سفر زند و شاعری
نوشت: نزار قبانی | مَٹ: عتیق آسکوہ بلوچ
یانزدہمیکو بشخ
مابت
کنا تعلقداری عشق روزگاری خاہوت آن ءِ۔ دنکہ سوف اٹ ہنینی ودی مریک اندن ننا اُرا ٹی چُنا تیتون مابت ودی مریک۔ عمر ئنا یانزدہمیکو سن ئٹ نن عشاق نا دروشم ارفینہ؛ دوانزدہمیکو سال اٹ دیخہ در مونجھا مریسہ کانہ، سینزدہمیکو سال ئٹ عشق ئنا پوسکنی ءِ کینہ و چانڑدہمیکو سال ئٹ پوسکنی ئٹ گیمرینگ۔ پانزدہ سال نا سن ئٹ ننا خاہوت نا چُنا شیخ اس جوڑ مریک و عشق ئٹ تینا کسر ءِ ہلیک۔
کنا پیرہ اندن ئس و کنا باوہ ہم۔ کنا ایلمک ہراتم ہم زیبا غا خن تے خنارہ گڑا بھاز آسراتی تون اُست بٹیرہ، ولے آسراتی تون دا دیر آن پیشن ہم مسرہ۔ خاہوت نا تیوہ غا بندغ آک مابت نا خلوک ئسر داڑ اسکان کہ مابت کن دتر تروک۔
ننا خاہوت نا دیہاڑ ئٹ شہادت نا اسہ اُست باسفوک تدینی اس مس: دانا سوب ہم ہمو اس یعنی عشق۔ شہید مروک کنا بھلا ہیڑ وِصال ئس۔ او اندن سادہ و شاعرانہ ڈول ئٹ تینے ایسر کریسس ہرانا ہچ ءُ مثیال اس اف۔ سوب دا ئس کہ او تینا مابت تون برام کننگ کتئو۔ اونا دروشم، ہراتم او مرک ئنا باہ ئٹ ہننگ ئس، اینو ہم کنا وجود اٹ نشخ ءِ۔ کنے اینو ہم ایسری ساہ آ اونا فرشتہ صفت دروشم، اونا نورانی نشخ آک و زیبا غا بشخندہ یات ءُ۔ تینا مرک ئنا وخت او رابعہ عدویہ آن زیات زیبا و مصری قلوپطرہ آن زیات اُست چکوک ئس۔
او وخت کنا سن پانزدہ سال ئس ہراتم ای اونا جنازہ ئٹ ہننگ ئسوٹ؛ کنتون مابت ہم ہمگام ئس و دو تیتون لچیسہ گار پریات کننگ ئس۔ ہراتم مخلوق کنا ہیڑ ءِ مِش تیٹ ڈم تس و نن ایلو دے اونا زیارت آ بسون گڑا نن خنان کہ قبر ساڑی اف، آھو اندا ہند آ اسہ گلاب نا پُھل اس رُداس اُس۔
کنا ہیڑ نا مابت نا کسر ئٹ ساہ تننگ انت ہمو نفسیاتی گڑا تیان اسٹ ءِ ہرا کنے تیوہ غا طاغت تون مابت نا شاعری آ بچ تس و دا ہیت آ کہ ای مابت ءِ زیبدار آ لوز آتیٹ صدخئی ایتیو؟ انت مابت نا بابت کنا نوشت آک ہمو داد ءِ ہراڑان کنا ہیڑ ءِ توننگاسس یا دا چاگڑد آن بیر ہرا مابت ءِ لتاڑک و تفر و توفک آن اودے در پہ در کیک؟ ای دا نفسیاتی گڑا نا مننگ یا نمن افٹ، ولے دا ہیت ءِ الّمی منیوہ کہ کنا عاشق ہیڑ ئنا کہنگ کنا تہٹی گڑاس پرغا و کنا چُنکی ءِ دیر ئنا زی آ ساڑی اسٹ آن زیات گڑد لیک و اسٹ آن زیات سوج نشان آتیا یلہ کرے۔
