۔است۔۔۔۔۔ای ہم بینگن اٹ ۔۔۔ کنے ہم زرس ” دلیہ ” ایتبو ۔۔۔۔”

بھلا لمہ خوڑتی ئٹ اودے ہُرا، برنج آتا اسہ پیالہ ئس و باف کروک آ ” دلیہ ” آتے پیالہ ٹی شاغیسہ کرے۔ ولے پیالہ ءِ لیونگ چن نا مونا تخنگ نا جاگہ غا، او باسن آ ” دلیہ ” آتا پیالہ ءِ میز آ اونا پارہ غا دِھکہ تس۔ پیالہ میز آ لڑونج مس و سیدھا لیونگ چن آ تما۔ لیونگ چن خلیس و دڑد ئنا ترندی آن چیہانٹ خلک انتئے کہ پیالہ میز آن سِٹیسہ سیدھا اونا کُٹ ئٹ تمیسہ خالی مس۔ اونا ایڑ ایلمک، اودے کمک کننگ و تسلی تننگ کن رمب کریر بسر۔ ولے بھلا لمہ اسہ وار پین اودا چِڑا کہ او انتئے آمخ ئسے کہ باسن باسن ” دلیہ ” آتیان بے چکاری کیک۔ او رٹیسہ چیہانٹ خلیسہ معصوم آ مسڑ ءِ گھریسہ تینا کوٹی ٹی درے و تینا او شیطانی عمل نا دارو درمان نا وڑ ئٹ زو زو ہُور کروک آ پوتڑو تا ملَم پٹی کننگ ءِ بناء کرے۔ اوکان گُڈ، لیونگ چن، چُپی ئٹ آڑسندہ کشیسہ اُرا نا مونغی آ توس، لمہ نا زوت ئٹ بننگ نا وداری کننگ ءِ  بناء کرے۔ ہراتم اونا خڑینک آک اونا کلک آتیا تمیسہ ئسر گڑا او گوڑینگوک سوچ خلنگ ئٹی ئس کہ بھلا لمہ اوڑان داخس خار انتئے کیک۔۔۔۔؟ او دُنو انت ردی اس کریسس۔۔۔؟ بھلا لمہ بیرہ اوڑتون فرخی سلوک انتئے کیک۔۔۔۔۔۔اندن اونا ایڑ ایلم تون انتئے کپک۔۔۔۔۔ ؟

اندن اونا لمہ پدا بس گڑا اودے تیوہ حالیت نا گمان مس و او تینا غصہ ءِ توننگ کتو۔ داسا تو ہر حد ایپار مسس۔ او معصوم آ چنا دُنو انتس کریسس کہ اوڑتون داخس بےدادی ئٹ سلوک کننگاسس۔۔۔؟ اونا بلغڑ تون بھلو جنگ اس مس و سوگوْ ارادہ کرے کہ او دا بےدادی کروک آ اُرا ءِ الیک و تینا ارِغ آ کائک ہرا ایلو شار ئٹ تینا پوریا کریکہ۔ او دا ظالم آ نیاڑی نا تینا چناتون بےدادی آ سلوک ءِ بھاز سگاسس و خاص وڑ ئٹ چنکا لیونگ چن تون۔ ہمو دے شام ئنا، او تینا ہر مسہ چنا کن ریل ئنا ٹکٹ آتے شیف ئنا خلق آن ہیسک۔ دا سلسلہ ءِ اسہ وار ساندئی کن ایسر مروئی ئس و اوڑتون اُرا ءِ الینگ آن بیدس ہچو کسر بچتویسس۔ او تینا ارِغ تون اوار انتئے رہینگتوکہ، اونا بیرہ اسہ سوب اس ئس کہ اودے دا پیرنگا نیاڑی نا تنیائی نا احساس ئس۔ داسا، اودے داڑے سلینگ کن جہان نا اسہ تاغت اس ہم توننگ کتوکہ، شاید اسہ بھاز بھلو سوب اس ہم۔۔۔۔۔۔

