بلوچستان ئٹ ریاستی کار شون مڈیک
ٹی بی پی سرگپ
شورش آن زیمی بلوچستان ئٹ ریاستی رٹ بحال کننگ کن پاکستان نا اختیار دار کڑدہ غاک کیہی پالیسی تے جوڑ کرینو، ہرافتیٹ گمانی وڑ ئٹ ڈیٹھ اسکواڈ نا وسیلہ ئٹ سیاسی ادارہ تا زیم ءِ ایسر کننگ، سیاسی باسک آتا زوراکی ئٹ بیگواہیک و ریاستی ادارہ تیان اختلاف تخنگ آ خون ہم اوار ءِ۔
ریاست آ دا دوبہ خلنگک کہ بلوچستان نا جتا علاقہ تیٹ، نشہ بہا کننگ، مذہبی شدت پسندی، لینڈ مافیا ریاستی مُخ تف سردار و بلوچ آجوئی نا مخالف بندغ تا زی آ ڈیتھ اسکواڈ جوڑ کرینے۔ ہرا ریاست نا تہٹی ریاست نا کڑد سر تننگ ءُ۔ دا ڈیتھ اسکواڈ آتیتون پاکستان نا حکومت آن ہم زیات تاغت ارے و ریاستی اختیار دار کڑدہ غاک دافتے آجوئی نا جنز ءِ توننگ یا ایسر کننگ نا بدلہ ئٹ، دُزی، داڑیلی، زر اکن برمتہ و خون کننگ نا تیوہ آزاتی تسنو۔
دا ڈیتھ اسکواڈز آتیان اسٹ خضدار نا تحصیل وڈھ ئٹ شفیق مینگل نا سروکی ٹی ٹہیفوک ءِ۔ برجاء دے تیٹ مینگل قبیلہ نا سردار و بلوچستان نیشنل پارٹی نا سروک سردار اختر مینگل و شفیق مینگل وڈھ ئٹ اسٹ ایلو نا برخلاف سنگر ہلکنو و تین پہ تین آ دوبہ خلنگ ءُ۔
بلوچستان نیشنل پارٹی شفیق مینگل نا برخلاف تیوہ بلوچستان ئٹ پہیہ جام ہڑتال کرینے و اوفک شفیق مینگل آ دوبہ خلیرہ کہ او ریاستی سروکی ٹی تاغت نا وسیلہ ئٹ بلوچستان ٹی بندغ تے خُلیفنگ و برمتہ کننگ ئٹ اوار ءِ۔
شفیق مینگل آ دا دوبہ ءِ کہ او آجوئی دوست پارٹی تا باسک آتا زوراکی ئٹ بیگواہی و خون تیٹ اوار ءِ، توتک نا اشتماعی قبر آتے شفیق مینگل تون تفنگک و بلوچستان ئٹ مذہبی شدت پسند آتا تربیت و باہوٹ تننگ ئٹ ہم اوار ءِ۔ شفیق مینگل تون حکومت آن ہم زیات تاغت ارے و خضدار ئٹ لیویز نا ہشت کارندہ تے کسفنگ آن بیدس آزاتی ئٹ زند گدریفنگ ءِ۔ شفیق مینگل نا برخلاف ثبوت آتیان بیدس ہم عدالت یا حکومت ہچو گام اس ارفپک۔
شفیق مینگل و ہوتمان کون آ بندغ آک ریاست نا کار شون مڈیک ءُ، وخت و حالیت آتا ردئٹ او چھپ مریرہ ولے خواست آتا ردئٹ اوفتے پدا پوسکنو ذمہ واری تننگک۔ پاکستان و بلوچستان ئٹ گچین کاری تا تیاری مننگ ءِ و گچین کاری تا خڑک بننگ تون شفیق مینگل ءِ خضدار ئٹ دوارہ متحرک کننگانے و کیچ ئٹ گمانی ردئٹ نشہ بہا کروک آتا سروک ہوتمان ءِ ریاستی تاغتور کڑدہ غاک ڈسٹرکٹ کونسل نا کماش گچین کرینو۔ ڈیتھ اسکواڈ و نشہ بہا کروک آتا بابت ریاستی پالیسی تیان بلوچستان نا لکھ آ بندغ آک زیمی ءُ و اگہ دافتا دا پالیسیک چرجوئی ئٹ برجاء مسر گڑا بلوچ الس نا بے باوری گیشتر مرو۔