بلوچستان نا علاقہ مستونگ ئٹ ننگ نا پن آ زالبول اسیتون اوار مُسہ بندغ کسفنگار اندن کیچ ئٹ تینا چنا تے کسفوک آ خونی باوہ وت کشی کرے۔
حوال تا ردئٹ بلوچستان نا ضلع مستونگ نا تحصیل کردگاپ نا علاقہ لڈی دشت ئٹ سم کاری نا تدینی اس مونا بس ہرا ٹی زالبول اسیتون اوار 3 بندغ ءِ کسفنگا۔
پولیس نا پاننگ ءِ کہ تدینی گمانی وڑ ئٹ ننگ نا پِن آ خون ئسے نا ءِ۔ لیویز بست و بند جون تے دی ایچ کیو اسپتال آ درے۔
لیویز بست و بند تدینی نا مقدمہ ءِ درج کریسہ دوبہ دار تا دزگیری کن کاروائی بناء کرے۔
ایلو پارہ غا ضلع کیچ آن حوال آک اریر کہ درو تینا ہڑتوما چنا تے کسفوک آ باوہ وت کشی کرینے۔
پولیس نا ردئٹ ضلع کیچ نا علاقہ کولواہ آشال نا ہندی عبدالواحد ولد سلیم پنی ءُ بندغ اس لخ ئٹ چٹ اس شاغیسہ وت کشی کرے۔
پولیس نا ردئٹ اونا جون اینو سہب ئنا علاقہ نا اسہ درخت اسیٹ ٹنگوک خننگانے۔
یاتی مرے پن کروک بندغ درو گمانی ڈول اُرائی جیڑہ تا سوب تینا اِرا معصوم چنا تے گُٹو کریسہ کسفے و ہند آ نرا۔