بلوچستان ئٹی سیلاب نا بھس کاریک
ٹی بی پی سرگپ
بلوچستان نا جتا علاقہ آتیٹ ہار ئنا لڑ برجاء ءِ ہراڑان کیہی شار تیٹ سیلابی حالیت ودی مسنے۔ چرجوئی ئٹ پِر تیان بولان، نائی گاج، تَلی، مولا، لہڑی و رخشان جھل ئٹی دیر باسک کرینے و سیلابی دیر آن کشت و کشار بھس و بھلو کچ اسیٹ ڈغاک دیر ئٹ غرک مسنو، کیہی اُراک تمانو، جھل تا دیر ئنا سوب آن کیہی کسرک بند مسنو و ہزار آ بندغ آک پاش آسمان نا شیف آ زند کننگ آ بیوس ءُ۔
سیلاب کیہی علاقہ آتا کسر تے درینے و بلوچستان نا سندھ و پنجاب آن زمینی حوال پنانے۔ دریائے بولان ئٹی سیلابی دیر بننگ نا سوب آن سندھ و پنجاب تون حوال پنانے۔ پنجرہ پول ئنا پننگ آن ہزار آ اُلاخ و بندغ آک بولان ئٹی گھٹ مسنو۔
نصیر آباد، جھل مگسی، سبی، ماشکیل، واشک، خاران و پنجگور ئٹی سیلاب باز بھس کاری کرینے و کیہی خاہوت آک زیمی مسنو۔ کچہ غا اُراک تمانو و کیہی علاقہ آتیٹ ڈیم آک پنانو۔ سیلابی دیر ئٹ ٹبیسہ داسکان پنچ بندغ کسکنو۔
بلوچستان ئٹی خدو نا سیلاب نا بھس کاری تیان مخلوق داسکان پیشتمنگ کتنے و حکومت نا دعوی تیان بیدس او داسکان کمک نا خواستگار ءُ۔ ہزار آ خاہوت آک بے اُرا ءُ و سال اس گدرینگ آن بیدس داسکان پاش آسمان نا شیف آ زند کننگ ءُ۔ حب و بولان ئٹی سیلابی دیر آن پنوکا پول داسکان جوڑ متنے و بلوچستان نا گیشتر علاقہ آتیٹ کسرک سیلاب نا سوب آن پنانو۔
السی تپہ آتا رد ئٹ بلوچستان ئٹی جنگ کن وسائل نا نیستی اف ولے سیلاب آن زیمی مروکا سال ئسے آن کمک کن ہُریرہ و حکومت بیرہ دعوی اسکان سلوک ءِ۔ خدو نا بھس کاری تیان پیشتمتویسر کہ برجاء سیلاب زیمی مروکا تا ہڑاند آتیٹ ودکی کرینگ و حکومتی نا بے پامی آن سیلاب آن زیمی مروکا تا ہڑاند آک دے پہ دے ودنگ ءُ۔
دا باز المی ءِ کہ بلوچستان حکومت و نیشنل ڈیزاسٹر مینجمنٹ اتھارٹی سیلاب آن زیمی مروکا تا دوارہ آبادکاری ءِ زوت پورو کے و سیلاب آن رکھ کن گچینو پالیسی ٹہیفے۔