اسلام آباد ہائی کورٹ بندغی حق آتیکن توار بڑز کروک وکیل ایمان مزاری ءِ ہچو مقدمہ اسیٹ دزگیر کپننگ نا پرمان تسنے۔
شیریں مزاری نا پارہ غان مسٹمیکو مقدمہ ٹی ضمانت نا دروشم ئٹ ایمان مزاری نا پدا دزگیری نا خلیس عدالت نا مونا پاش کننگا گڑا اسلام آباد ہائی کورٹ سیکرٹری داخلہ، آئی جی اسلام آباد و ڈی جی ایف آئی اے ءِ پرمان تس کہ بروک آ سماعت دو شمبے اسکان ایمان مزاری ءِ ہچو مقدمہ اسیٹ دزگیر کننگ مف و نئے کہ اسہ صوبہ ئسے ایمان مزاری نا دزگیری ٹی کمک تننگے۔
جسٹس میاں گل حسن اورنگزیب تینا اِرا پنہ غا تالان پرمان ئٹ دا ہم پارے کہ سیکرٹری داخلہ، آئی جی اسلام آباد و ڈی جی ایف آئی اے یخینی جوڑ کیر کہ ایمان مزاری ءِ اسلام آباد نا حد آتیان پیشن دننگ مف و سیکرٹری داخلہ ایمان مزاری نا برخلاف دو شمبے اسکان مقدمہ تا بابت صوبہ تیان شابیتی حوال خواہسہ چاہندار کننگے، کیس ئنا ایلو سماعت دو شمبے آ تخنگا۔