بلوچستان نا جتا علاقہ آتیٹ تدوکا دے تیٹ فوجی آپریشن و چھاپہ آتیٹ کیہی بندغ آک زوراکی ئٹ بیگواہ کننگانو ہرافتیان آواران و ڈیرہ و بگٹی آن بیگواہ مروک پین شش بندغ نا چاہنداری مسنے، اندن ضلع کیچ ئٹی اُرا ئسے آ چھاپہ خلسا اِرا ورنا ءِ بیگواہ کننگانے۔
بلوچستان نا ضلع آواران و ڈیرہ بگٹی ٹی تدوکا کیہی دے آن فوجی آپریشن برجاء ءِ، آپریشن ئٹ داسکان فورسز آک کیہی بندغ آتے زوراکی ئٹ بیگواہ کرینو ہرافتیان شش بندغ نا چاہنداری مسنے۔
ضلع ڈیرہ بگٹی نا تحصیل سوئی ٹی تدوکا بیست و چار گھنٹہ ٹی پاکستانی لشکر جتا علاقہ آتیٹ چھاپہ خلسا کیہی بندغ آتے زوراکی ئٹ بیگواہ کرینے، بیگواہ مروک آتیان مُسٹ نا چاہنداری مسنے۔ ہرافتیٹ سواگل ولد پنھل بگٹی، حسینو ولد بختیار بگٹی و دادن ولد شے حان بگٹی اوار ءُ۔
بیگواہ مروک آتیٹ دادن لیویز فورس ئٹی کاریم کیک ہرادے فورسز آک سوئی چھاؤنی آ بٹنگسا بیگواہ کرینو۔
یاتی مرے کہ دادن نا باوہ شئے حان بگٹی ءِ 23 جون 2013 ٹی پاکستانی لشکر مٹ ئنا علاقہ ٹی پین شش بندغ تون بیگواہ کرسا ہر شش بندغ ءِ کسفیسر۔
دادن نا خاہوت نا پاننگ ءِ کہ اوفتا مار لیویز ٹی کاریم کیک و دادن اوفتا اسٹ انگا سہارہ ءِ ہرا نا زند ءِ خُلیس ءِ و بڑزکو کوالخواک اونا آجوئی ٹی تینا کڑد ءِ سر تیر۔
خیال مرے کہ ڈیرہ بگٹی ٹی تدوکا کیہی دے آن فورسز آتا آپریشن ترندی ئٹ برجاء ءِ، حوال تا رد ئٹ آپریشن نا وخت آ فورسز آتا بھلو کچ اس بندغ آتے دزگیر کرینے، ہرافتیان گیشتر بندغ آتا چاہنداری داسکان متنے۔
ایلو کنڈ آن آواران ئٹی فوجی آپریشن برجاء ءِ، حوالکار تا رد ئٹ تدوکا اسہ ہفتہ آن آواران نا علاقہ زیارت ڈن، کچ، غلامو بازار، گرائی، لوپ، ابراہیم بازار و زیلگ ئٹی آپریشن برجاء ءِ۔
حوالکار تا رد ئٹ آپریشن نا وخت آ فورسز آتا دو آن بیگواہ مروک مُسہ بندغ نا چاہنداری مسنے ہرافتیٹ زاہد ولد دلبود، واحد ولد کریم بخش و امداد ولد ابراہیم اوار ءُ۔
اندن بلوچستان نا ضلع کیچ آن حوال ارے کہ پاکستانی فورسز آک نن نیمہ غا چھاپہ خلسا اِرا ورنا ءِ دزگیر کننگ آن گڈ بیگواہ کرینو۔
بیگواہ مروک آتے تحصیل تمپ ئنا علاقہ بوستان نا ہند آ اُرا تیا نن ئنا دوانزدہ بجہ غا چھاپہ خلسا دزگیر کننگانے۔
دزگیری آن گڈ بیگواہ مروک آتا چاہنداری پیر بخش ولد بیت اللہ و فاروق ولد مراد نا پن آ مسنے۔
حوال تا رد ئٹ فورسز آک بھلو کچ اسیٹ علاقہ ءِ گھیرہ کرسا اُرا تیا چھاپہ خلکر و زالبول و چنا تے ذہنی و جسمانی بےدادی نا گواچی کرسا تومکا ورنا تے دزگیر کریر و بے ڈس ءُ ہند ئسے آ دریر۔
خیال مرے کہ برجاء ہفتہ ٹی تیبہ بلوچستان ئٹی زوراکی نا بیگواہی تا تدینی تیٹ ترندی بسنے، برجاء ہفتے ڈیرہ بگٹی، آواران و ایلو علاقہ آتیان فورسز آک کیہی بندغ آک زوراکی ئٹ بیگواہ کرینو۔
ایلو پارہ غان اینو سہب مالو زامران و بلیدہ نا مشی علاقہ آتیٹ پاکستانی فوج لشکر کشی نا بناء کرے۔ علاقائی مخلوق نا رِدئٹ کیہی گن شپ و ایلو ہیلی کاپٹر آتے علاقہ ئٹ خننگا و اندن تُرند تراک وسم کاری نا توار ہم بننگ ئٹ بسونے۔
آپریشن نا بابت مُستی حوال دائسکان رسینگتنے و کوالخواک ہم دا بابت ہچ پاتنو۔