کوئٹہ ٹی ڈوہ تا تدینی تیٹ ودکی، شاریک فریشان، گمانی وڑ ئٹ لٹنگ نا وخت سم کاری آن ارا بندغ مرگ ئنا گواچی مسر۔
بلوچستان نا غٹ آن بھلا شار و دارالحکومت ڈوہدار بندغ آتا رحم و کرم آٹے ہراڑے شاریک دُز آتا دوتیان تینا سامان و گیشتر گڑاتے گوئنگ ءُ ہموڑے اسہ تُو نا نیام ئٹ 7 شاری دا تدینی تیٹ کسفنگانو۔
اینو کوئٹہ سریاب ٹی قمبرانی روڈ آ موٹر سائیکل پُلنگ نا وخت مزاحمت کننگ آ ارا شاری نا خون کننگا، تدینی نا برخلاف سریاب روڈ نا ہندیک ٹائر ہشیسہ برانز بناء کریر۔
سم کاری ئٹ کسفنگوک ہڑتوما بندغ آک عبدالکریم و اعجاز احمد مار و باوہ ئسر، تدینی آن شاری تیٹ خلیس تالان مسونے۔
برانز کروک آتا پاننگ ئس کہ بھلا بست و بند و سیکورٹی کوالخواک شار ئٹ امن و امان نا حالیت ءِ کنٹرول کننگ ٹی وے سوبری نا درشانی کننگ ءُ شار دُز آتا رحم و کرم آٹے برانز کروک آک وزیر اعلیٰ آن تدینی نا نوٹس ہلنگ نا خواست کرینو۔
شاری تا ردئٹ کوئٹہ ٹی ڈوہ تا تدینی تیٹ دے پہ دے آن ودکی مننگ ءِ اسہ تُو ئنا نیام ئٹ ہفت بندغ نا بے دڑدی ئٹ خون کننگانے اندن کوئٹہ نا ہندی تا مال تون اوار داسا جان ہم رکھوک اف۔
برانز کروک آتا خواست ءِ کہ قمبرانی روڈ تدینی ٹی اوار مروک ڈوہدار آتے زو دزگیر کننگے اندن شار نا خراب مروک آ حالیت ءِ توننگ کن بست و بند زوت ئٹ گام ارفے۔