بلدیاتی گچین کاریک: قوم پرست آتا بے سُہبی
ٹی بی پی سرگپ
بلوچستان نیشنل پارٹی و نیشنل پارٹی نا سروک آک تینا جماعت آتے بلوچستان نا قوم پرست جماعت و تینا سیاست نا محور بلوچ راجی ویل آتے تکیرہ۔ اوفتا سیاسی چاہندی پاکستان نا بنجائی پارٹی تیان جتا ءِ ولے دا زوت ئنا گچین کاری تیٹ اوفتا پاکستان نا بنجائی پارٹی تا مون ئٹی بے سُہبی بلوچستان ٹی اوفتا سیاست ءِ گونڈ کننگ ءِ۔
بلوچستان نا سی و پنچ ضلع آتیٹ اڈ ہلوک بلدیاتی گچین کاری تیٹ بلوچستان نیشنل پارٹی و نیشنل پارٹی بیرہ منَہ ضلع آتا نشست آتیا کٹانو۔ ضلع کیچ ہرا نیشنل پارٹی نا قوم پرستانہ سیاست نا بنجاء ءِ اونگان نا ضلع کونسل نا چِئرمین پاکستان پیپلز پارٹی نا اومیت وار گچین مسنے و ضلع خضدار ہرا بلوچستان نیشنل پارٹی نا راہشون نا باوہ پیرہ ئی ضلع ءِ، ہراکان او پاکستان نا بنجائی اسمبلی باسک ءِ اوڑے پیپلز پارٹی نا اومیت وار ضلع کونسل چیئرمین نا نشست ءِ کٹانے۔
بلوچستان نیشنل پارٹی و نیشنل پارٹی نا اسٹ ایلو آن چپ سیاست پارٹی و قوم پرست سیاست ءِ نسخان تسنے۔ بلوچستان نیشنل پارٹی و نیشنل پارٹی نا موقف ءِ کہ او حق خودارادیت و صوبائی خودمختاری نا بنداوی موقف تون سرکار نا مُخ تفی کروک ادارہ، لینڈ مافیا، ڈرگ لارڑ و بے سیاسی تاغت آتا کسر ءِ توننگ کن پاکستان نا پارلیمانی سیاست ءِ کننگ ءُ و بلوچ راجی ویل آتا ایسری کن قوم پرست سیاست ءِ زندہ تخسا ءُ ولے تومکا پارٹیک جتا وخت آتیٹ ڈرگ مافیا، ڈیتھ اسکواڈ و بے سیاسی تاغت آتون تفوک بندغ آتیکن سیاست ئٹی بننگ نا ذریعہ مسنو۔ (یا اوفتا سیاست ئٹی بننگ نا ذریعہ مننگ نا دوبہ لگانے)۔
امریکی صدر براک اوباما نا کنڈ آن 2009 ئٹی پن کروک جہان نا چھار بھلا منشیات نا سرغنہ تیان اسٹ امام بزنجو ءِ نیشنل پارٹی تینا جماعت ٹی اوار کریسس و 2018 نا گچین کاری تیٹ پی بی چالیس خضدار نا نشست آتیکن ڈیتھ اسکواڈ نا سروک و ہشت لیویز کارندہ نا خونی شفیق مینگل تون گچین کاری سیوتی کریسر و دا زوت ئنا بلدیاتی گچین کاری تیٹ بلوچستان نیشنل پارٹی کیچ اِرا ٹولی ٹی ونڈ مسس و میجر جمیل دشتی نا ٹولی ضلعی کونسل چیئرمین نا نشست کن گمانی منشیات نا سرغنہ ہوتمان نا مخ تفی ءِ کریسس۔
جنگ زدہ بلوچستان ئٹی پاکستان نا ذمہ وار حلقہ آک بلوچ راجی سیاست نا کسر ءِ مُست آن بند کرینو و اگہ دا حالیت ئٹی پاکستان نا بنجاہ نا سیاست کروکا بلوچ قوم پرست جماعت آتا اندا حالیت برجاء مس تو بروکا وخت ئٹی بلوچستان نا قوم پرست جماعت آک بیرہ پن ئنا قوم پرست مرور و بلوچستان ئٹی پاکستان نا بنجائی پارٹیک اقتدار نا کرسی آ تولور ہرافتا پالیسی تیٹ بلوچستان نا راجی ویل ئنا ایسری اف۔