وڈھ ئٹ حالیت آتا خرابی
ٹی بی پی سرگپ
بلوچستان ئٹ قلات ڈویژن نا بنجاہی شار خضدار نا تحصیل وڈھ ئٹ اسہ توہ ئسے آن حالیت آک خراب ءُ۔ مینگل قبیلہ نا سردار اسد مینگل و بلوچستان نیشنل پارٹی نا سروک سردار اختر مینگل و فریق شفیق مینگل اسٹ ایلو نا برخلاف سنگر ہلکنو و جھڑپ آتیٹ بھلا سلہہ تے آزاتی ئٹ کاریم ئٹ ہتنگ ءُ۔ ترند جھڑپ آتا سوب وڈھ ئنا بندغ آک گھیرہ ٹی ءُ و وڈھ ئنا ہند آ کوئٹہ کراچی کسر گاڑی تا ہن و بر کن تیوہ بند مسنے۔
بلوچستان نیشنل پارٹی نا دوبہ ءِ کہ شفیق مینگل ڈھکوک ایجنسی تا پاننگ آ سردار اختر مینگل ءِ نزور کننگ نا کوشست کننگ ءِ۔ بی این پی شفیق مینگل نا برخلاف تیوہ بلوچستان ئٹ پہیہ جام و شٹر ڈاؤن ہڑتال کرینے و حکومت بلوچستان و قبائلی سردار آتا کوشست آتیان بیدس وڈھ ئٹ حالیت آتا خرابی دائسکان ترندی ہلنگ ءِ و شفیق مینگل نا بندغ آک کوٹ مینگل ئٹ سردار اختر مینگل نا اُرا ءِ راکٹ آتیٹ ٹک کننگ ءُ۔
بلوچستان ئٹ سیاسی ٹولیک چرجوئی ئٹ دوبہ خلیسہ کرینو کہ پاکستان نا ایجنسیز آک بلوچ انسرجنسی ءِ ایسر کننگ کن اِرا ہزار ہشت آن تیوہ بلوچستان ئٹ ڈیتھ اسکواڈ جوڑ کرینو، ہرا کیہی سیاسی باسک آتا زوراکی نا بیگواہی و خون تیٹ اوار ءُ و اندافتیان اسہ ڈیتھ اسکواڈ اس شفیق مینگل نا سروکی ٹی جوڑ کننگا ہرا ‘مسلح دفاع بلوچستان’ و ‘حق نا توار’ نا پِن ئٹ چاننگرہ۔ بلوچستان ئٹ ڈیتھ اسکواڈ آک انداخس تاغتور ءُ کہ او ریاست نا تہٹی ریاست نا کڑد ءِ سر تننگ ءُ۔
مسلح دفاع بلوچستان، جھالاوان عوامی پینل و حق نا توار شفیق مینگل نا سروکی ٹی قلات ڈویژن و خاص وڑ ئٹ خضدار ئٹ ریاستی ادارہ تیان زیات تاغت تخرہ۔ او گمانی وڑ ئٹ زر اکن برمتہ، زوراکی نا بیگواہی و خون تا بھاز آ تدینی تیٹ اوار مسنو۔ لیویز فورس نا توننگ آ ہند آ ساڑی نو لیویز کارندہ تے کسفنگ ئٹ اوار ءُ۔ سندھ پولیس نا جے آئی ٹی رپورٹ نا ردئٹ شفیق مینگل نا تعلقداری لشکر جھنگوی تون ہم ارے و شکارپور جلہو، ہرا ٹی شست (60) بندغ خلنگار او خودکش جلہو کار تے ءِ وڈھ ئٹ ہند تننگاسس و شفیق مینگل نا بندغ آک اوفتے شکارپور اسکان سر کریر۔
بلوچستان نا پارلیمانی ٹولیک جتا وخت آتیا ڈیتھ اسکواڈ تا برخلاف پاکستان نا پرلیمان و برانز آتیٹ توار ارفیسہ کرینو ولے بلوچستان ئٹ ہموتم اسکان ڈیتھ اسکواڈ تا برخلاف تحریک نا سوگوْ مننگ سخت ءِ ہراتم اسکان پارلیمانی ٹولیک دا ڈیتھ اسکواڈز آتے تینا پارٹی تیٹ جاغہ تننگ ءِ بند کتنو، گڑا او گمانی ڈیتھ اسکواڈ سروک قلات ئٹ کوہی خان مینگل و قمبر خان مینگل مرے، مشکے ٹی علی حیدر محمد حسنی مرے، مستونگ و کوئٹہ ئٹ نور احمد بنگلزئی مرے یا کیچ ئٹ راشد پٹھان و میر اوتمان مرے۔
اسہ علاقہ ئٹ ڈیتھ اسکواڈ آتا مخالفت و ایلو علاقہ نا ڈیتھ اسکواڈ ءِ پارٹی ٹی باہوٹ تننگ آن دافتا ایسری مننگ کپک۔ پارلیمانی ٹولی تے بیدس فرخ آن ریاستی ڈیتھ اسکواڈ آتا مخالفت ءِ کروئی تمو گڑا ہموتم بلوچستان ئٹ ڈیتھ اسکواڈ تا برخلاف تحریک سوگوْ مننگ کیک۔
ریاستی ادارہ تے ہم سرپد مروئی تمو کہ ڈیتھ اسکواڈ تا کمک ئٹ سیاسی جنز آک ایسر کننگ مفسہ و بلوچ آتے راجی حق تننگ آن بیدس بلوچستان نا ویل آک ایسر مفرور۔