انصاف نا جنگ
خضدار یونیورسٹی نا خوانندہ آتا برانز و دزگیری
ٹی بی پی تیدری
خضدار یونیورسٹی آف انجینئرنگ اینڈ ٹیکنالوجی ٹی سئے شمبے نا دے حالیت آک ہمو وخت خراب مسر ہرا وخت پولیس تون اوار فرنٹیئر کور (ایف سی) نا کارندہ آک یونیورسٹی کیمپس ءِ گھیرہ کرسا کیہی خوانندہ آتے دزگیر کریر، ہرا تینا شکایت آتے اثر دار توار تننگ کن مُچ مسوسر۔
یونیورسٹی ٹی ساڑی ٹولی گرینڈ اسٹوڈنٹس الائنس (BUETK) سئے شمبے نا دے امتحان آتیان بائیکاٹ کرسا یونیورسٹی بست و بند آ دوبہ خلک کہ او امتحان آتا کنٹرولر ءِ مُر کننگ نا تینا وعدہ آن مون ہڑسانے۔ کنٹرولر آ یونیورسٹی کیمپس ٹی نرینہ و خاص وڑ ئٹ زالبول خوانندہ آتے بلیک میل کننگ نا دوبہ ئس۔ خوانندہ آتا اسہ خاص مُچی اس برانز کن بش مس۔ ہرا کنٹرولر ءِ کشنگ، و ہاسٹل آتیٹ غير ضروری نگران کیمرہ تے مُر کننگ، اسکالرشپ آتا بحالی، خوانندہ تپہ آتیان رکھ مُر کننگ، و ٹیوشن فیس ئٹی کمبوتی نا خواست کریر۔
حوال تا رد ئٹ یونیورسٹی بست و بند قانود نافذ کروکا ادارہ آتیان برانز کروکا خوانندہ آتے دانگ اینگ کننگ نا خواست کرے۔ پولیس و ایف سی نا کیہی اُلاخ آک یونیورسٹی ءِ گھیرہ کریر و کیہی خوانندہ آتے دزگیر کننگا، اوفتا بے شرفی کننگا، زوراکی ئٹ گاڑی تیٹ سوار کرسا دننگا۔ داسکان دزگیر مروک خوانندہ آتا حالیت جوان پاش اف۔
نن نیمہ غا خوانندہ و یونیورسٹی کوالخوا نا نیام ئٹ ہیت و تران نا لڑ بناء مس، وا ہم خوانندہ آک تینا سنگت آتا آجوئی اسکان برانز کننگ نا ارادہ کرینو۔
یاتی مرے کہ خوانندہ آک اسہ تُو اس مُست بھلو کچ اسیٹ تینا برانز ءِ ریکارڈ کرفیر ہراڑے ایلو خواست آتون اوار او امتحان آتا کنٹرولر ءِ کشنگ نا خواست کریر، خوانندہ آک کنٹرولر آ بدعنوانی و بلیک میلنگ نا دوبہ خلکر۔ برانز ہمو وخت ایسر مس ہرا وخت یونیورسٹی اسہ تُو ئسے نا تہٹی امتحان آتا کنٹرولر ءِ کشنگ نا ہیت آ امنائی کرے۔
بد بختی آن خوانندہ آتا خواست آتا پورو مننگ آن بیدس تُو گدرینگا۔ امتحان آتا کنٹرولر، ہرانا برخلاف خوانندہ آک برانز کریسر، دائسکان ہم یونیورسٹی نا ایسری امتحان آتا خیالداری ءِ کننگ ءِ۔ اُست کٹئی تون خوانندہ آک پدا برانز نا کسر ءِ تینا کریر ولے دا وار اوفتے دزگیر کریر و اوفتے قیذ و بند ئتون مون تروئی تما۔
جتاء گل آک بلوچستان یونیورسٹی آف انجینئرنگ ٹیکنالوجی ٹی پرامن برانزی تا بیدس قانودی دزگیری آ خلیس نا درشانی کریسہ پاریر کہ برانز ہر شاری نا بنماسی حق ءِ۔ ہراتم خوانندہ آتے اوفتا حق آتیان پدماندہ کننگک گڑا اوفتا اسٹ آ کسر برانز نا زریعت ئٹ تینا خُلیس نا درشانی مریک۔
اسہ پین خوانندہ گل بلوچ اسٹوڈنٹس ایکشن کمیٹی (بساک) BUETK ٹی برانز کروک خوانندہ تا دزگیری نا ترند مذمت ءِ کرے۔ گل پرامن خوانندہ تا برخلاف تاغت ءِ کاریم ئٹ ہتنگ آ خُلیس نا درشانی کرے، و بلوچستان نا جامعہ تیٹ بلیک میلنگ، بےدادی و بیدس قانودی دزگیری تا تالان مننگ ءِ پاش کننگ نا کوشست کرے۔
