زوراکی ئٹ بیگواہ کبیر بلوچ نا لمہ پارینے کہ ظم و زوراکی و بندغی شرف ءِ لتاڑنگ نا اسہ کچ اس مریک ولے پاکستان ئٹ بے بندغی وڑ ڈول و اشتماعی سزا نا ہچو کچ اس اف بلکن داڑے ریاستہ ادارہ غاک مخلوق نا بے شرفی ءِ کریسہ اوفتا خڑینک و خسّکہ آتیان چس ہلیرہ و بے وس لمہ و ہیڑ تے سڑک آتیا پریات کریسہ خننگ آن اوفتا جغر ءِ پدینی رسینگک۔
کبیر بلوچ نا لمہ پارے کہ ای دا دڑد و ڈکھ ءِ پانزدہ سال آن سگنگ اُٹ، کنا مار نا زوراکی ئٹ بیگواہی ءِ پانزدہ سال مننگ ءِ۔
او پارے کہ 27 مارچ 2009 آ خضدار سیشن کورٹ نا کیب آن بنجائی کسر آن کنا مار کبیر بلوچ ءی اونا سنگت مشتاق بلوچ و عطاء اللہ بلوچ تون اواری زوراکی ئٹ بیگواہ کننگا و دا پانزدہ سال ئٹ ای عدالت، کمیشن، جے آئی ٹی تیتون اوار انصاف نا ہر درغ آ ہناٹ ولے ہچو جاغہ اس بیدس اُست کٹہی، بے انصافی و بے شرفی آن ننے ہچس رسینگتئو، دا تیوہ غا ادارہ غاک مظلوم آتے انصاف تننگ کن آخہ بلکن ظالم ءِ رکھنگ کن جوڑ کننگانو و ظالم دا ادارہ غاتے تینا ظلم و بے انصافی تے شابیتی تننگ کن کاریم اٹ ہتیک۔
او پارے کہ ای چاوہ کنا مار بے قصور ءِ و اگہ او ڈوہدار مروس گڑا دا پانزدہ سال ئٹ اونا ڈوہ ءِ پک کریسہ تینا ٹہیفوک اسہ عدالت اسیٹ مونا ہتیسہ تینا پاکستانی راہبند نا رِدئٹ اوفتے سزا تننگوس۔
او پارے کہ داڑان پاش مریک کہ ننا چُناک نا گناہ و اوفتیتون زوراکی ئٹ بیگواہ کریسہ بے دادی نا گواچی کروک آک گناہ گار و ڈوہدار ءُ۔
بیگواہ کبیر بلوچ نا لمہ پارے کہ دا پانزدہ سال ئٹ ای پاکستان تیوہ غا ادارہ غاتیان ہلیس سیاستدان و احوالکار آتے وار وار تینا مار نا یلہ کرفنگ و انصاف تننگ کن کُوک تسوٹ ولے کس ننا توار آ پام کتئو اگہ کنا توار شرفدار جہان، راج و بندغی حق آتیکن توار ارفوک آتے اسکان سر مریک گڑا ای اسہ بے وس و بے توار لمہ اس خواست کیوہ کہ ای زند ئنا ایسری بشخ آ سر مسونٹ دا کنے آ رحم کننگ مرے و کنا مار و اونا سنگت آتے یلہ کرفنگ مرے کہ ای کہنگ آن مُست اسہ وار تینا مار نا دیدار ءِ کننگ کیو۔