نوشکی ٹی پاکستانی لشکر کیہی اُرا تیا چھاپہ خلیسہ پنچ ورنا ءِ زوراکی ئٹ بیگواہ کرے۔ فورسز آک زالبول و چنا تے بے دادی نا گواچی ہم کریر۔
بلوچستان نا ضلع نوشکی نا جتا علاقہ تیٹ پاکستانی لشکر ننکان چھاپہ خلیسہ پنچ ورنا ءِ زوراکی ئٹ بیگواہ کرے۔
بیگواہ مروک بندغ تا چاہنداری حق نواز ہند کلی مینگل، حامد ہند کلی مینگل، جعفر ہند کلی جمالدینی، عامر ہند کلی شریف خان و چنک سن یاسین ہند کلی شریف خان نا پن تیٹ مسنے۔
ہندی حوالکار تا پاننگ ءِ کہ پن کروک بندغ تے اگست ئٹ جتا وخت آتیٹ پاکستانی لشکر و ڈھکوک ادارہ تا کارندہ غاک اُرا تیا چھاپہ خلیسہ زوراکی ئٹ بیگواہ کریر۔
حوالکار تا گیشتر پاننگ ءِ کہ چھاپہ آتا وخت ئٹ فورسز آک اُرا تیٹ ساڑی بندغ تے خلکر اندن زالبول تے ہم بے دادی نا گواچی کریر۔
یاتی مرے کہ داکان مالو نوشکی کلی جمالدینی آن اسہ پین ورنا عاطف ولد ماسٹر عادل خان نا پاکستانی لشکر نا دو آن زوراکی ئٹ بیگواہی نا احوال مونا بسنے۔
ضلعی کوالخواک دا تدینی تا بابت دائسکان ہچو ہیت اس مونا ہتنو۔
بلوچستان ئٹ زوراکی نا بیگواہی تا تدینیک تدوکا کیہی سال تیان برجاء ءُ، تدوکا اِرا تُوہ ئٹ اسہ وار پدا دا تدینی تیٹ ودکی خننگ ئٹ بسنے۔
زوراکی نا بیگواہی تیٹ ودکی نا برخلاف بلوچ یکجہتی کمیٹی کراچی پریس کلب نا مونا اِرا دے ئی برانزی کیمپ اس ٹہیفسہ تولوک برانز کرے و دپدرشانی اس کرے اندن کوئٹہ ئٹ وائس فار بلوچ مسنگ پرسنز نا پارہ غان پریس کلب نا مونا برانز کننگا۔
وائس فار بلوچ مسنگ پرسنز نا ردئٹ بلوچستان ئٹ ہراڑے زوراکی نا بیگواہی تے ترند کننگانے ہموڑے بیگواہ بندغ تا خاہوت و وی بی ایم پی نا زالبول تے بھیم نا گواچی کننگک۔