زاہد اقبال نا رخصتی
نوشت: محمد عمران لہڑی
دی بلوچستان پوسٹ
کہوکا بندغ آتا چاگڑد ئٹ بندغ نا ہچو قدر اس مفک۔ اینو دا ہیت پک ءِ کہ اینو ننا چاگڑد ئٹی زندہ غاتا ہچو قدر و قیمت اس اف ولے ہرا وخت کہ ہمو بندغ کذیت کیک دا کوڑی آن رخصت کیک تو ہر اسٹ اوڑکن خڑینک شولیسہ اودے یات کیک۔
کاش اگہ نن زرس سوچن تینا زند و کڑد ئنا جاچ ءِ ہلین کہ نن تینا زند ئنا مسخت تون اوار تینا چپ و چاگڑد نا سیانڑا و لائخ آ بندغ آتے اوفتا ہمو جاگہ و عہدہ ءِ ایتن تو گڑا ننا چاگڑد شون الیک۔ ولے اینو اگہ تینا چاگڑد نا مخلوق نا کڑد و عمل نا جاچ ءِ ہلین تو ننے دا گڑا باز ارزانی اٹ دو بریک کہ ننا مخلوق تینا لائخ آ بندغ آتے اوفتا زند ئٹ ہچو قدر تفک ہرا وخت کہ اندا لائخ آ بندغ آک دا کوڑی آن رخصت کیرہ گڑا ہر اسٹ افسوز کیک، اوتے یات کیک۔
اندن زاہد اقبال نا کذیت آن ننے تینا مخلوق نا کڑد ءِ خننہ۔ ہر اسٹ زاہد نا کذیت آن افسوز کیک، لوز نوشتہ کیک، اونا شعر تے تالان کیک، اودے داسہ یات کننگ ءُ۔ کاش اگہ اندا براہوئی بولی نا شاعر ءِ نن اونا زند ئٹی اندن یات کروسن، اندن قدر تروسن ہرا وڑ کہ اینو اونا کذیت آن گڈ تننگ اُن گڑا بھازی آن اودے زند ئٹ مچے آسودئی رسینگاکہ۔
زند ئنا تہ گڑاس دے آرام ئٹ تدینگارہ، تینا زند ئٹ خوش مسکہ کہ تینا بندغ آتا کمک ءِ دوئی کریٹ۔ ولے ہمو زاہد اقبال ہرا کہ تینا زند ئٹ براہوئی بولی ءِ شاعری نا پڑ آ بھلو مڈی اس بشخا ولے ہرا وخت کے زند ئنا سختی تا دے تیٹی تینا مخلوق نا کمک نا خواستگار ئس کس اودے اُرتو۔ اینو کہ تینا زند نا سختی سوری، تنیا، نیزگاری، لنگڑی مچا سختی تے ایسر کرسہ آسودہ خاک مس تو داسہ ہر اسٹ اودے یات کیک۔
ہمو ٹولیک ہرانگ اسر ہرا کے براہوئی بولی نا پن آ سالانہ ایوارڑ الیرہ، ہرا کہ سرکاری پیسہ غاتے تینا پلّو اٹ تفیرہ، ہرا کے فنڈ آتے تینا خڑک ئنا بندغ آتیا بشخرہ، ہرا کے دا بولی نا پِن اٹ تنخواہ الیرہ۔۔۔
اوفک انتئے زاہد اقبال نا وخت آ کُور ئسر۔ انتئے سرکاری خڑچہ ٹی اونا علاج کننگتو۔ آخر نن اٹ وخت اسکان اندن زند ئٹ مرک نا گواچی مریسہ کانہ۔ زاہد تو اینو دا جہاں آن رخصت کرے ننا مخلوق نا معاشرہ غان تو باز وختی رخصت کریسس۔ او ہمو وخت دا کہوکا چاگڑد آن رخصت کرے ہرا وخت کہ اودے کمک کننگ کن زندہ ؤ بندغ دوئی بتو۔ ہرا وخت او تینا بولی نا سوداگر آتے خنا تو اونا است ئٹ اندا بس کہ داڑے لمہ بولی ہم سودا مریک گڑا زاہد کون آتا انت کمک کرور۔
براہوئی بولی نا کل کالخواتا دا ذمہ واری مریک کہ ہرا ادارہ غاک دا بولی نا پن اٹ فنڈ الیرہ، سرکاری تلو آ دانا نمائندگی ءِ کیرہ ہموفتا احتساب ءِ کیر۔
ہر ہمو ادارہ نا کار کڑد آ نظر شاغر ہرا کہ براہوئی بولی نا پن آ جوڑ مسنے۔ ایلو سرکاری پارہ غا دا بولی نا کمک کن اخس وسیلہ اریر اوتے اندا شاعر، ادیب، دانشور آتا کمک کن دوئی کیر۔ کس ءِ دا اجازت مف کہ بولی نا پن آ تینا دکانداری ءِ برجاء کے۔ بولی نا سوداگر آتا کسر تے بند کیر۔ تینا لائخ آتا کمک ءِ کیر۔ بولی نا حقی آ والی وارث آتا ہر وڑ اٹ کمک ءِ کیر۔ ہرا بولی نا شونداری کن جہد کننگ ءِ اونا سختی ٹی کمک ءِ کیر۔ اینو ہم براہوئی بولی نا باز آ شاعرک، ادیباک تینا زند نا سخت آ دے تے تدیفنگ ءُ ولے اوفتا کمک ءِ کس کپک۔
بائدے اگہ ادارہ سینا وسیلہ ئٹ سرکار آن اوفتیکن فنڈ کشیفیر۔ سالانہ لکھ آ روپیک بولی نا پن آ بریرہ ولے اوفتے دیر تینا جیب ئٹ شاغک کل ءِ سما ءِ۔ اٹومٹ نن دا وڑ چپ تولون، ننا بولی نا سوداگری مرو۔ بس داسہ مچے ہمت کین بش مرین۔ براہوئی بولی نا شونداری کن المی ءِ کہ بولی نا پن پیسہ پلوکا کرپٹ آ بندغ آتے مُر کین۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