ای پاوہ، کنا تعلقداری اسہ اندنو خاہوت ئسے آن ءِ ہرا ہر وخت مابت کن امنا ءِ؛ ہرا مابت ئٹ تمنگ کن بھاز تُرند حساس اس تخک۔ بھاز بندغ آتیٹ حساسیت نا ودی مننگ رنگ، خوش آ گند، گڑز یا مُد آتا بدلی آن مریک، ولے ننا خاہوت اٹ دانا ودی مننگ نا سوب اُست ءِ۔ حسن ئنا ندارہ و جمال نا مونا ننا ہر بندغ تُرند حساسیت نا گواچی مریک۔
ہراتم اسہ بڑز بالاد زیبدار بدن اس کنا باوہ نا رہی آن گدرینگوس گڑا او اسہ چُک ئسے آنبار پرہ خلککہ و آدینک آنبار پناکہ۔ چھٹی نا خواننگ، چُنا نا اوغنگ یا زالبول نا مخنگ اودے اسُل شیشپہ کریکہ۔ او حالیت آتا سختی تا مونا سخت گیر مسکہ ولے گروشکی حسن ئنا مونا ہس نا ڈھیر اس مسکہ۔ اونا خرّن خلوک خنک نہرِ سویز نا ڈول ساف ئسر، اونا بالاد رومی جنگول آتا نیزہ غاتیانبار ئس و اُست بلور نا ڈول گشادہ ہراٹی تیوہ غا جہان جاغہ کے۔ او قابل فخر مال ئنا خواجہ ئس، یعنی بندغ آتیتون مابت۔ او داڑان زیات نا خواہوک ہم اَلو۔ ہراتم او کذیت کرے گڑا تیوہ غا دمشق اودے تینا کوپہ غاتیا ارفنگ کن و دا مابت نا بدل ءِ تننگ کن پیشن مس ہرا او مخلوق تون کریکہ۔
ہراڑاسکان کنا لمہ نا تعلقداری ءِ مہروان ءُ چشمہ اس ئس ہرانا تننگ بے حساب ئس۔ او کنے تینا لاڈک آ مار پِن کریسس۔ کنا مہروان آ ایلم تیٹ اونا رہی آ کنا جتا گچین ءُ ہند اس ئس۔ کنا چُنائی اُست خواہی تے او بیدس شکائست پورو کریکہ۔ ای بھلن مسوٹ ولے اونا خن تیٹ ساندہ نزور سلوک مسوٹ۔ ہفت سال نا سن اسکان او کنے پاڷ اڑیفسہ کرے و سینزدہ سال اسکان تینا دو تیٹ کُنفسہ کرے۔ داکان گڈ ای جہان نا تیوہ غا براعظم آتا سفر ءِ کریٹ، ولے اودے ساندہ کنا کُننگ و کنا بیرم تا صفائی نا خیال پلویڑ کروک مس۔ دمشق ئٹ ہراتم اُرا نا بندغ آک پڑزونک آ توسرہ گڑا او کنے یات کریسہ پاریکہ “سما اف پیشن نا دیار اٹ اونا کُننگ نا کس خیال تخیک ہم یا آخہ!” فطری ڈول ای ہمو چُنا اُٹ۔ بھلو وخت اس او دمشقی خوراک آتا پارسل ہمو سفارت خانہ غاتے رادہ کریسہ کرے ہراڑے ای کاریم کریٹہ انتیکہ اودے دا ہیت ئنا یخین ئس کہ دمشق شار آن ہم پیشن دنو گڑا ساڑی ارے ہرافتے بندغ کُننگ کے۔