بساک افسوز نا درشانی کریسہ پارے کہ بلوچستان نا جامعہ غاک زیات ویل آتا گواچی ءُ۔ ہرافتا سوب آن ادارہ آک تعلیمی سال نا نیام ئٹ زیات وخت اسکان بند مریرہ۔ خوانندہ آک و استاد آک تینا جائز خواست آتیکن ساندہ کسر تیا پیشتمرہ ولے اوفتا خواست آتے کس بمپک۔ اوفتا پاننگ ئس کہ ہیت و گپ کننگ نا جاگہ غا صوبائی حکومت و ضلعی بست و بند تاغت ءِ کاریم ئٹ ہتیرہ۔
بساک بلوچستان یونیورسٹی آف انجینئرنگ اینڈ ٹیکنالوجی نا برانز کروک آتیتون ہمکوپئی نا درشانی کریسہ تیوہ جائز خواست آتا پوروی اسکان تینا ہمکوپئی ءِ برجاء تخنگ نا وعدہ کرے۔ او پارے کہ برانز بنماسی حق ئسے و تاغت ئٹ شرہ ءِ چھپ کرفنگ نا مذمت ءِ کینہ۔
بلوچستان یونیورسٹی آف انجینئرنگ اینڈ ٹیکنالوجی ٹی مروک تدینی اسہ یکہ ءُ تدینی اس اف، دا وڑ نا تدینیک ایلو جامعہ تیٹ ہم رپورٹ مسنو۔ خاص وڑ ئٹ ستمبر 2019 ئٹ یونیورسٹی آف بلوچستان ئٹ ہم اندا وڑ نا معاملہ اس مونا بس، ہراڑے یونیورسٹی بست و بند نا گڑاس کارندہ بیوس آ خوانندہ تا عکس و ویڈیو تے جوڑ کریر تانکہ اوفتے خُلیفنگے۔ دا تدینی بھلو کچ اسیٹ غم و سوختئی ودی کرے و بلوچستان یونیورسٹی ٹی ساڑی بدعنوانی و بلیک میلنگ نا دود ءِ پاش کرے۔
بلوچستان نا جامعہ غاک ہر وخت چھاؤنی تا وڑ لگرہ۔ ہراڑے کیمپس آتا تہٹی و اوفتیان پیشن فرنٹیئر کور نا گاڑیک گشت کریسہ خننگرہ۔ خاص وڑ ئٹ بلوچستان یونیورسٹی ہرا تینا گیٹس و کیمپس نا تہٹی ایف سی کارندہ تا ساڑی مننگ نا سوب آن پِنی ءِ۔ خوانندہ و ایلو بندغ آتے یونیورسٹی ٹی پیہنگ وخت آ مزاحمت تون مون ایتوئی تمک، اوفتے نہ بیرہ اسٹوڈنٹ کارڈ بلکن شناختی کارڈ ہم نشان تننگ نا گرج مریک۔ بھاز وخت خوانندہ تے سکیورٹی فورسز آتا کمک ئٹ خُلیس و بے دادی نا گواچی کننگک۔ گیشتر دا کہ پیشن نا تاغت آک یونیورسٹی نا معاملہ تیٹ پاش وڑ ئٹ خننگرہ و داڑے اسکان کہ کیمپس و ہاسٹل آتیان کیہی خوانندہ تے زوراکی ئٹ بیگواہی نا گواچی کننگانے۔
وخت اتون اوار حالیت آک گیشتر خراب مریسہ ءُ۔ یاتی مرے اندن آ وخت آتیا ہراڑے انڈیا و پاکستان نا نیام ئٹ کرکٹ میچ آک مریرہ گڑا دافتون اوار بھلو کچ اسیٹی سکیورٹی فورسز آتے ہم یونیورسٹی آن پیشن سلفنگک۔ دا ردعمل 2022 ئٹ ایشیا کپ ئنا فائنل کرکٹ میچ ئٹ سری لنکا نا دو آن پاکستان نا باء تننگ آن گڈ خوانندہ تا مجلس آتیان ودی مس، ہرا سکیورٹی فورسز آتے سوختہ کرے و کوئٹہ آن درزن آ خوانندہ تے دزگیر کننگا۔
بلوچستان ئٹ خوانندہ تا زند سختی تا گواچی ءِ۔ خوانندہ و استاد آتا برانز آتیان جامعہ غاک ہر وخت بند ءُ ہراڑے تعلیمی کاریمک زیمی مریرہ۔ داڑے اسکان کہ یونیورسٹی بست و بند چنکا ویل آتیا فرنٹیئر کور ءِ خواہفک ہرا اسہ بھیم بش کروک رجحان ئسے و بلوچستان ئٹ تاغت ءِ کاریم ئٹ ہتنگ ہڑدے ئی کاریم اس جوڑ مسنے۔ حالیت انگہ خراب مریسہ ہننگ ءِ ہراڑے خوانندہ غاک سکیورٹی فورسز آتا ساڑی مننگ آن بیدس کرکٹ میچ اس ہم اُننگ کپسہ۔