اسہ ہنینو تغ اس
(ارٹمیکو بشخ)
نوشت: نوشاد بلوچ
مٹ: زرماہ بلوچ
ای داسا اوڑے تولوک ہمو سنگت ءِ ہننگ ئسوٹ اُرے اسکان اودے ہنیسہ خناٹ، او ہنیسہ “گوْن” ئنا رخت آن گڑاس میوہ کشکیسہ کنیک و ایلو بچوک آتے تینا چنکا دزپاگ یعنی تینا رومال آ تفک و اوکان رادہ مریک۔ مننگ کیک او اوفتے تینا پیشیم نا ارغ یا گڑا تینا اسہ سنگت سے کن دننگ مرے، اسہ دوٹی تینا دیری آ ہورک انگا بوتل ءِ ہرادے نن ہندی بولی ٹی “کَلّی” پانہ ارفیسس او اسیکہ تینا توفک ءِ راستیکو کوپہ غان ارفیسہ چپیکو کوپہ ٹی شاغنگ ئس، او اسیکہ اودے تینا مون ئنا پارہ غا کریکہ، مر مننگ نا سوب آن ای سرپد مننگ کتوٹ یخین ئٹ او تینا توفک آن بک ہلنگ مرے اودے خن تیا تخنگ مرے و اود انتئے بک ہلنگ مف تینا توفک آن، توفک ہرادے نن تینا کل آن زیات خڑک انگا سنگت سرپد مرینہ ہرا ہر وخت اسہ مخلص ءُ سنگت ئسے آنبار ننتون اوار مریک ہرادے نن اسل تینے آن یکہ کپنہ، جنز ئٹ اولیکو شرف نن ہندا ہیت ءِ ایتنہ کہ ننے تینا سلاء نا جوان وڑ ئٹ خیال ءِ تخوئی ءِ، ہر وخت فرض ءِ ایسر کننگ آن مست و فرض ءِ ایسر کننگ آن گڈ ہراتم نن کل سنگتاک اسہ ہند ئسے آ تولیسہ توفک آتے صاف کینہ تو ننے اسہ است خواہی اس محسوس مریک اوفتے تون، پدا ہراتم فرض ئنا وخت آ او دژمن آ خاخر شولیرہ، اوفتا ہر اسہ تیر تہو تے چیریسہ لغور آتا سینہ آتیٹی اسہ ریس ئسے تون اوار پیوند مریک۔
خڑک ئٹ تولوک دوربین نا وسیلہ ئٹ ہروک آ سنگت آتا جوڑ تیان ” قربان ورناک” نا لوز آک جیرت آتے پین تاغت بشخیرہ۔
سنگت ہنیسہ داسا کنا نظر آن اودیم مریسہ ئس، اونا ہیت آتا توار دائسکان کنا خف تیٹ پنیسہ ئس ہندن کہ اود دائسکان ہم کنا رہی آ تولوک ءِ۔
ای او سنگت نا مخلصی و جہد آجوئی تون اوار اونا است خواہی نا بابت سوچنگ ءِ بنا کریٹ ہرا سنگت نا ہیت آتیان پاش نظر بننگ ئس، اسہ سنگت اس مچا نن اسہ بلوچی چادر ئسے تون اوار دا بھلا بھلا تلار، مش تا نیام ئٹی گھاٹ تننگ ءِ و داسا اود کیمپ آ ہنیسہ اسہ پین زمہ واری ئسے سر تننگ ئٹ اختہ مرو، داسا دا ہیتاک کنے و کنا ٹپی و کپ کپ آ ضمیر ءِ سرفنگ ءُ، استو نا خنوک آ تغ آن داسا کنے خار بریسہ ءِ، پدا ای تینے تینٹ پاننگ بناء کریٹ، تینے بددعا ترسٹ کہ ای ہم اخس بھلو خودغرض اس پیشتماٹ تینا دا دمدرینگ ءِ ڈھکنگ کن ای اسہ تغ ئسے ڈوہ تننگ اٹ ہرانا ہچو راست ءُ تعبیر اس ہم اف۔
ای تو تینا استاد سنگت دلجان نا گڈیکو آرام جاہ نا کاٹم نا پارہ غان سلیسہ تینتو تینٹ و اوڑتون دا وعدہ کریسٹ کہ ای ہم اوڑان بار گڈیکو سم اسکان جنگ کروٹ ولے داسا انت مس دائسکان تو کنا جاٹے ئٹ چار میگزین سم تا تخوک ءُ و کنے دا وڑ نا خیال بننگ ءِ۔
ای تو اسہ لمہ سے تو ہندا وعدہ کریسہ پیشتماسٹ شہید سنگت نثار نا نشان تروکا ہمو کسر آ ننا خاہوت نا ہر اسہ چنا ہراتم ورنا مرو گڑا قربانی نا دا جوزہ غان خمار مرو ولے انت مس؟ مگہ ای دا خاہوت نا گڈیکو ورنا اٹ؟ نہ ای گڈیکو افٹ بلکن ای تو اولیکو اٹ ننا لمہ غاک دائسکان چنا ودی کننگ ءُ۔ اینو ہم ہراتم ای تراسانی آن گدرینگوہ اسہ گمنام سپاہی سنگت صمد زہری نا قبر آ خلوک ہمو تختی ءِ بھاز ہریوہ۔ ہراڑا بیرہ اونا پن نوشتہ ءِ کنا ساندہ دا اُست خواہی مسنے کہ ای او تختی ءِ مٹ کریسہ اوڑا پارود ئٹی ردوکا زہری نا گواڑخ نوشتہ کیو۔ اوڑا اونا پن ءِ سرمچار صمد زہری عرف شیرا نوشتہ کیو و اودے بلوچستان نا رام و پرساد بسمل نوشتہ کیو، اونا قبر آ راجی بیرک ءِ خلیو، انقلاب زندہ باد نا نعرہ آتیتون اونا قبر آ راکٹ آتا فائر نا ترند توار ہتریو اوفتے بڑز شان ءُ وڑ اسیٹ رخصت کیو، و او جاگہ نا ہر اسہ ارا غان اسہ سرمچار اس ودی کریسہ اوفتے راجی جنگ آن چاہنداری ایتو، شہید آتا تروکا دا زہری ءِ ای سردار، وڈیرا تیان رکھیسہ راجی جنگ نا جاگہ اس جوڑ کیو۔
دا کل آتے کننگ کن ننے دائسکان ہم بھاز خواری کروئی ءِ، بھاز آ وے پورو آ کاریم تے پورو کروئی ءِ ننے، بھازا ڈکھ آتے سگوئی ءِ ننے گڑا ننے سرسہبی رسینگو۔ دائسکان ہم ننے بھاز آ قربانی تے تروئی تمک، دائسکان ہم ننے بھاز آ دتر تے وہفوئی تمک،
بس ننے مخلص مروئی ءِ،
جک سلوئی ءِ،
سوگوْ مروئی ءِ،
و اوار مروئی ءِ،
و جنگی گُرج آتے اوار دریسہ ہنوئی ءِ، یات و اُست خواہیک ہراتم تینا مون ءِ ہڑسیرہ گڑا بھاز آ دروشمک مونا بریرہ، بس سوگوْی ئٹ ننے دا سنگر آتیٹی تولوئی ءِ۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