بیست سال تدینگار۔ لیونگ چن داسا بیست و پنچ سال ناس مسس۔ اونا لمہ و باوہ ورنائی ٹی کذیت کریسر۔ داسا او اسہ سرسہب ءُ تاجر اس ئس ہرا معاشیات و پوریائی کاریم تیٹی تینا خواننگ ءِ  پورو کریسس۔ اونا ایڑ و ایلمک برام کریسر و ڈیہہ ءِ الیسہ پیشن ہناسر۔ اندا دے تیٹ، اودے بھلا لمہ نا ناجوڑی نا حوال رسینگا۔ پیرنگا بزرگ ءِ است ئنا ناجوڑی مسس و اونا جانجوڑی پین خراب مننگ ئس۔ لیونگ چن باسن باسن ” دلیہ ” والا تدینی ءِ دائسکان گیرام کتویسس۔ واہم او تدینی ءِ  بیست سال تدینگاسس۔ اوڑکن دا تدینی اندن ئس دنکہ درو نا ہیت اس مرے۔ نشان آتے خناکہ گڑا وخت وخت، او دائسکان ہم ہمو ہشنگنگ نا دڑد ءِ محسوس کریکہ ہراتم باسن آ ” دلیہ ” آک اونا کٹ ئٹ تمار واہم او تینا بھلا لمہ ءِ بشخاسس۔ او اسہ وار تینا لمہ آن ہرفیسس کہ بھلا لمہ کنتون دُنو فرخی سلوک انتئے کریکہ۔۔۔۔ ؟

اسہ سہب اس، ہراتم او کاریم آ ہننگ کن تیار ئس گڑا لیونگ چن ءِ لمہ نا ایڑ نا پارہ غان اسہ ٹیلی گرام اس دوئی مس کہ اونا بھلا لمہ کذیت کریسس۔ اونا جنازہ ٹی اوار مننگ المی ئس۔ لیونگ چن ءِ امیت ئس کہ بھلا لمہ نا ہڑتوما دوست انگا چناک، اونا بھلا ایلم و ایڑ، جنازہ کن الم برور۔ ولے افسوز کہ اوفتیتون جوانو بہانہ اس ئس کہ او دا وخت بھاز مُر ئسر و ارا غا بننگ کن، دا بھاز چنکو وخت اسیٹی ہُرے آ سر کروک حوال اس ئس۔

ہراتم او متکنا بے ترتیب لمہ باوہ نا اُرا ءِ رسینگا گڑا دڑدی آ یات آتا اسہ سیلاب اس اودے پلویڑ کرے۔ ہمر کہ او بھلا لمہ نا جنازہ ٹی اوار توس، او چُپی ئٹ پیرنگا نا مون ئنا کھوس آن پُر انگا دروشم ءِ ہُرا۔ اودے اندا محسوس مس کہ اندن بھلا لمہ خاچوک ءِ، اونا دروشم ئٹ بھاز سکون ئس۔ است ئنا ہُب ئٹ، او دعا کرے کہ خدا اونا بھلا لمہ نا روح ءِ بشخے، داڑان بیدس ہم او اخس سگاسس۔ غم ئنا خڑینک آک اونا کلک آتیان تمیسہ کریر، ہراتم او چُپی ئٹ تینا بھلا لمہ کن دعا کرے ہراڑتون او بھاز زیات مابت کریکہ اگہ اودے اسہ اندنو موقع اس دوئی مسکہ۔ او یات کرے کہ اونا کہوک آ لمہ اودے پاریسس، ہراتم او ہرفیسس کہ بھلا لمہ اوڑتون دُنو فرخی سلوک انتئے کیک۔۔۔۔۔۔۔اونا ڈوہ انت ءِ۔۔۔۔۔۔۔؟

پیرنگا نیاڑی ہم چنکی آن اندنو حالیت ئسے آن گدرینگاسس و بھلا لمہ نا مابت آن محروم مسس۔۔۔۔۔۔۔۔بیرہ و بیرہ اندا خاطران کہ او ہم ودی مروک آ۔۔۔۔۔۔۔۔۔۔۔۔ ارٹمیکو مسڑ ئس۔