فکری پِڑ آ کنا و کنا باوہ لمہ نا نیامٹ ہچس اسہ ڈول اَلو۔ وہ تینا نماز، روچہ و مصلہ تون مشغول مسکہ۔ گچین آ تُوہ تیٹ قبر آتیا حاضری تسکہ، اولیا تا مون آ خیرات کریکہ، عاشورہ نا وختا ہنینی جوڑ کریکہ،چار شمبے نا دے ناجوڑ آتا ہریفنگ آن رکھ کریکہ، دو شمبے نا دے بے شولنگ سِلنگ آ پد توریکہ تینے، شام تمنگ آ ننے ہور ہڈ ہلنگ کن ہلتوکہ، شیطان تا خلیس نا سوب لاڑی دیر تے سنگ مر مر نا چلمچی ئٹ وہیفتوکہ، و بد آتا خن تیان رکھ اکن ننے آن ہر اسٹ نا لخ ئٹ خرن رنگ نا فیروزہ نا خل شاغاکہ۔
تینا باوہ نا انقلابی فکر و لمہ نا متکنا سوچ نا نیامٹ مریسہ کنا ودشست دیر و خاخر والا زمین آ مس۔ کنا لمہ دیر ئس و باوہ خاخر ئس۔ تینا فطری ڈول نا سوب، ای تینا لمہ نا دیر آ باوہ نا خاخر ءِ ود سرپد مسوٹہ۔
کنا باوہ کلاسیکی معنہ ئٹ دینی بندغ اس اَلو۔ او کنا لمہ نا خلیس آن روچہ تخاکہ؛ بھاز وخت تینا اُلسی چاہنداری نا خیال ئٹ خلق ئنا مسیت ئٹ جمعہ نا نماز ءِ خواناکہ۔ اونا خڑک دین شرف تننگ، معاملہ غاک و اُلس تون جُوانی نا پِن ئس۔ خدا شاہد ءِ کہ او بھلا اخلاق نا خواجہ ئس۔ اونا مال و دلوت ئٹ خواستگار نا حق ساندہ مسکہ۔ زمین آ سختی تیتون مون تروک مخلوق کن اونا اُست ئٹ ساندہ جاغہ مسکہ۔ ننا اُراٹی اِرغ اِرا بشخ کننگاکہ، نیمہ ایلوفتیکن و نیمہ ننکن۔
باوہ دین ءِ اونا جمالیاتی رِد آن جتا کتوکہ۔ اندا سوب ئس کہ او پامداری تون عظیم قاری الشیخ محمد رفعت ءِ بنیسہ کیہی کیہی گھنٹہ غاتے گدریفیکہ۔ باوہ اونا توار ءِ اللہ نا نور نا پارہ غا ملنگوک درغ و ایمان نا نخلستان آتیان اسہ نخلستان گوْنداکہ۔ ای ہمو دے ءِ ہچبر گیرام کننگ کپرہ ہراتم او بد توار والا موذّن ءِ، ہرانا توار باوہ نا پاننگ نا رِدئٹ، مسلمان و اسلام نا برخلاف چمبازی اس گمان مسکہ، بارود ئٹ ٹِک کننگ نا تڑی تسوسس؛ اودے مخلوق ننا مکان تون اوار آ مسیت اٹ ایسوسس۔ ایسر جاہ اس بے ڈس مس و او دوارہ ہچبر مینار آ لگنگ نا جرات کتئو۔
باوہ جان نا انقلابی ڈول نا فکر کنے بھاز دوست ئس۔ ای اودے ہر ہمو بندغ کن مثیل اس سرپد مریوہ ہرا مسلمان زالبول تیان نمن مریرہ و خاص ڈول آ پام کیک۔ پین دا کہ اوڑتون کنا، بھا زیات پیشن نا لائخی تیتون اوار، نفسیاتی لائخی تیٹ اسٹی جاہ اس زیات ئس۔ دنکہ ہر چنا تینا چنکی ئٹ اسہ شہسوار ئسے نا پٹوک مریک، یعنی اسہ ہیرو و سفتی نمونہ ئسے نا، اندن کنا باوہ کنا شہسوار و ہیرو ئس، و اوڑان ای خاخر دزنگ ءِ ہیل کریٹ۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